ការគ្រប់គ្រងការផ្សព្វផ្សាយជាអន្តរជាតិរបស់រដ្ឋាភិបាលអាមេរិកនឹងត្រូវពង្រឹងក្រោមការគ្រប់គ្រងរបស់នាយកប្រតិបត្តិដ៏មានអំណាចមួយរូប តាមបទបញ្ញត្តិថ្មី ដែលត្រូវបានគេរំពឹងថា នឹងចុះហត្ថលេខាដោយប្រធានាធិបតី បារ៉ាក់ អូបាម៉ា នាពេលឆាប់ៗខាងមុខនេះ។
ការផ្លាស់ប្តូរនេះត្រូវបានដាក់បញ្ចូលជាផ្នែកមួយនៃច្បាប់ថវិកាប្រចាំឆ្នាំរបស់ក្រសួងការពារជាតិ គឺច្បាប់សម្រាប់ការពារជាតិឆ្នាំ២០១៧ ដែលត្រូវបានអនុម័តដោយសភាអាមេរិកទាំងពីរ កាលពីពាក់កណ្តាលខែធ្នូកន្លងទៅ។
សេចក្តីព្រាងច្បាប់នេះរៀបចំឡើងវិញនូវថ្នាក់ដឹកនាំនៃក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ (Broadcasting Board of Governors) ជាទីភ្នាក់ងារព័ត៌មានរបស់រដ្ឋាភិបាលអាមេរិក ដែលគ្រប់គ្រងប្រព័ន្ធផ្សាយរបស់សំឡេងសហរដ្ឋអាមេរិក (VOA) និងអង្គភាពផ្សព្វផ្សាយផ្សេងៗទៀត ដែលមួយចំនួននៃអង្គភាពផ្សព្វផ្សាយទាំងនោះ ត្រូវបានគេរៀបចំឲ្យទៅជាសាជីវកម្មឯកជនដែលទទួលបានការឧបត្ថម្ភថវិកាពីរដ្ឋាភិបាល ឬហៅថាជាអង្គភាពទទួលទុនឧបត្ថម្ភ។
ក្រុមប្រឹក្សាភិបាល ដែលមកពីពីរក្រុមផ្សេងគ្នា ហើយមានសមាជិកចំនួនប្រាំបួនរូបនេះ ដែលត្រួតពិនិត្យលើក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ (BBG) នឹងត្រូវជំនួសដោយក្រុមប្រឹក្សាផ្តល់យោបល់មួយតូចជាងមុន ដោយពុំមានអំណាចធ្វើសេចក្តីសម្រេចចិត្តអ្វីនោះឡើយ។ អំណាចរបស់ក្រុមប្រឹក្សាភិបាលនៃការផ្សព្វផ្សាយនេះនឹងត្រូវផ្ទេរទៅឱ្យនាយកប្រតិបត្តិ ក្នុងតំណែងថ្មីមួយដែលត្រូវបានបង្កើតឡើងកាលពីខែកញ្ញា ឆ្នាំ២០១៥។ អនាគតនាយកប្រតិបត្តិនឹងត្រូវតែងតាំងដោយប្រធានាធិបតី ហើយផ្តល់សច្ចានុម័តដោយព្រឹទ្ធសភា។
អ្នកគាំទ្រសេចក្តីព្រាងច្បាប់នេះ ឲ្យដឹងថា ការផ្លាស់ប្តូរទាំងនេះនឹងជួយបង្កើនសមត្ថភាពដំណើរការផ្សព្វផ្សាយ និងបំបាត់ចោលក្រុមប្រឹក្សាភិបាលធ្វើការក្រៅម៉ោង ដែលត្រូវបានគេរិះគន់ជាយូរមកហើយចំពោះការងារគ្មានប្រសិទ្ធភាព។
ប៉ុន្តែ ក្រុមអ្នករិះគន់អះអាងថា ក្រុមប្រឹក្សាភិបាលនេះដើរតួជារនាំងការពារដ៏សំខាន់រវាងអ្នកសារព័ត៌មានរបស់ក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ និងក្រុមអ្នកនយោបាយមានអំណាច ហើយថា ការលុបចោលក្រុមប្រឹក្សាភិបាលនៃការផ្សព្វផ្សាយនេះ អាចធ្វើឲ្យប៉ះពាល់ដល់ឯករាជ្យភាព និងភាពគួរឲ្យជឿជាក់នៃសារព័ត៌មានបាន។
