ម្ចាស់ថ្មីរបស់កាសែតភ្នំពេញប៉ុស្តិ៍ ត្រូវបានអ្នកកាសែតមកពីអង្គភាពនានាទាំងក្នុងស្រុក និងក្រៅប្រទេស ឈ្លេចសួរអំពីហេតុផលនៃការសម្រេចចិត្តទិញកាសែតដែលគេជឿថា ជាកាសែតផ្សាយជាភាសាអង់គ្លេសនិងខ្មែរឯករាជ្យចុងក្រោយគេនៅកម្ពុជា បន្ទាប់ពីការបិទទ្វាររបស់កាសែត The Cambodia Daily។ លោក Siva Kuma ដែលជាចាងហ្វាងថ្មីរបស់កាសែតភ្នំពេញប៉ុស្តិ៍អះអាងថា កាសែតភ្នំពេញប៉ុស្តិ៍ ដែលបានប្រឈមមុខនឹងបញ្ហាហិរញ្ញវត្ថុនេះ នឹងត្រូវបិទទ្វារ ប្រសិនបើលោកមិនទិញទេនោះ។
ចាងហ្វាងថ្មីរបស់កាសែតឌឹ ភ្នំពេញប៉ុស្ត៍ នៅថ្ងៃសុក្របានបដិសេធថា រដ្ឋាភិបាលគ្មានជាប់ពាក់ព័ន្ធនឹងការទិញដូរកាសែតដែលត្រូវគេរាយការណ៍ថា បានជំពាក់ពន្ធរដ្ឋជាង៣លានដុល្លារអាមេរិក។
ម្ចាស់ថ្មីរបស់កាសែតភ្នំពេញប៉ុស្តិ៍ លោក Siva Kuma Ganapathy (រូបកណ្តាល ) ធ្វើសន្និសីទសារព័ត៌មានជាលើកដំបូង នៅថ្ងៃទី១៨ ខែឧសភា ឆ្នាំ២០១៨ ក្នុងរាជធានីភ្នំពេញ។ (ហ៊ុល រស្មី/VOA)
ដោយបានបង្ហាញមុខជាលើកដំបូងជាមួយអ្នកកាសែត លោក Siva Kuma Ganapathy បានប្រាប់អ្នកកាសែតថា ការទិញកាសែតភ្នំពេញប៉ុស្តិ៍ គឺជាការសម្រេចចិត្តក្នុងនាមជាសហគ្រិន ហើយថា បើលោកមិនទិញកាសែតនេះទេ វាមុខជានឹងបិទទ្វាជាក់ជាមិនខានឡើយ។
«ដើម្បីឆ្លើយនឹងសំណួរ គឺថា រដ្ឋាភិបាលគ្មានជាប់ពាក់ព័ន្ធនោះទេ។ ខ្ញុំមិនថា អ្នកចង់មានថាម៉េច អំពីរដ្ឋាភិបាលនោះទេ។ នេះគឺជាការសម្រេចចិត្តលក្ខណៈសហគ្រិនតាំងពីដំបូងមក»។
កាលពីដើមខែឧសភានេះ កាសែតភ្នំពេញប៉ុស្តិ៍ដែលមានអាយុកាល២៦ ឆ្នាំ ត្រូវបានផ្ទេរកម្មសិទ្ធិពីលោក Bill Cloughអ្នកជំនួញខាងរ៉ែ និងមានសញ្ជាតិអូស្ត្រាលី ទៅឲ្យលោក Siva Kuma Ganapathy ដែលជាវិនិយោគិនសញ្ជាតិម៉ាឡេស៊ីនិងជានាយកប្រតិបត្តិនៃក្រុមហ៊ុនទំនាក់ទំនងសាធារណៈមួយឈ្មោះថា Asia Malaysia PR។
បន្ទាប់ពីការទិញដូរនេះភ្លាម និពន្ធនាយកកាសែតនេះគឺលោកកៃ គឹមសុង ត្រូវបានបណ្តេញចេញ ដោយសារតែនិពន្ធនាយករូបនេះ បានអនុញ្ញាតឲ្យចេញផ្សាយអត្ថបទទំព័រមុខមួយ ដែលបានពណ៌នាយ៉ាងលម្អិតអំពីទំនាក់ទំនងរបស់លោក Siva Kuma ជាមួយអាជ្ញារកម្ពុជា។ អ្នកកាសែតបរទេសពីរនាក់ផ្សេងទៀតក៏ត្រូវបានបណ្តេញ ហើយអ្នកកាសែតបរទេសប្រមាណ១០នាក់ផ្សេងទៀតបានលាឈប់ពីរការងារ នៅក្នុងការតវ៉ាបណ្តេញនិពន្ធនាយករបស់ពួកគេ។
