ខណៈប្រជាពលរដ្ឋកំពុងត្រៀមខ្លួនចូលឆ្នាំប្រពៃណីខ្មែរដែលចូលមកដល់នៅថ្ងៃព្រហស្បតិ៍ទី១៤ខែមេសានេះ អ្នកពាក់ព័ន្ធមួយចំនួនបានអំពាវនាវឱ្យប្រជាពលរដ្ឋបន្តការប្រុងប្រយ័ត្នខ្ពស់ និងត្រូវប្រកាន់ខ្ជាប់វិធានការសុខាភិបាល ដើម្បីកុំឱ្យមានការឆ្លងជំងឺកូវីដ១៩ទ្រង់ទ្រាយធំ ក្រោយពិធីចូលឆ្នាំខ្មែរ។
រដ្ឋាភិបាលកម្ពុជាបានបើកប្រទេសចាប់តាំងចុងឆ្នាំ២០២១ ហើយអនុញ្ញាតឲ្យប្រជាពលរដ្ឋអាចប្រារព្ធពិធីបុណ្យចូលឆ្នាំខ្មែរ ក្រោយខកខានរយៈពេល២ឆ្នាំជាប់គ្នា ដោយសារការរីករាលដាលខ្លាំងនៃជំងឺកូវីដ១៩ កាលពីពេលនោះ។
លោក យង់ គិមអេង ប្រធានមជ្ឈមណ្ឌលអភិវឌ្ឍន៍ និងសន្តិភាព ថ្លែងថាការបើកឱ្យពលរដ្ឋអាចជួបជុំ និងដើរលេងពេលចូលឆ្នាំខ្មែរ ជារឿងល្អ មួយ ប៉ុន្តែលោកបង្ហាញការព្រួយបារម្ភអំពីការឆ្លងច្រើន ពាក់ព័ន្ធការជួបជុំនាពេលចូលឆ្នាំនេះ ប្រសិនបើប្រជាពលរដ្ឋមិនសូវយកចិត្តទុកដាក់ និងអនុវត្តវិធានការសុខាភិបាលបានខ្ជាប់ខ្ជួន។ លោកបន្តថា ការអនុញ្ញាតឱ្យប្រជាពលរដ្ឋអាចចូលរួមប្រារព្ធពិធីចូលឆ្នាំ នេះអាចជាការសាកល្បងប្រសិទ្ធភាពនៃវ៉ាក់សាំងបង្ការជំងឺកូវីដ១៩ ដើម្បីឈានទៅបើកប្រទេសពេញលេញ។
ទោះជាយ៉ាងណា លោកជំរុញឱ្យអាជ្ញាធរមានយន្តការតាមដានការឆ្លងជំងឺកូវីដ១៩ និងអាចទប់ស្កាត់បានទាន់ពេលវេលា។
លោកប្រាប់វីអូអេថា៖ «បងប្អូនប្រជាពលរដ្ឋរបស់យើងត្រូវមានការប្រុងប្រយ័ត្ន ។ បើយើងប្រុងប្រយ័ត្នបានល្អ យើងអត់ឆ្លង អាហ្នឹងវាកាន់តែប្រសើរ។ អ៊ីចឹងជារួម គឺយើងគួរតែកុំឱ្យមានជំងឺនោះឆ្លងដល់យើងជាជាងឆ្លង ហើយយើងព្យាបាល នេះជារឿងមួយសំខាន់។ ហើយជាមួយគ្នានោះ អាជ្ញាធរទន្ទឹមនឹងការបើកនេះក៏គួរតែមានការដាក់នូវការធ្វើអង្កេត ដើម្បីតាមដានមើលថា តើមានករណីឆ្លងទេក្នុងមួយថ្ងៃ ពីរថ្ងៃ បីថ្ងៃ ដើម្បីមើលនិន្នាការនៃការឆ្លង។បើសិនមានការឆ្លង អាហ្នឹងយើងអាចចាត់វិធានការទាន់ពេលវេលា»។
លោក យង់ គិមអេង បានកត់សម្គាល់ថា ប្រសិនបើកម្ពុជាមានការឆ្លងរីករាលដាលធំសាជាថ្មី នោះ នោះកម្ពុជានឹងលែងជាប្រទេសទី២ ហើយដែលមានចំណាត់ថ្នាក់ល្អ ងើបចេញពីជំងឺកូវីដ១៩។ លោកក៏អំពាវនាវឱ្យពលរដ្ឋកុំជួបជុំផឹកស៊ីច្រើន ដែលជាហេតុធ្វើឱ្យមានការឆ្លងខ្លាំងនៃជំងឺកូវីដ១៩នេះផងដែរ។
