នៅក្នុងសំណុំរឿងដែលអង្គហេតុកើតឡើងកាលពីឆ្នាំ២០១៦ យុវជនម្នាក់ដែលចេញមុខកាលពីពេលថ្មីៗរិះគន់ការចេញបណ្ណស្នាក់អចិន្ត្រៃយ៍សម្រាប់ជនជាតិវៀតណាម និងការបង្កើតដេប៉ាតឺម៉ង់ភាសាវៀតណាមនៅកម្ពុជា ត្រូវបានចាប់ខ្លួនកាលពីថ្ងៃអង្គារ។ ការចាប់ខ្លួននេះត្រូវបានក្រុមសិទ្ធិមនុស្សមើលឃើញថា ជាការបំភិតបំភ័យយុវជនផ្សេងទៀត ដែលសកម្មនឹងបញ្ហាសង្គម។
បើតាមដីកាបង្គាប់ឱ្យចាប់ខ្លួន ចុះថ្ងៃទី៤ ខែតុលា ឆ្នាំ២០២២ ដែលវីអូអេទទួលបាន ចៅក្រមស៊ើបសួរនៃសាលាដំបូងខេត្តកណ្តាល លោក ប្លុង វិសាល បានបង្គាប់ឱ្យចាប់ខ្លួន លោក ធែល ធីលែន អាយុ៣២ឆ្នាំ ហើយសកម្មជនរូបនោះត្រូវបានឃុំខ្លួន កាលពីថ្ងៃអង្គារ។
ដីការបស់តុលាការបញ្ជាក់ថា ជននេះ«ត្រូវដាក់ឱ្យស្ថិតនៅក្រោមការត្រួតពិនិត្យពីបទលួចលក់អចលនទ្រព្យរបស់អ្នកដទៃដែលមិនមែនជារបស់ខ្លួន» ប្រព្រឹត្តនៅភូមិព្រែកដូនហែម ឃុំព្រែកអំពិល ស្រុកខ្សាច់កណ្តាល ខេត្តកណ្តាល កាលពីអំឡុងឆ្នាំ២០១៦ ហើយត្រូវផ្តន្ទាទោសតាមមាត្រា២៥៥នៃច្បាប់ភូមិបាល។
មាត្រា២៥៥នៃច្បាប់ភូមិបាលចែងថា ជនណាដែលបានលួចលក់ ឬលួចបញ្ចាំអចលនវត្ថុ ដែលមិនមែនជារបស់ខ្លួន ត្រូវផ្ដន្ទាទោសដាក់ពន្ធនាគារពី៦ខែដល់៣ឆ្នាំ ដោយមិនគិតដល់ព្យសនកម្ម ដែលបណ្ដាលមកពីអំពើរបស់ខ្លួន។
លោក អ៊ំ ឈុម អាយុ៤១ឆ្នាំ ដែលជាសមាជិកក្នុងក្រុមយុវជនជាមួយលោក ធែល ធីលែន ប្រាប់វីអូអេនៅថ្ងៃពុធថា លោកក៏ត្រូវបានឃាត់ខ្លួន និងចាប់ដាក់ក្នុងរថយន្តជាមួយគ្នាដែរ កាលពីព្រឹកថ្ងៃអង្គារ ម៉ោងជាង១១ ប៉ុន្តែកម្លាំងសមត្ថកិច្ចបានទម្លាក់រូបលោកចុះពីរថយន្តវិញ ប៉ុន្តែលោក ធែល ធីលែន ត្រូវបាននាំខ្លួនបន្តទៀត។
លោកបន្ថែមថា ការចាប់ខ្លួននេះធ្វើឡើងក្រោយពីក្រុមយុវជនបានស្នើសុំធ្វើបាតុកម្មសម្តែងមតិទាក់ទងនឹងការចេញបណ្ណស្នាក់នៅអចិន្ត្រៃយ៍សម្រាប់ជនជាតិវៀតណាម ប៉ុន្តែការស្នើសុំនេះមិនត្រូវបានអនុញ្ញាតដោយសាលារាជធានីភ្នំពេញឡើយ។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ លើកឡើងថា ការចាប់ខ្លួននេះមិនខុសពីការចាប់ខ្លួនយុវជនបរិស្ថានផ្សេងទៀត នៅពេលដែលពួកគេចូលរួមសកម្មភាពក្នុងការងារសង្គម។ លោកចាត់ទុកថា នេះជាទម្រង់មួយនៃការគំរាមកំហែង។
លោកប្រាប់វីអូអេថា៖ «ករណីនេះ គេមើលឃើញគាត់ ដោយសារតែគាត់ចូលរួមសកម្មនៅក្នុងការងារសង្គមហ្នឹង បានមានការចាប់ខ្លួនម្សិលមិញនេះ។ អ៊ីចឹងបើមើលទៅ វាជាការគំរាមកំហែង ការបំភិតបំភ័យ បន្ទុចបង្អាក់នៃសកម្មភាពសង្គមរបស់យុវជនរូបនេះ ក៏ដូចជាយុវជនដែលចូលរួមជាមួយគាត់»។
