លោកស្រី អង់សាន ស៊ូជី កំពុងតែប្រឈមជាមួយនឹងសម្ពាធអន្តរជាតិទាក់ទិននឹងរបាយការណ៍នាពេលថ្មីៗនេះ ដែលបានបង្ហាញថា ទាហានបាន និងកំពុងបន្តធ្វើការកាប់សម្លាប់ ចាប់រំលោភ និងដុតផ្ទះសម្បែងរបស់ជនជាតិមូស្លីម Rohingya នៅក្នុងប្រទេសមីយ៉ាន់ម៉ា។
ក្រសួងការបរទេសសហរដ្ឋអាមេរិកបានសហការជាមួយនឹងសកម្មជន និងអង្គការផ្ដល់ជំនួយនានា ដើម្បីលើកឡើងពីក្ដីបារម្ភអំពីរបាយការណ៍ថ្មីដែលបានបង្ហាញពីករណីចាប់រំលោភ និងសម្លាប់។ ស្របពេលនោះដែរ រូបភាពពីប្រព័ន្ធផ្កាយរណប ពីលើអាកាស ដែលត្រូវបានផ្សព្វផ្សាយនៅថ្ងៃចន្ទនេះដោយអង្គការឃ្លាំមើលសិទ្ធិមនុស្សអន្តរជាតិ បានបង្ហាញថាយ៉ាងហោចណាស់ មានភូមិចំនួន ៣ នៅក្នុងរដ្ឋ Rakhine ស្ថិតនៅភាគខាងលិចប្រទេសមីយ៉ាន់ម៉ា ត្រូវបានគេដុតបំផ្លាញ។
មន្ត្រីរដ្ឋាភិបាលមីយ៉ាន់ម៉ាបដិសេធរបាយការណ៍ទាំងនេះ ហើយលោក Zaw Htay ដែលជាអ្នកនាំពាក្យរបស់ប្រធានាធិបតី បាននិយាយនៅថ្ងៃចន្ទនេះថា តំណាងអង្គការសហប្រជាជាតិគួរតែមកមើលស្ថានការណ៍នៅក្នុងតំបន់នោះដោយផ្ទាល់។ កន្លងមក រដ្ឋាភិបាលមីយ៉ាន់ម៉ាបានធ្វើឲ្យមានការលំបាកក្នុងការចូលទៅកាន់តំបន់នោះ ដោយជាទូទៅ បានហាមឃាត់បុគ្គលិកជំនួយអន្តរជាតិ និងអ្នកសារព័ត៌មាននានា។
ប៉ុន្តែ អ្នករាយការណ៍ពិសេសរបស់អង្គការសហប្រជាជាតិអំពីបញ្ហាសិទ្ធិមនុស្សប្រចាំនៅក្នុងប្រទេសមីយ៉ាន់ម៉ា លោកស្រី Yanghee Lee បាននិយាយថា ការរំលោភបំពានធ្ងន់ធ្ងរ ដែលរួមមានទាំងការធ្វើទារុណកម្ម ការសម្លាប់ភ្លាមៗដោយមិនមានការកាត់ទោស ការចាប់ខ្លួនដោយគ្មានច្បាប់អនុញ្ញាត និងការបំផ្លិចបំផ្លាញព្រះវិហារឥស្លាម និងផ្ទះសម្បែងជាដើម កំពុងគំរាមកំហែងដល់លទ្ធិប្រជាធិបតេយ្យដែលកំពុងតែដុះពន្លកនៅក្នុងប្រទេសមីយ៉ាន់ម៉ា។
លោក Chris Lewa ប្រធានគម្រោង The Arakan Project ដែលជាអង្គការតស៊ូមតិមួយធ្វើការផ្ដោតលើជនជាតិ Rohingya បាននិយាយថា៖ «ចំណុចសំខាន់នោះគឺថា រដ្ឋាភិបាលមីយ៉ាន់ម៉ាទំនងជាមិនមានឥទ្ធិពលអ្វីទាំងអស់លើពួកយោធា»។ រដ្ឋធម្មនុញ្ញមីយ៉ាន់ម៉ា ដែលរងការរិះគន់យ៉ាងខ្លាំងនោះ ត្រូវបានតាក់តែងឡើងដោយផ្ដល់អំណាច និងភាពឯករាជ្យដល់ពួកយោធា៕