ខេត្តជាច្រើនដូចជាខេត្តព្រះសីហនុ សៀមរាបបាត់ដំបង និងខេត្តមួយចំនួនទៀតបានអនុញ្ញាតឱ្យមានការរៀបចំលេងល្បែងប្រជាប្រិយជាតិនៅតាមរមណីយដ្ឋាន និងវត្តអារាមជាដើម។ អាជ្ញាធរខេត្តទាំងនោះក៏បានចេញសេចក្តីណែនាំទៅអាជ្ញាធរមូលដ្ឋានខេត្តឱ្យអប់រំផ្សព្វផ្សាយ និងជំរុញលើកទឹកចិត្តឱ្យប្រជាពលរដ្ឋអនុវត្តវិធានសុខាភិបាល និងការពារខ្លួន ស្របតាមរបត់នៃការរស់នៅធម្មតា តាមបែបគន្លងប្រក្រតីថ្មីក្នុងបរិបទប្រយុទ្ធនឹងជំងឺកូវីដ១៩ ដោយប្រកាន់យកការអនុវត្តវិធីការពារខ្លួន។
ប្រធានសមាគមគ្រូពេទ្យគុណធម៌ លោក អ៊ូច វុទ្ធី បានសង្កេតឃើញថា ប្រជាពលរដ្ឋបានរៀនរស់ជាមួយកូវីដ១៩នេះអស់រយៈពេលជាង២ឆ្នាំមកហើយ ដែលធ្វើឱ្យមានការនឿយណាយ និងចង់មានការជួបជុំបងប្អូន ក្នុងពេលចូលឆ្នាំនេះ។ ប៉ុន្តែលោកជំរុញឱ្យប្រជាពលរដ្ឋត្រូវតែចេះការពារខ្លួនឱ្យបានខ្ពស់ និងត្រូវរកគ្រូពេទ្យព្យាបាលបន្ទាន់ ប្រសិនបើមានអាការៈសង្ស័យឆ្លងជំងឺកូវីដ១៩។ លោកថ្លែងថា៖ «វានៅតែឆ្លងហ្នឹង បើសិនជាកូវីដវាអត់ទាន់ទៅណា ហើយអូមីក្រុងទៀត។ អ៊ីចឹងវាលឿនណាស់ ។ វានៅឆ្លង។យើងគួរណាបានសិទ្ធិ ដើរហើរពេលចូលឆ្នាំហ្នឹង គួរណាបងប្អូនចេះប្រុងប្រយ័ត្នទៅ ចេះការពារ។ពេលណាមានអាការៈមិនល្អ មិនស្រួល យើងអាចទៅរកគ្រូពេទ្យជំនាញ ដើម្បីព្យាបាលខ្លួន»។
ប្រធានសមាគមគ្រូពេទ្យគុណធម៌រូបនេះបន្តថាការអនុញ្ញាតឱ្យមានការជួបជុំក្នុងពេលចូលឆ្នាំខ្មែរ ក៏ជាការល្អ ដែលអាចសាកល្បងបន្ថែមទៀតលើវ៉ាក់សាំងបង្ការជំងឺកូវីដ១៩ ដែលកម្ពុជាបានចាក់ដល់ប្រជាពលរដ្ឋជាង៩០% និងជាការសាកល្បងបើកប្រទេសឱ្យបានពេញលេញឡើងវិញ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់វីអូអេថាប្រជាពលរដ្ឋដែលមកលេងកម្សាន្តក្នុងខេត្តព្រះសីហនុនេះ ត្រូវតែប្រកាន់ខ្ជាប់នូវវិធានការសុខាភិបាល។
ចំណែក លោក លី សំរិទ្ធ អភិបាលរងនិងជាអ្នកនាំពាក្យសាលាខេត្តសៀមរាប ថ្លែងប្រាប់វីអូអេថា ប្រជាពលរដ្ឋត្រូវតែមានការប្រុងប្រយ័ត្ន និងអនុវត្តវិធានការ៣កុំ និង៣ការពារ ដើម្បីកុំឱ្យមានចលនាឆ្លងរីករាលដាលជំងឺកូវីដ១៩សាជាថ្មី។
