គណៈកម្មាធិការជាតិរៀបចំការបោះឆ្នោតបានអំពាវនាវឲ្យអ្នកសារព័ត៌មានទាំងអស់ផ្សព្វផ្សាយព័ត៌មានពិតពីដំណើរការនៃការចុះឈ្មោះ និងការបោះឆ្នោត ជៀសវាងការផ្សាយដែលបណ្តាលឲ្យមានអំពើហិង្សា។
នៅព្រឹកថ្ងៃសុក្រនេះ គណៈកម្មាធិការជាតិរៀបចំការបោះឆ្នោត (គ.ជ.ប) គាំទ្រដោយទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) បានរៀបចំវគ្គបណ្តុះបណ្តាលដល់អ្នកសារព័ត៌មានស្តីពីការចុះឈ្មោះបោះឆ្នោត ដើម្បីរៀបចំបញ្ជីឈ្មោះបោះឆ្នោតថ្មីឆ្នាំ២០១៦។
ថ្លែងបើកវគ្គបណ្តុះបណ្តាល អនុប្រធានគ.ជ.ប លោក គួយ ប៊ុនរឿន លើកឡើងថា អ្នកសារព័ត៌មានជាបុគ្គលសំខាន់ក្នុងការផ្សព្វផ្សាយព័ត៌មានដល់ប្រជាពលរដ្ឋពាក់ព័ន្ធនឹងការបោះឆ្នោត។ លោកបញ្ជាក់ថា អ្នកសារព័ត៌មានត្រូវមានជំហរអព្យាក្រឹត្យ យុត្តិធម៌ និងត្រឹមត្រូវក្នុងការផ្សព្វផ្សាយព័ត៌មានពាក់ព័ន្ធនឹងដំណើរការចុះឈ្មោះបោះឆ្នោត ទៅតាមច្បាប់និងក្រមសីលធម៌វិជ្ជាជីវៈរបស់ខ្លួន។
លោក គួយ ប៊ុនរឿន មានប្រសាសន៍ថា៖
«ត្រូវផ្សព្វផ្សាយឲ្យបានត្រឹមត្រូវ ច្បាស់លាស់ អំពីពេលវេលា ទីតាំង និងព័ត៌មានទាំងឡាយដែលពាក់ព័ន្ធនឹងដំណើរការចុះឈ្មោះបោះឆ្នោត ត្រូវផ្សព្វផ្សាយព័ត៌មានពិត ដោយមិនត្រូវសរសេរបន្ថែម ឬអត្ថាធិប្បាយបន្ថែមនូវខ្លឹមសារដែលមានចរិតលក្ខណៈញុះញង់ មួលបង្កាច់ រើសអើង ប្រកាន់ពូជសាសន៍ ឬនិន្នាការនយោបាយ ការក្លែងបន្លំនូវសកម្មភាពដែលនាំឲ្យមានការយល់ខុស ឬដែលអាចនាំឲ្យមានអំពើហិង្សា»។
លោក គួយ ប៊ុនរឿន បន្ថែមថា ការផ្សព្វផ្សាយពីដំណើរការនៃការចុះឈ្មោះ និងបោះឆ្នោត នឹងជួយឲ្យពលរដ្ឋយល់ដឹង ទទួលបានព័ត៌មានគ្រប់គ្រាន់ និងមិនខកខានក្នុងការបំពេញកាតព្វកិច្ចជាប្រជាពលរដ្ឋ។
គួរបញ្ជាក់ថា ការចុះឈ្មោះបោះឆ្នោតនឹងត្រូវចាប់ផ្តើមពីថ្ងៃទី១ ខែកញ្ញា រហូតដល់ថ្ងៃទី២៩ ខែវិច្ឆិកា ឆ្នាំ២០១៦។ បើតាមតារាងស្ថិតិប្រជាពលរដ្ឋប៉ាន់ស្មានសម្រាប់ការចុះឈ្មោះបោះឆ្នោត២០១៦របស់ គ.ជ.ប បង្ហាញថា ប្រជាពលរដ្ឋដែលមានអាយុអាចបោះឆ្នោតមានចំនួនជាង៩លានកន្លះ(៩,៦៦៤,២១៦ នាក់)៕