អ្នកគាំទ្រដ៏សំខាន់មួយរូបរបស់ច្បាប់នេះ គឺលោក Ed Royce សមាជិកសភាមកពីគណបក្សសាធារណរដ្ឋ ដែលថ្លែងថា ការផ្លាស់ប្តូរនៅក្នុងក្រុមប្រឹក្សាភិបាលនៃក្រុមប្រឹក្សាការផ្សព្វផ្សាយ BBG នេះយឺតយ៉ាវពេកហើយ។
លោក Royce បានថ្លែងក្នុងសេចក្តីថ្លែងការណ៍មួយកាលពីដើមខែធ្នូកន្លងទៅយ៉ាងដូច្នេះថា៖
«ទីភ្នាក់ងារព័ត៌មានរបស់យើង ដែលបានជួយទម្លាក់រនាំងដែក (Iron Curtain) ចុះ ដោយការផ្សព្វផ្សាយព័ត៌មានដោយភាពត្រឹមត្រូវ និងទាន់ពេលវេលា បានបាត់បង់សមត្ថភាពធ្វើការងារ។ ពួកគេត្រូវតែមានគេជួយឱ្យសកម្មឡើងវិញដើម្បីបំពេញបេសកកម្មរបស់ពួកគេឲ្យមានប្រសិទ្ធភាពក្នុងយុគសម័យនៃការរីករាលដាលនៃអំពើភេរវកម្ម និងការឃោសនាតាមប្រព័ន្ធឌីជីថលនេះ»។
នាយកប្រតិបត្តិថ្មីរូបណាក៏ដោយ ដែលត្រូវតែងតាំងដោយប្រធានាធិបតីត្រូវតែទទួលការឯកភាពពីព្រឹទ្ធសភា ដែលគ្រប់គ្រងដោយគណបក្សសាធារណរដ្ឋ។
យោងតាមសេចក្តីព្រាងច្បាប់នេះ នាយកប្រតិបត្តិនឹងទទួលបានអំណាចទូលំទូលាយ ជាពិសេសទៅលើអង្គភាពដែលទទួលទុនឧបត្ថម្ភពីក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ BBG ដែលរួមមានវិទ្យុអាស៊ីសេរី (Radio Free Asia) វិទ្យុអឺរ៉ុបសេរី (Radio Free Europe) និងបណ្តាញផ្សព្វផ្សាយនានានៅមជ្ឈឹមបូព៌ា (Middle East Broadcasting Networks)។ ពិសេសជាងនេះទៀត នាយកប្រតិបត្តិនឹងមានអំណាចក្នុងការប្រមូលផ្តុំអ្នកទទួលទុនឧបត្ថម្ភនានារបស់រដ្ឋ ឲ្យចូលជាក្រុមហ៊ុនសាជីវកម្មថ្មីតែមួយ ហើយមានអំណាចជួល និងដកតំណែងថា្នក់ដឹកនាំរបស់ពួកគេ និងផ្ទេរថវិកាពីអ្នកទទួលទុនឧបត្ថម្ភមួយទៅអ្នកទទួលទុនឧបត្ថម្ភមួយផ្សេងទៀត។
ខ្លឹមសារនៃសេចក្តីព្រាងច្បាប់នេះកើតឡើងតាំងពីមុនការបោះឆ្នោតជ្រើសតាំងប្រធានាធិបតីថ្មី ហើយត្រូវបានគាំទ្រដោយរដ្ឋបាលលោក អូបាម៉ា។ ក៏ប៉ុន្តែលោក Michael Kempner សមាជិកក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ (BBG) ដែលតែងតាំងដោយលោក អូបាម៉ា ថ្លែងថា សេចក្តីព្រាងច្បាប់នេះគឺជាកំហុសឆ្គងមួយ។
