អ្នកតស៊ូមតិប្រឆាំងអំពើពុករលួយនៅក្នុងប្រទេសកម្ពុជា និយាយថា ការអនុវត្តច្បាប់ប្រឆាំងអំពើពុករលួយនៅក្នុងប្រទេសកម្ពុជា មានស្តង់ដារលើសពីពីរដែលលោកហៅថា «ពហុស្តង់ដារ» ហើយនៅមិនទាន់មានលក្ខណៈម៉ឺងម៉ាត់ពេញលេញនៅឡើយ។ លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា បានថ្លែងបែបនេះនៅក្នុងកម្មវិធី Hello VOA នៅថ្ងៃព្រហស្បតិ៍នេះ ។
Your browser doesn’t support HTML5
Hello VOA៖ ការអនុវត្តច្បាប់ប្រឆាំងអំពើពុករលួយនៅកម្ពុជាមាន«ពហុស្តង់ដារ»
លោកបានថ្លែងថា៖ «សម្រាប់ខ្ញុំ ខ្ញុំយល់ឃើញថា មិនមែនមានស្តង់ដារត្រឹមពីរទេ មានច្រើនជាងពីរ បើយើងមើលពីការអនុវត្តច្បាប់»។
ការលើកឡើងនេះ ធ្វើឡើង ក្រោយពីមានការដោះលែងឲ្យមានសេរីភាពឡើងវិញកាលពីពេលថ្មីៗនេះនូវមន្ត្រីជំនួយការម្នាក់នៃក្រុមប្រឹក្សាអភិវឌ្ឍន៍កម្ពុជា និងមន្ត្រីសាលាក្រុងភ្នំពេញពីរនាក់ទៀត ដែលត្រូវបានរកឃើញថាមានទោសនិងត្រូវបានកាត់ទោសពីបទប្រព្រឹត្តអំពើពុករលួយ ពាក់ព័ន្ធនឹងការទាមទារសំណូក ជាថ្នូរនឹងការបោះត្រាលើឯកសារផ្សេងៗ និងការកិបកេងមូលនិធិសាធារណៈ។
លោក ព្រាប កុល ថ្លែងថា៖
«មានករណីខ្លះ ឧទាហរណ៍ យើងមើលទៅថា ទោសគាត់ធ្ងន់ តែដល់តែគាត់មានខ្នង មានខ្សែ ឬក៏មានលុយអញ្ចឹងទៅ ទោសគាត់ហ្នឹងទៅជាស្រាលទៅវិញ បូកនឹងការព្យួរទោសទៀត ទៅជាអស់ទោសទៅវិញ។ ករណីខ្លះ យើងមើលទៅទោសហ្នឹង ដូចតូចទេ មើលទៅដូចជាស្រាលទេ ប៉ុន្តែដល់កាត់ក្តីហ្នឹង បែរជាជាប់ទោសធ្ងន់ធ្ងរ។ អាហ្នឹងពីរស្តង់ដារហើយ»។
រូបឯកសារ៖ លោក ព្រាប កុល នាយកប្រតិបត្តិនៃអង្គការតម្លាភាពកម្ពុជាចូលរួមពិភាក្សាអំពី«តើយុវជនខ្មែរជំនាន់ក្រោយបានឆ្លងជំងឺពុករលួយដែរឬទេ?» នៅក្នុងកម្មវិធី Hello VOA ប្រចាំខែអំពីការប្រឆាំងអំពើពុករលួយ កាលពីថ្ងៃព្រហស្បតិ៍ទី១២ ខែវិច្ឆិកា ឆ្នាំ២០១៥។
ប៉ុន្តែ លោក ព្រាប កុល ថ្លែងបន្តថា នៅក្នុងការអនុវត្តច្បាប់ប្រឆាំងអំពើពុករលួយនេះ នៅមានស្តង់ដារច្រើនជាងនេះទៀត ជាពិសេស ទាក់ទងនឹងការសម្រេចឃុំខ្លួនបណ្ដោះអាសន្នលើជនត្រូវចោទឬជនជាប់ចោទក្នុងករណីព្រហ្មទណ្ឌខ្លះទៀត។
«អញ្ចឹងទៅ យើងមើលឃើញរូបភាពនៃការអនុវត្តច្បាប់នេះ នៅមានច្រើនស្តង់ដារណាស់។ ខ្ញុំមើលទៅ មិនឃើញពីរទេ ខ្ញុំឃើញពហុស្តង់ដារ»។
អ្នកនាំពាក្យក្រសួងយុត្តិធម៌ម្នាក់ ត្រូវបានស្រង់សម្ដីក្នុងសារព័ត៌មានក្នុងស្រុកកាលពីចុងខែកក្កដាកន្លងទៅ ដោយនិយាយថា ក្នុងស្ថានភាពនៃបទបទល្មើសខ្លះ ចៅក្រមមានទឡ្ហីករណ៍ណាមួយដែលខ្លួនគិតថាអាចសម្រាលទោសដល់ជនល្មើស ហើយអាចសម្រេចឲ្យជននោះនៅក្រៅឃុំបាន បើចៅក្រម យល់ថា ការធ្វើបែបនោះ អាចផ្ដល់ប្រយោជន៍ច្រើនដល់សង្គម។
នៅកម្ពុជា ចៅក្រម មិនត្រូវបានតម្រូវដោយច្បាប់ ឲ្យផ្ដល់ហេតុផលជាលាយលក្ខណ៍អក្សរចំពោះសេចក្ដីសម្រេចរបស់ខ្លួនទៅលើរឿងក្ដីណាមួយទេ៕