លោកថ្លែងថា៖ «បងប្អូនមកពីទីជិតឆ្ងាយក្នុងប្រទេស មកលេងសៀមរាប ច្រើនណាស់ អ៊ីចឹងទេ កុំឱ្យវាមានបញ្ហាដោយសារការឆ្លងបង្កើតឱ្យទៅជាចលនានៃការឆ្លងរីករាលដាលម្តងទៀតពីកូវីដ១៩។ទោះបីជាយើងមានវ៉ាក់សាំង បានចាក់វ៉ាក់សាំងគ្រប់គ្នា ច្រើនលើកហើយក៏ដោយត្រូវតែប្រុងប្រយ័ត្ន»។
ស្របពេលមានការបើកឱ្យជួបជុំលេងល្បែងប្រជាប្រិយខ្មែរនេះក្រសួងសុខាភិបាល កាលពីថ្ងៃទី១២ខែមេសា បានសម្រេចដាក់ខេត្តចំនួន៤ សាកល្បងលើកលែងកាតព្វកិច្ចពាក់ម៉ាស់ ដែលរួមមានខេត្តរតនគិរី ស្ទឹងត្រែងមណ្ឌលគិរី និងខេត្តព្រះវិហារ។ប៉ុន្តែកាតព្វកិច្ចពាក់ម៉ាស់ក្នុងខេត្តនេះត្រូវតែបន្តអនុវត្តសម្រាប់អ្នកជំងឺកូវីដ១៩ និងអ្នកដែលមានការពាក់ព័ន្ធអ្នកមានកូវីដ១៩ និងការចេញក្រៅភូមិសាស្ត្រក្នុងខេត្តផ្សេង។
ក្រសួងសុខាភិបាលក៏បានចេញសេចក្តីណែនាំ អំពីការការពារសុខភាព និងការពារការចម្លងវីរុសកូវីដ១៩ ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរផងដែរ។ សេចក្តីណែនាំក្រសួងសុខាភិបាល ចុះថ្ងៃទី១ ខែមេសា ឱ្យដឹងថា ក្រសួងសុខាភិបាលបានអំពាវនាវដោយទទូចដល់បងប្អូនប្រជាពលរដ្ឋទាំងអស់សូមបន្តបង្កើនការប្រុងប្រយ័ត្នខ្ពស់ ដោយអនុវត្តនូវវិធានការ ៣កុំ៣ការពារ ឱ្យបានខ្ជាប់ខ្ជួន និងគ្រប់ៗគ្នា។ ក្រសួងក៏លើកទឹកចិត្តដល់ប្រជាពលរដ្ឋណាដែលមានអាការៈសង្ស័យមានជំងឺកូវីដ១៩ ត្រូវធ្វើតេស្តរហ័ស ដើម្បីចៀសវាងការចម្លងដល់អ្នកដទៃ និងការបង្កឱ្យមានការចម្លងទ្រង់ទ្រាយធំនៅក្នុងសហគមន៍។
ក្រសួងសុខាភិបាលក៏បានដាក់ចេញវិធានការមួយចំនួនទៀត ដូចជាការរក្សាអនាម័យ និងគម្លាតសុវត្ថិភាពនៅតាមវត្តអារាម ការជ្រើសរើសយកការធ្វើដំណើរដាច់ដោយឡែកជាលក្ខណៈគ្រួសារតូចៗ ដែលមិនមានការជួបជុំច្រើន និងត្រូវចៀសវាងប្រើប្រាស់មធ្យោបាយសាធារណៈដែលមានផ្ទុកមនុស្សច្រើន។
គួរបញ្ជាក់ថាតួលេខនៃការឆ្លងជំងឺកូវីដ១៩បានធ្លាក់ចុះជាបន្តបន្ទាប់។ ក្រសួងសុខាភិបាលបានប្រកាសនៅថ្ងៃពុធនេះថា ករណីឆ្លងកាលពីថ្ងៃទី១២ខែមេសា មានចំនួន១៨នាក់ ដែលជាលទ្ធផលបញ្ជាក់ដោយម៉ាស៊ីនPCR៕