លោក Kempner បានថ្លែងនៅក្នុងបទសម្ភាសន៍មួយយ៉ាងដូច្នេះថា៖
«គ្មានប្រធានាធិបតីរូបណា ទោះមកពីគណបក្សប្រជាធិបតេយ្យ ឬក៏សាធារណរដ្ឋក្តី អាចមានសិទ្ធិគ្រប់គ្រងពេញលេញលើប្រព័ន្ធផ្សព្វផ្សាយដ៏សំខាន់របស់សហរដ្ឋអាមេរិកទាំងនោះទេ»។ វាគឺជាឯករាជ្យភាពរបស់ប្រព័ន្ធផ្សព្វផ្សាយ ដែលធ្វើឲ្យប្រព័ន្ធផ្សព្វផ្សាយទាំងនេះអាចទុកចិត្តបាននិងមានប្រសិទ្ធភាពនៅជុំវិញពិភពលោក។ ហើយបើគ្មានភាពឯករាជ្យនោះទេ ប្រព័ន្ធផ្សព្វផ្សាយគ្រាន់តែជាឧបករណ៍ឃោសនាដែលមិនគួរឲ្យទុកចិត្តបានតែប៉ុណ្ណោះ»។
សេចក្តីព្រាងច្បាប់នេះរៀបចំឡើងវិញនូវថ្នាក់ដឹកនាំនៃក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ (Broadcasting Board of Governors) ជាទីភ្នាក់ងារព័ត៌មានរបស់រដ្ឋាភិបាលអាមេរិក ដែលគ្រប់គ្រងប្រព័ន្ធផ្សាយរបស់សំឡេងសហរដ្ឋអាមេរិក (VOA) និងអង្គភាពផ្សព្វផ្សាយផ្សេងៗទៀត ដែលមួយចំនួននៃអង្គភាពផ្សព្វផ្សាយទាំងនោះ ត្រូវបានគេរៀបចំឲ្យទៅជាសាជីវកម្មឯកជនដែលទទួលបានការឧបត្ថម្ភថវិកាពីរដ្ឋាភិបាល ឬហៅថាជាអង្គភាពទទួលទុនឧបត្ថម្ភ។
សេចក្តីរាយការណ៍របស់សារព័ត៌មានមួយចំនួនបានលើកឡើងថា ការផ្លាស់ប្តូរនេះមានន័យថា អ្នកផ្សព្វផ្សាយព័ត៌មានរបស់ក្រុមប្រឹក្សាភិបាលនៃការផ្សព្វផ្សាយតាមវិទ្យុ និងទូរទស្សន៍ រួមទាំង VOA ផងនោះ នឹងក្លាយជាឧបករណ៍បន្ទរសំឡេងរបស់ប្រធានាធិបតីជាប់ឆ្នោតលោក Donald Trump ជាពុំខាន។
លោក John Lansing ដែលជានាយកប្រតិបត្តិរបស់ក្រុមប្រឹក្សាភិបាលនៃការផ្សព្វផ្សាយ BBG នាពេលបច្ចុប្បន្ននេះ បានថ្លែងថា ឯករាជ្យភាពរបស់ទីភ្នាក់ងារព័ត៌មានទាំងឡាយរបស់ BBG នៅតែត្រូវបានការពារ។ តាមរយៈសារអេឡិចត្រូនិចមួយ ដែលផ្ញើទៅកាន់បុគ្គលិកកាលពីដើមខែធ្នូ លោកបាននិយាយថា៖ «ការការពារឯករាជ្យភាពរបស់អ្នកសារព័ត៌មានយើង និងភាពគួរជឿជាក់បានរបស់យើងទូទាំងពិភពលោកនៅតែជាបុព្វហេតុដ៏សំខាន់បំផុតរបស់យើង»។
លោក Lansing មានប្រសាសន៍ថា៖ «ការបង្កើតច្បាប់នេះមិនធ្វើឲ្យមានការផ្លាស់ប្តូរអ្វីដល់រនាំងការពាររវាងរដ្ឋាភិបាលសហព័ន្ធ និងក្រុមបណ្តាញអ្នកសារព័ត៌មានទាំងប្រាំរបស់យើងនោះទេ។ រនាំងនោះនឹងនៅដដែល ហើយនៅតែល្អពិសិដ្ឋជាមួយនឹងនាយកប្រតិបត្តិ ដែលតម្រូវដោយច្បាប់ឲ្យអនុវត្តមុខងារ»។
