គណបក្សកម្លាំងជាតិ និងក្រុមស្រ្តីថ្ងៃសុក្រ នឹងរៀបចំការជួបជុំសម្តែងមតិ ដោយសន្តិវិធីរួមគ្នា ទាមទារឱ្យដោះលែងថ្នាក់ដឹកនាំគណបក្សកម្លាំងជាតិចំនួន២រូប រួមមានលោក អ៊ុំ វីរៈរដ្ឋ និងលោកមឺ សេងហ៊ ហៅគា វិសាល ដែលត្រូវបានចាប់ខ្លួនដាក់ពន្ធនាគារកាលពីខែមីនាកន្លងទៅ។
ការរៀបចំការជួបជុំសម្តែងមតិ ដោយសន្តិវិធីនេះ នឹងត្រូវធ្វើឡើងរយៈពេល៣ថ្ងៃ គឺចាប់ពីថ្ងៃទី ២២-២៤ ខែមេសា ឆ្នាំ២០២៤ ចាប់ពីម៉ោង៩.០០ព្រឹកដល់ម៉ោង ១១.០០ព្រឹកនៅទីលានប្រជាធិបតេយ្យក្នុងខណ្ឌឫស្សីកែវ រាជធានីភ្នំពេញ។ នេះបើតាមគណបក្សកម្លាំងជាតិ។
ទីប្រឹក្សាគណបក្សកម្លាំងជាតិ និងជាអតីតអនុប្រធានគណបក្សភ្លើងទៀន លោក រ៉ុង ឈុន ប្រាប់វីអូអេនៅថ្ងៃសុក្រនេះថា ការរៀបចំការជួបជុំសម្តែងមតិ ដោយសន្តិវិធីនេះ ធ្វើឡើងដើម្បី ទាមទារឱ្យដោះលែងថ្នាក់ដឹកនាំគណបក្សកម្លាំងជាតិដែលត្រូវបានចាប់ខ្លួនដាក់ពន្ធនាគារយ៉ាងអយុត្តិធម៌ ជាក់ស្តែងដូចករណីលោក អ៊ុំ វីរៈរដ្ឋ និងលោក គា វិសាល។
លោក រ៉ុង ឈុនថ្លែងថា៖«យើងពិនិត្យឃើញថាការឃាត់ខ្លួន ការឃុំខ្លួនគាត់ទាំងពីរនាក់ វាជារឿងអយុត្តិធម៌ ចំពោះគាត់ ពីព្រោះដូចករណី អ៊ុំ វីរៈរដ្ឋ ដែលជារឿងចាស់តាំងពីឆ្នាំ២០១៩ ក៏ត្រូវបានអតីតនាយករដ្ឋមន្ត្រី លើកលែងអស់ហើយ អត់មានយក កាយ មកលើកឡើងនៅពេលនេះបន្តទៅទៀតទេ។ហើយករណី គា វិសាល យើង អាចជជែកសម្របសម្រួល វាមិនមែនឈានទៅដល់នាំយកខ្លួនទៅដាក់ពន្ធនាគារនោះ ទេ»។
សមាជិកគណបក្សកម្លាំងជាតិលោក អ៊ុំ វីរៈរដ្ឋត្រូវបានសមត្ថកិច្ចចាប់ខ្លួន កាលពីថ្ងៃទី៣០ ខែ មីនា ឆ្នាំ២០២៤ ពីបទរួមគំនិតក្បត់ ដែលជាបទចោទពាក់ព័ន្ធនឹងផែនការមាតុភូមិនិវត្តន៍មិនជោគជ័យរបស់មេដឹកនាំនយោបាយជំទាស់លោកសម រង្ស៊ីកាលពីឆ្នាំ២០១៩។
រីឯលោក មឺ សេងហ៊ ហៅ គា វិសាល អនុប្រធានបណ្តោះអាសន្ននៃគណបក្សកម្លាំងជាតិខេត្តកំពង់ចាមត្រូវបានសមត្ថកិច្ចចាប់ខ្លួនពីបទញុះញង់កាលពីពាក់កណ្តាលខែមីនា ចំពោះការបង្ហោះសារលើហ្វេសប៊ុកឈ្មោះKea Visal និយាយអំពីរបបផ្តាច់ការឆ្ពោះទៅប្រជាធិបតេយ្យ។
