Your browser doesn’t support HTML5
តើគេអាចវាយតម្លៃការបោះឆ្នោតនេះដូចម្តេច៖ មេរៀនដែលដកស្រង់បានពី ការបោះឆ្នោត២០១៣
រដ្ឋធានីវ៉ាស៊ីនតោន៖ ការបោះឆ្នោតនៅប្រទេសកម្ពុជាបានប្រព្រឹត្តទៅដោយសន្តិភាពប៉ុន្តែនៅមានលេចចេញនូវបាតុភាពមិនសេរីត្រឹមត្រូវតាមផ្នែកមួយចំនួន។ នេះបើតាមការបញ្ជាក់របស់បណ្ឌិតឡៅ ម៉ុងហៃនៅក្នុងកម្មវិធីហេឡូវីអូអេ។
លោកបានបញ្ជាក់ថាកត្តាដែលនាំឱ្យមានសន្តិភាពដោយសារតែអាជ្ញាធរមានសមត្ថកិច្ចបានអនុញ្ញាតឱ្យគណបក្សប្រឆាំងសង្គ្រោះជាតិមានឱកាសធ្វើការឃោសនានិងដាក់ស្លាកសញ្ញាបានដោយមិនមានបញ្ហាអ្វីធំដុំកើតឡើង។ គណបក្សប្រឆាំងក៏បានធ្វើយុទ្ធនាការដោយមិនមានការរំខានអ្វីដែរ។
ប៉ុន្តែលោកសង្កេតឃើញថាមានបញ្ហាដែលមិនត្រឹមត្រូវខ្លះដូចជា គណៈកម្មាធិការជាតិរៀបចំការបោះឆ្នោតមិនឯករាជ្យ ភាពមិនប្រក្រតីកើតមានច្រើនទាក់ទងនឹងការចុះឈ្មោះអ្នកបោះឆ្នោត ការបាត់ឈ្មោះអ្នកបោះឆ្នោត ឈ្មោះ ជាន់គ្នា និងការរាប់សន្លឹកឆ្នោតជាដើម។
លោកបានបន្ថែមថាការរឹតត្បិតសេរីភាពក្នុងការបញ្ចេញមតិ ការទិញសន្លឹកឆ្នោត ការប្រើប្រាស់ទ្រព្យសម្បត្តិរដ្ឋរួមទាំងមន្ត្រីរាជការឱ្យធ្វើការសម្រាប់គណបក្ស និងការគ្រប់គ្រងបណ្តាញឃោសនាដោយគណបក្សតែមួយបានបន្ថែមទៅ ដល់បញ្ហាទាំងអស់នេះ។
លោកបណ្ឌិតឡាវ ម៉ុងហៃបានបញ្ជាក់ថាគ.ជ.បមិនមែនជាអ្នកដោះស្រាយបញ្ហាទេប៉ុន្តែជាផ្នែកមួយនៃបញ្ហាអញ្ចឹងហើយបានជាយើងឃើញមានបញ្ហាទាំងអស់នេះកើតមានឡើង។
លោកបណ្ឌិតឡៅ ម៉ុងហៃអ្នកវិភាគឯករាជ្យម្នាក់ក្នុងប្រទេសកម្ពុជា។
លោកបណ្ឌិតបានបញ្ជាក់បន្ថែមថាកម្ពុជាអាចរៀបចំការបោះឆ្នោតប្រកបដោយសន្តិភាពហើយនៅសល់តែការបោះឆ្នោតដោយសេរីនិងយុត្តិធម៌មួយទៀតប៉ុណ្ណោះដែលត្រូវធ្វើ។ ការយកតាមគំរូយុវជនជាការល្អ៕