ឯករាជ្យភាពនៃសារព័ត៌មានរបស់ VOA ក៏ត្រូវបានការពារដោយធម្មនុញ្ញ VOA ដែលជាការអនុវត្តច្បាប់ដែលការពារឯករាជ្យភាព និងសុច្ចរិតភាពនៃការផ្សាយរបស់ស្ថាប័នមួយនេះ។ ធម្មនុញ្ញ VOA ចែងថា៖ «សារព័ត៌មាន VOA នឹងមានភាពត្រឹមត្រូវ មិនលំអៀង និងគ្រប់ជ្រុងជ្រោយ»។
ប៉ុន្តែ តើលោក Trump ជាអ្នកដែលត្រូវបានគេរាយការណ៍ថា ធ្លាប់បាននិយាយលេងសើចអំពីគំនិតចង់បង្កើតបណ្តាញផ្សព្វផ្សាយព័ត៌មានផ្ទាល់ខ្លួននោះ អាចនឹងមានគំនិតចង់ជះឥទ្ធិពលលើសារព័ត៌មានដែលចាក់ផ្សាយដោយប្រព័ន្ធផ្សព្វផ្សាយទទួលការឧបត្ថម្ភទុនពីរដ្ឋាភិបាលសហព័ន្ធនេះដែរឬយ៉ាងណា?
លោកស្រី Moira Whelan អតីតឧបការីរងនៃក្រសួងការបរទេស ទទួលបន្ទុកផ្នែកយុទ្ធសាស្រ្តឌីជីថលបានថ្លែងថា៖ «វាគឺជាគ្រោះថ្នាក់មួយ ហើយខ្ញុំគិតថា យើងគួរតែតាមដានរឿងនេះឲ្យបានដិតដល់។ ការបន់ស្រន់របស់យើងតែម៉្យាង គឺមិនគ្រប់គ្រាន់នោះទេ»។
ប៉ុន្តែលោកស្រី Whelan ដែលបច្ចុប្បន្នធ្វើការជាអ្នកប្រឹក្សាយោបល់ឯករាជ្យផ្នែកទំនាក់ទំនងសម្រាប់ក្រុមអ្នកសិក្សាស្រាវជ្រាវគោលការណ៍នយោបាយ បានគាំទ្រលើការផ្លាស់ប្តូរនេះ។
លោកស្រីបានប្រាប់ VOA ថា៖ «វាជាការងារព័ត៌មាន២៤ម៉ោងក្នុងមួយថ្ងៃ ហើយការសម្រេចចិត្តដោយគណៈកម្មការនេះបានធ្វើឲ្យ (ក្រុមអ្នកផ្សាយព័ត៌មាននៃក្រុមប្រឹក្សាភិបាលនៃការផ្សព្វផ្សាយ BBG) មិនអាចប្រកួតប្រជែងជាមួយនឹងអង្គភាពព័ត៌មានផ្សេងទៀតនៅជុំវិញពិភពលោក»។
លោកស្រីបានចង្អុលបង្ហាញថា វាតែងតែមានហានិភ័យមួយ ដែលប្រធានាធិបតីនីមួយៗ នឹងព្យាយាមកេងយកផលប្រយោជន៍ពីទីភ្នាក់ងារព័ត៌មានរបស់រដ្ឋាភិបាលសហព័ន្ធ ដើម្បីខ្សែបណ្តាញរបស់ខ្លួន។ ក្រោមរចនាសម្ព័ន្ធដឹកនាំថ្មីនេះ លោកស្រី Whelan បានថ្លែងថា វានឹងកាន់តែសំខាន់ជាងនេះទៀតសម្រាប់សភាអាមេរិក ក្នុងការធ្វើឲ្យប្រាកដថា ឯករាជ្យភាពនៃសារព័ត៌មានរបស់ក្រុមប្រឹក្សាភិបាលនៃការផ្សព្វផ្សាយ BBG ត្រូវបានការពារ។
លោកស្រីបានបន្ថែមថា៖ «ហើយខ្ញុំយល់ថា មានមិត្តមួយចំនួនក្នុងសភាដែលចង់ធ្វើឲ្យភាពប្រាកដប្រជាលើបញ្ហានេះ»៕
ប្រែសម្រួលដោយ នៅ វណ្ណារិន