នៅពេលតុលាការបានប្រកាសពីជ័យជម្នះផ្លូវច្បាប់ដ៏ធំ ឆ្ពោះទៅរកសមភាពអាពាហ៍ពិពាហ៍ រវាងអ្នកស្រឡាញ់ភេទដូចគ្នា ក្នុងប្រទេសកូរ៉េខាងត្បូង លោក Kim Yong-min ដឹងភ្លាមថា សាលដីកានេះមានអត្ថន័យច្រើន ឬតិចតួចកម្រិតណា។
មិនមានអ្នកណាចោទសួរពីសារៈសំខាន់ជានិម្មិតរូបនៃសាលដីកានេះ ដែលលោក Kim អាយុ ៣២ ឆ្នាំត្រូវបានអនុញ្ញាតឱ្យទទួលបានការការពារក្នុងការធានារ៉ាប់រងសុខភាពថ្នាក់ជាតិរបស់ដៃគូលោកនោះទេ។ នេះជាលើកដំបូងដែលតុលាការកូរ៉េខាងត្បូងទទួលស្គាល់សិទ្ធិសម្រាប់គូស្នេហ៍មានភេទដូចគ្នា។
ប៉ុន្តែ ជោគជ័យនេះមានឥទ្ធិពលតិចតួចខ្លាំងណាស់។
លោកKim បានប្រាប់ VOA ថា ពលរដ្ឋកូរ៉េមានសិទ្ធិប្រមាណ ១.០០០ សិទ្ធិនៅពេលពួកគេរៀបការជាមួយអ្នកណាម្នាក់ដែលមានភេទផ្ទុយគ្នា។ លោកថា លោក និងសហព័ទ្ធរបស់លោកអាចត្រឹមទាមទារយកសិទ្ធិមួយក្នុងចំណោមសិទ្ធិជាច្រើនទាំងនោះ។
ការទទួលបានសិទ្ធិនេះតម្រូវឱ្យមានការតស៊ូផ្នែកច្បាប់រយៈពេល ២ ឆ្នាំសម្រាប់លោក Kim និងស្វាមីរបស់លោក។ គូសេ្នហ៍មួយគូនេះបានរៀបពិធីអាពាហ៍ពិពាហ៍នៅក្នុងឆ្នាំ២០១៩។ ដូចអាពាហ៍ពិពាហ៍របស់គូស្នេហ៍ភេទដូចគ្នាផ្សេងទៀតនៅកូរ៉េខាងត្បូងដែរ អាពាហ៍ពិពាហ៍ពួកគេមិនត្រូវបានទទួលស្គាល់តាមផ្លូវច្បាប់នោះទេ។
រូបឯកសារ៖ គូស្នេហ៍ស្រឡាញ់ភេទដូចគ្នាលោក So Seong-wook (ស្ដាំ) និងលោក Kim Yong-min (ឆ្វេង) ថតរូប selfie នៅទីក្រុងសេអ៊ូល ប្រទេសកូរ៉េខាងត្បូង ថ្ងៃទី ១៨ ខែកុម្ភៈ ឆ្នាំ២០២១។
មួយឆ្នាំក្រោយមក នៅឆ្នាំ ២០២០ ទំនងដោយសារតែបញ្ហាបច្ចេកទេសរបស់ស្មៀនកត់ត្រា លោក So អាចចុះឈ្មោះលោក Kim ជាសហព័ទ្ធនៅក្នុងទីភ្នាក់ងារធានារ៉ាប់រងសុខភាពថ្នាក់ជាតិ (NHIS)។ ប៉ុន្តែបន្ទាប់ពីគេរកឃើញថា គូស្នេហ៍នេះមានភេទដូចគ្នា ទីភ្នាក់ងារ NHIS បានដកការការពារនេះចេញវិញ។
កាលពីថ្ងៃអង្គារ ទី២១ ខែកុម្ភៈ កន្លងទៅនេះ តុលាការជាន់ខ្ពស់ក្នុងទីក្រុងសេអ៊ូលបានតម្រូវឱ្យដាក់បញ្ចូលការធានារ៉ាប់រងសុខភាពលើលោក Kim មកវិញ។ តុលាការនេះថា មិនមានមូលដ្ឋានគ្រប់គ្រាន់ឱ្យទីភ្នាក់ងាររដ្ឋាភិបាលចាត់ទុកអ្នកស្រឡាញ់ភេទដូចគ្នា ខុសពីការរៀបអាពាហ៍ពិពាហ៍ទូទៅតាមច្បាប់នោះទេ។
អ្នកស្រី Lina Yoon នៃអង្គការឃ្លាំមើលសិទ្ធិមនុស្ស Human Rights Watch និយាយថា នេះជាជោគជ័យដ៏ធំសម្រាប់សិទ្ធិអ្នកស្រឡាញ់ភេទដូចគ្នា។
អ្នកស្រីថ្លែងថា៖ «នេះជាករណីដ៏សំខាន់មួយដែលប្រកាន់ខ្ជាប់នូវគោលការណ៍សមភាព និងការមិនរើសអើងដែលត្រូវបានអនុវត្តលើករណីរបស់គូស្នេហ៍ភេទដូចគ្នានេះ។ ឥឡូវយើងមានមូលដ្ឋានផ្លូវច្បាប់ក្នុងការទាមទារឱ្យមានការផ្លាស់ប្តូរច្រើនជាងនេះ»។
