ប្រទេសថៃកំពុងអំពាវនាវដល់មន្ត្រីនៅប្រទេសមីយ៉ាន់ម៉ាដែលជាប្រទេសជិតខាងរបស់ខ្លួន ឲ្យទប់ស្កាត់ការតវ៉ាប្រឆាំងនឹងសាលក្រមសម្រេចដាក់ទោសប្រហារជីវិតដ៏ចម្រូងចម្រាស់របស់តុលាការថៃ ដល់កម្មករចំណាកស្រុកមីយ៉ាន់ម៉ាពីរនាក់ កាលពីសប្តាហ៍មុន។
លោក Don Pramudwinai រដ្ឋមន្ត្រីការបរទេសថៃ បានថ្លែងប្រាប់ក្រុមអ្នកយកព័ត៌មាននៅថ្ងៃច័ន្ទនេះថា អាជ្ញាធរថៃកំពុងទាក់ទងគ្នាជាមួយអាជ្ញាធរមីយ៉ាន់ម៉ា នៅពេលដែលការតវ៉ាបានបន្តរីករាលដាលហួសពីរដ្ឋធានីរបស់ប្រទេសមីយ៉ាន់ម៉ានោះ។
កាលពីថ្ងៃព្រហស្បតិ៍សប្តាហ៍មុន តុលាការថៃមួយបានកាត់ទោសកម្មករចំណាកស្រុកមីយ៉ាន់ម៉ាពីរនាក់ ពីបទសម្លាប់ប្តីប្រពន្ធអង់គ្លេសវ័យក្មេងមួយគូរ នៅលើកោះលំហែកាយមួយក្នុងប្រទេសថៃ។
សំណុំរឿងក្តីនេះត្រូវបានរិះគន់ដោយក្រុមអ្នកច្បាប់និងក្រុមសិទ្ធិមនុស្សនៅក្រៅប្រទេសថៃ ដោយសារមានការចោទប្រកាន់ថា ភស្តុតាងដែលគេប្រើប្រាស់ដើម្បីភ្ជាប់ជនសង្ស័យទាំងពីរនាក់ទៅនឹងការសម្លាប់នោះមិនគ្រប់គ្រាន់ ឬទទួលបានដោយភាពមិនត្រឹមត្រូវ។
ចាប់តាំងពីថ្ងៃសៅរ៍មក មានការរាយការណ៍ថា តំបន់ព្រំដែនជាច្រើនរវាងប្រទេសទាំងពីរត្រូវបានបិទ ដោយសារតែការតវ៉ាពីសំណាក់ពលរដ្ឋមីយ៉ាន់ម៉ាដែលមានកំហឹង។
ភិក្ខុ Oakkan Tha ដែលជាព្រះសង្ឃមួយអង្គនិមន្តមកពីវត្ត Rakhine Monastery នៅក្នុងតំបន់ព្រំដែនវត្តបី Three Pagoda Pass បានមានថេរដីការប្រាប់ VOA នៅថ្ងៃច័ន្ទនេះថា ក្រុមអ្នកតវ៉ានឹងនៅតវ៉ានៅទីនោះជារៀងរាល់ថ្ងៃ រហូតទាល់តែកម្មករមីយ៉ាន់ម៉ាទាំងពីរនាក់នោះ ទទួលបានយុត្តិធម៌ហើយត្រូវបានដោះលែងវិញ។
ប្រទេសថៃ ក៏បានឈប់ផ្តល់សេវាកម្មកុងស៊ុលនៅស្ថានទូតរបស់ខ្លួនប្រចាំទីក្រុងយ៉ាំងហ្គោន (Yangon) ដែលជាទីក្រុងធំបំផុតរបស់ប្រទេសមីយ៉ាន់ម៉ាដែរ៕