បន្ទាប់ពីទទួលបានតំណែងជាបវកញ្ញាលេខពីររបស់សហគមន៍ខ្មែរក្នុងរដ្ឋធានីវ៉ាស៊ីនតោន កញ្ញា ជា ផល្លា កំពុងសំឡឹងមើលម្កុដរបស់បវរកញ្ញាអាស៊ីប៉ាស៊ីហ្វិកប្រចាំនៅសហរដ្ឋអាមេរិកក្នុងឆ្នាំ២០១៥នេះទៀត។
ស្តាប់បទសម្ភាសន៍ VOA ជាមួយ ជា ផល្លា៖
Your browser doesn’t support HTML5
បវរកញ្ញាខ្មែរអាមេរិកាំងសំឡឹងម្កុដអាស៊ីប៉ាស៊ីហ្វិក២០១៥
ការប្រកួតដែលនឹងត្រូវមកដល់នៅថ្ងៃទី៩ ខែតុលាបានជម្រុះបេក្ខជនមកនៅត្រឹមចំនួន១៥នាក់ដែលមានអ្នកចូលរួមប្រកួតមានដើមកំណើតចិន កូរ៉េ វៀតណាម ឥណ្ឌា ហ្វីលីពីន និងខ្មែរ។
កញ្ញា ជា ផល្លា ជានិស្សិតផ្នែកជីវវិទ្យា នៃសាកលវិទ្យាល័យ Virginia Commonwealth ក្នុងរដ្ឋVirginia។ មូលហេតុមនុស្សធម៌បានជំរុញនាងឱ្យចង់ចូលរួមប្រកួតដើម្បីបានជួយដល់កូនខ្មែរក្រីក្រ។
នាងបានបន្ថែមថា៖ «ទៅថ្ងៃអនាគតខ្ញុំចង់ទៅស្រុកខ្មែរដើម្បី ជួយក្មេងៗនៅស្រុកខ្មែរឱ្យទទួលបានសេវាព្យាបាលសុខភាព»។
កញ្ញា ជា ផល្លា បានចូលរៀនរបាំខ្មែរនៅពេលមានអាយុ៤ឆ្នាំ ហើយបាននៅបន្តរាំរបាំខ្មែរអស់រយៈពេល១៥ឆ្នាំហើយ។ នៅក្នុងសាលារបាំរបស់សមាគមរក្សាមរតកខ្មែរនៅសហរដ្ឋអាមេរិក កញ្ញាផល្លា គឺជាអ្នករាំរបាំនាំមុខ និងជាគ្រូជំនួយដែលនាងបានបង្រៀនដល់កូនខ្មែរអាមេរិកាំងជំនាន់ក្រោយជាច្រើននាក់។
នាងបានបន្ថែមពីមូលហេតុដែលនាងនៅបន្តជួយបង្ហាត់របាំថា៖
«វប្បធម៌ខ្មែរមានសារៈសំខាន់ដែលអាចបង្ហាញពីឫសគល់ជាតិសាសន៍មួយ»៕