ប៉ុន្តែនេះជាការងារដ៏ធំមួយ បើពិចារណាដល់ការរើសអើងដែលមានស្ទើរគ្រប់កន្លែងប្រឆាំងនឹងសហគមន៍អ្នកស្រឡាញ់ភេទដូចគ្នានៅកូរ៉េខាងត្បូង និងសូម្បីដល់ការដាក់ទោសព្រហ្មទណ្ឌលើសហគមន៍អ្នកស្រឡាញ់ភេទដូចគ្នា។
នៅក្រោមបទប្បញ្ញត្តិនៃច្បាប់ព្រហ្មទណ្ឌយោធា ទាហានអាចនឹងត្រូវផ្ដន្ទាទោសជាប់ពន្ធនាគាររហូតដល់២ឆ្នាំ ប្រសិនបើពួកគេពាក់ព័ន្ធនឹងសកម្មភាពផ្លូវភេទដូចគ្នា។
សកម្មជនក៏បានដាក់សម្ពាធដល់រដ្ឋសភាកូរ៉េខាងត្បូងឱ្យអនុម័តច្បាប់ប្រឆាំងការរើសអើងគ្រប់ជ្រុងជ្រោយមួយដែលអាចផ្តល់ការការពារដល់ក្រុមដែលសង្គមមិនសូវខ្វាយខ្វល់ផ្សេងៗគ្នាជាច្រើនក្រុម។ ប៉ុន្តែច្បាប់នេះមិនទាន់អាចធ្វើបាននៅឡើយទេ។
ការមិនទៅមុខនៃច្បាប់នេះ តម្រូវចិត្តក្រុមសាសនាគ្រិស្តជាច្រើន ដែលជាកម្លាំងដ៏សំខាន់នៅក្នុងនយោបាយកូរ៉េខាងត្បូង។
លោក Kim Yong-min និងលោក So Seong-wook ដែលជាគូស្នេហ៍នឹងគ្នា ឈរថតរូបក្នុងសម្លៀកបំពាក់ប្រពៃណីកូរ៉េខាងត្បូង។( Courtesy Kim Yong-min)
លោក Cheun Yun-sung ធ្វើការឱ្យក្រុមអ្នកស្រាវជ្រាវផ្នែកច្បាប់នៃសាសនាគ្រិស្តដែលមានមូលដ្ឋាននៅទីក្រុងសេអ៊ូល។
លោក Cheun ថា សាលដីកានេះមានភាពគ្រោះថ្នាក់ លើសដែនកំណត់របស់ច្បាប់ និងមានភាពហួសហេតុ។ លោកថា លោកសង្ឃឹមថា តុលាការកំពូលនឹងបដិសេធសាលដីកានេះ។ លោកក៏បានថ្លែងថា វាអាចនឹងមានគ្រោះថ្នាក់ក្នុងការសន្និដ្ឋានថា មានការមូលមតិគ្នាក្នុងសង្គមកូរ៉េចំពោះអាពាហ៍ពិពាហ៍របស់គូស្នេហ៍ភេទដូចគ្នា។
ការស្ទង់មតិបង្ហាញថា ពលរដ្ឋកូរ៉េខាងត្បូងភាគច្រើនប្រឆាំងនឹងគំនិតនៃការរៀបការរបស់អ្នកស្រឡាញ់ភេទដូចគ្នា ប៉ុន្តែពួកគេក៏បង្ហាញពីការគាំទ្រខ្លាំងដល់ច្បាប់ប្រឆាំងនឹងការរើសអើងផងដេរ។
អ្នកស្រី Yong Hye-in ជាអ្នកតំណាងរាស្ត្រដែលមានទស្សនៈវឌ្ឍនភាពនិយម។ អ្នកស្រីថា សំឡេងភាគតិចមួយចំនួនតូចទទួលបានការយកចិត្តទុកដាក់ច្រើនដែលមិនសមាមាត្រ។ ប៉ុន្តែបើទោះបីជាពលរដ្ឋកូរ៉េជាច្រើនប្រឆាំងដល់សិទ្ធិរបស់អ្នកស្រឡាញ់ភេទដូចគ្នាក៏ដោយ អ្នកស្រីថា អ្នកតំណាងរាស្ត្រនៅតែមានការទទួលខុសត្រូវក្នុងការការពារជនភាគតិច។
សម្រាប់លោក Kim និងស្វាមីរបស់លោក ពួកគេនឹងសាទរចំពោះជ័យជម្នះផ្លូវច្បាប់របស់ពួកគេនៅប្រទេសអូស្ត្រាលីឯណោះវិញ ដែលជាកន្លែងពួកគេគ្រោងចូលរួមកម្មវិធីរបស់អ្នកស្រឡាញ់ភេទដូចគ្នានៅក្នុងទីក្រុង Sydney (ស៊ីដនី)។
ប៉ុន្តែជ័យជម្នះនេះហាក់មិនទាន់មានភាពពេញលេញនោះទេ។
លោកថា សហគមន៍អ្នកស្រឡាញ់ភេទដូចគ្នាមិនអាចមានធនធានដើម្បីតស៊ូបានយូរដូចនេះសម្រាប់សិទ្ធិពលរដ្ឋនីមួយៗនោះទេ។ លោកថា នៅទីបញ្ចប់ ច្បាប់ស្តីពីអាពាហ៍ពិពាហ៍ភេទដូចគ្នាចាំបាច់ត្រូវតែអនុម័ត៕