កាលពីកន្លងទៅ លោក ធែល ធីលែន ក៏បានចេញមុខតវ៉ាប្រឆាំងនឹងការបង្កើតដេប៉ាតឺម៉ង់ភាសាវៀតណាមនៅកម្ពុជាផងដែរ។
លោក សូ សារិន អ្នកនាំពាក្យរបស់សាលាដំបូងខេត្តកណ្តាល ប្រាប់វីអូអេនៅថ្ងៃពុធនេះថា លោក ធែល ធីលែន ត្រូវបានឃាត់ខ្លួន និងឃុំខ្លួនកាលពីថ្ងៃទី៤ ខែតុលា ឆ្នាំ២០២២ ក្នុងសំណុំរឿងដែលប្តឹងដោយភាគីដើមបណ្តឹង ចុះថ្ងៃទី២៨ ខែតុលា ឆ្នាំ២០២០។ លោកបន្ថែមថា សំណុំរឿងស្ថិតក្នុងដំណាក់កាលស៊ើបសួរនៅឡើយ។
នៅពេលសួរថា តើហេតុអ្វីយុវជនរូបនោះទើបត្រូវបានចាប់ខ្លួននាពេលនេះ លោក សូ សារិន បានថ្លែងថា៖ «សម្រាប់ខ្ញុំមិនដឹងថា យ៉ាងណាទេបង សំខាន់បទល្មើសដែលមានការចោទប្រកាន់មកនេះ គឺជាបទល្មើសលួចលក់អចលនវត្ថុរបស់អ្នកដទៃដែលមិនមែនជារបស់ខ្លួន។ អ្វីដែលខ្ញុំអាចផ្តល់ព័ត៌មានជូនបងបាន គឺប៉ុណ្ណឹង»។
លោក ផៃ ធែល អាយុ៥៤ឆ្នាំ ជាឪពុករបស់លោក ធែល ធីលែន ប្រាប់វីអូអេថា លោកបានផ្តល់ដីឱ្យកូនប្រុស និងកូនប្រសា ដែលមានទទឹង១៦,៥ម៉ែត្រ និងបណ្តោយ៥០ម៉ែត្រ ដែលជាដីកេររបស់ម្តាយឪពុក។ លោកបន្ថែមថា ដីនោះនៅមានជម្លោះរវាងរូបលោក និងបងស្រីបង្កើតរបស់លោក ដែលបានប្តឹងលោក ធែល ធីលែន រហូតដល់មានការចាប់ខ្លួនមកដល់ពេលនេះ។ លោកបន្ថែមថា ដីនោះបច្ចុប្បន្នត្រូវបានគ្រប់គ្រងដោយម្ចាស់បំណុលម្នាក់ ដែលកូនប្រុសរបស់លោកបានជំពាក់លុយគេ។
ទោះជាយ៉ាងណា លោកបញ្ជាក់ថា ការចាប់ខ្លួនកូនប្រុសរបស់លោកប្រហែលជាជាប់ពាក់ព័ន្ធនឹងការចេញមុខតវ៉ារបស់កូនប្រុស កាលពីពេលថ្មីៗ។ លោកអំពាវនាវឱ្យតុលាការដោះលែងកូនប្រុសដើម្បីលោកអាចមកជួបជុំគ្រួសារ ដែលមានកូន៣នាក់ក្នុងបន្ទុក។
លោកប្រាប់វីអូអេថា៖ «វាប្រហែល វាអាចពាក់ព័ន្ធខ្លះហើយលោកគ្រូ។ វាមិនអត់ទេ។ វាឱកាសនិយមរឿងហ្នឹង។ វាមិនមែនតែរឿងដីធ្លីប៉ុណ្ណឹងទេ។ ខ្ញុំសូមឱ្យតុលាការហ្នឹងឈរលើអព្យាក្រឹត តុលាការហ្នឹងចេញពីក្រសួងយុត្តិធម៌ដែលមានដងជញ្ជីង»។
គួរបញ្ជាក់ថា កាលពីថ្ងៃទី១៩ ខែកញ្ញា ឆ្នាំ២០២២ យុវជនមួយក្រុមដែលបានលោក ធែល ធីលែន ដែរ បានដាក់ញត្តិទៅក្រសួងមហាផ្ទៃប្រឆាំងនឹងការផ្តល់បណ្ណស្នាក់នៅអចិន្ត្រៃយ៍ឱ្យជនអន្តោប្រវេសន៍វៀតណាមនៅកម្ពុជា។ ពួកគេបានស្នើឱ្យក្រសួងបញ្ឈប់ការផ្តល់បណ្ណស្នាក់នៅអចិន្ត្រៃយ៍ឱ្យជនជាតិវៀតណាម៕