នៅក្នុងការរៀបចំការសម្តែងមតិនៅពេលខាងមុខនេះ គណបក្សកម្លាំងជាតិបានចេញលិខិតជូនដំណឹងទៅអភិបាលរាជធានីភ្នំពេញ លោកឃួង ស្រេង ថានឹងមានអ្នកចូលរួមចំនួនប្រមាណ១៥០នាក់។ អ្នកតវ៉ានឹងមានការលើកបដា និងរូបថតរបស់អ្នកកំពុងជាប់ពន្ធនាគារគឺលោក អ៊ុំ វីរៈរដ្ឋ និងលោក មឺ សេងហ៊។
វីអូអេពុំទាន់អាចសុំការអត្ថាធិប្បាយពីលោក ឃួង ស្រេង អភិបាលរាជធានីភ្នំពេញ បាននៅឡើយទេ។ ប៉ុន្តែលោក កើត ឆែ អភិបាលរងរាជធានីភ្នំពេញ ប្រាប់វីអូអេតាមប្រព័ន្ធទំនាក់ទំនងតេឡេក្រាមជាអក្សរថា សាលារាជធានីភ្នំពេញ នឹងអញ្ជើញម្ចាស់សំណើមកប្រជុំពិភាក្សាអំពីការជួបជុំនោះ។
បើតាមលោករ៉ុង ឈុន ទោះបីជាខាងអភិបាលរាជធានីភ្នំពេញមិនទាន់ឆ្លើយតបចំពោះការជូនដំណឹងនេះក៏ដោយ ក៏លោកនៅតែរក្សាជំហរក្នុងការទាមទារឱ្យមានការដោះលែងថ្នាក់ដឹកនាំគណបក្សកម្លាំងជាតិរហូតទទួលបានដំណោះស្រាយមួយសមស្រប ជាងការមិនធ្វើអ្វីទាំងអស់។
កាលពីថ្ងៃទី៣ ខែមេសា ឆ្នាំ២០២៤ ក្រុមស្រ្តីថ្ងៃសុក្របាន ចេញសេចក្តីប្រកាសព័ត៌មានចូលរួម និងគាំទ្រទាំងស្រុង ចំពោះការជួបជុំសម្តែងមតិដោយសន្តិវិធី របស់គណបក្សកម្លាំងជាតិ ដោយពួកគេចាត់ទុកថាស្របតាម រដ្ឋធម្មនុញ្ញ ច្បាប់ជាតិ និងអន្តរជាតិនានា។
អ្នកស្រីព្រុំ ចាន់ថា អាយុ៤៦ឆ្នាំ តំណាងក្រុមស្រ្តីថ្ងៃសុក្រ ប្រាប់វីអូអេថា ការចាប់ខ្លួនថ្នាក់ដឹកនាំគណបក្សកម្លាំងជាតិកន្លងមកគឺជា រឿងអយុត្តិធម៌ និងមិនសមហេតុផល។
អ្នកស្រីបន្ថែមថា៖«ខ្ញុំគិតថាបើសិនមានការប្រមូលផ្តុំមួយ ចងក្រងគ្នា វានឹងជាការល្អបំផុតសម្រាប់អ្នកប្រជាធិបតេយ្យ ដោយសារយើងរងអំពើអយុត្តិធម៌រយៈពេល៤០ឆ្នាំហើយ ចង់និយាយអ៊ីចឹង។ឥឡូវមានការចាប់ចងៗហ្នឹង ចាប់ដាក់គុក ដាក់ច្រវ៉ាក់ដោយគ្មានកំហុសសោះ»។
តំណាងក្រុមស្ត្រីថ្ងៃសុក្រនេះជឿថា បើមិនមានការធ្វើបាតុកម្មទាមទារឱ្យមានការដោះលែងសកម្មជននយោបាយដែលជាប់ពន្ធនាគារដោយអយុត្តិធម៌ទាំងអស់នោះទេ គឺនៅថ្ងៃខាងមុខច្បាស់ជាមានការចាប់ខ្លួនអ្នកនយោបាយជំទាស់ដោយអយុត្តិធម៌ជាបន្តទៀតជាក់ជាមិនខានឡើយ៕