ប្រទេសកូរ៉េខាងជើងបានរិះគន់ចក្រភពអង់គ្លេសកាលពីថ្ងៃអង្គារអំពីផែនការដាក់ពង្រាយនាវាចម្បំាងពីរគ្រឿងជាអចិន្ត្រៃយ៍នៅក្នុងតំបន់អាស៊ីប៉ាស៊ីហ្វិក ដោយបានហៅការដាក់ពង្រាយនាវានេះថាជា«ការបង្កហេតុ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ផែនការនេះកើតមានឡើងនៅពេលដែលរដ្ឋាភិបាលក្រុងឡុងដ៍បង្កើនការចូលរួមរបស់ខ្លួននៅក្នុងតំបន់អាស៊ី បន្ទាប់ពីសម្តែងការព្រួយបារម្ភអំពីការកើនឡើងនូវមហិច្ឆតាពង្រីកទឹកដីរបស់ចិននៅក្នុងតំបន់នោះ រួមទាំងកោះតៃវ៉ាន់ផង។
កូរ៉េខាងជើងបានឲ្យដឹងថា ព័ត៌មាននៃផែនការនេះជួនពេលគ្នានៃការឆ្លងកាត់របស់នាវាផ្ទុកយន្តហោះអង់គ្លេស Queen Elizabeth និងនាវាអមដំណើរឆ្លងកាត់សមុទ្រដែលចិនកំពុងប្រជែងឥទ្ធិពលជាមួយសហរដ្ឋអាមេរិក និងប្រទេសជប៉ុន។
មន្ត្រីកូរ៉េខាងជើងម្នាក់បានរិះគន់ការលើកឡើងរបស់រដ្ឋមន្ត្រីការពារជាតិអង់គ្លេសលោក Ben Wallace ដែលថា កូរ៉េខាងជើង និងចិនព្យាយាមផ្ដាច់ប្រទេសជប៉ុននិងកូរ៉េខាងត្បូងឲ្យនៅឆ្ងាយពីគេ និងគំរាមកំហែងសេរីភាពនៃការធ្វើនាវាចរណ៍ក្នុងតំបន់ឥណ្ឌូប៉ាស៊ីហ្វិក។
មន្ត្រីរូបនេះបានថ្លែងក្នុងសេចក្តីថ្លែងការណ៍មួយនៅលើគេហទំព័ររបស់ក្រសួងការបរទេសកូរ៉េខាងជើងថា៖ «វាជាប្រភេទនៃការបង្កហេតុប្រឆាំងនឹងយើងដែលចក្រភពអង់គ្លេសកំពុងធ្វើឲ្យស្ថានការណ៍កាន់តែធ្ងន់ធ្ងរឡើងដោយបញ្ជូននាវាចម្បាំងរបស់ខ្លួនចូលក្នុងតំបន់អាស៊ីប៉ាស៊ីហ្វិកដោយយកការគំរាមកំហែងជាការដោះសារ»។
ស្ថានទូតអង់គ្លេសនៅក្នុងទីក្រុងសេអ៊ូលមិនអាចទាក់ទងសុំការបំភ្លឺបានភ្លាមៗនោះទេ៕