នៅពេលអ្នកកាសែតសួរលោក Siva Kumaថា តើកាសែតភ្នំពេញប៉ុស្តិ៍ចេញផ្សាយអត្ថបទព័ត៌មានដែលមានលក្ខណៈរិះគន់ទៀតទេ ហើយនិងមានការប្រែប្រួលជំហរនិពន្ធទេនោះ លោកSiva បាននិយាយថា ការរិះគន់មិនមែនជាជម្រើសរបស់លោកទេ ហើយអ្វីដែលលោកនឹងសំអាងដើម្បីសរសេរព័ត៌មាននោះ គឺការណ៍ពិតតែប៉ុណ្ណោះ។
«ហេតុអីបានជាយើងត្រូវរិះគន់នោះ? ខ្ញុំត្រូវផ្អែកលើការណ៍ពិត។...ការងាររបស់យើងគឺផ្អែកលើការណ៍ពិត ហើយមានលក្ខណៈស្ថាបនា»។
លោក Siva Kuma ដែលអះអាងថា ជាអ្នកកាសែតដែលធ្លាប់ទទួលការបណ្តុះបណ្តាល និងជាអ្នកកាសែតមានវិន័យម្នាក់និយាយថា លោកនឹងខិតខំកែប្រែយុទ្ធសាស្ត្រខាងជំនួញ ជាមួយបច្ចេកវិទ្យាថ្មីៗ ដើម្បីរក្សាដំណើរការរបស់កាសែតនេះ។
ក្នុងសន្និសីទព័ត៌មាននៅថ្ងៃនេះ ក្រៅពីការតាំងចិត្តរបស់លោកក្នុងការធ្វើឲ្យកាសែតភ្នំពេញប៉ុស្តិ៍ដំណើរការទៅមុខនោះ លោក Siva Kuma បានបង្ហាញការច្រឡោតម្តងៗពេលអ្នកកាសែតសួរលោកចំពោះបញ្ហាទាក់ទងនឹងប្រតិបត្តិការរបស់កាសែតដែលត្រូវបានបង្កើតឡើងតាំងពីឆ្នាំ១៩៩២ ដោយលោកMichael Hayes ដែលជាពលរដ្ឋអាមេរិកាំងមួយរូប។
ទាក់ទិនបញ្ហាទូទាត់ប្រាក់ជំពាក់ពន្ធរបស់កាសែតភ្នំពេញប៉ុស្តិ៍ ក្រុមមេធាវីរបស់លោក Siva Kuma បដិសេធមិនផ្តល់ចម្លើយ ដោយអះអាងថា វាជាសិទ្ធិរបស់អ្នកលក់កាសែតភ្នំពេញប៉ុស្តិ៍ ក្នុងការបញ្ចេញឬមិនបញ្ចេញព័ត៌មានពាក់ព័ន្ធនឹងបញ្ហានេះ។
ក្នុងចំណាត់ការរបស់រដ្ឋាភិបាលក្នុងការទារពន្ធពីស្ថាប័នឯកជននេះ កាសែតឯករាជ្យមួយទៀតដែលត្រូវបានបង្កើតឡើងនៅឆ្នាំ១៩៩៣ ដោយអ្នកកាសែតសញ្ជាតិអាមេរិកាំងដែរនោះ គឺកាសែត The Cambodia Daily បានបង្ខំចិត្តបិទទ្វាររបស់ខ្លួន ដោយមិនអាចទ្រាំទ្រនឹងសម្ពាធប្រាក់ពន្ធចំនួន៦លាន៣សែនដុល្លារសហរដ្ឋអាមេរិក។
ម្ចាស់កាសែតនេះ ជឿថា ការបង្ខំឲ្យបង់ពន្ធនេះ មានជាប់ពាក់ព័ន្ធនឹងរឿងនយោបាយ។ តែភាគីរដ្ឋាភិបាល ដែលទទួលបន្ទុកយកពន្ធនេះ និយាយថា កាសែតនេះ បានគេចវេសមិនបង់ពន្ធជូនរដ្ឋ ហើយព្យាយាមធ្វើរឿងនេះឲ្យក្លាយជារឿងនយោបាយទៅវិញ៕