ប្រទេសអ៊ុយក្រែនបានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំវិសាមញ្ញមួយដើម្បីឆ្លើយតបចំពោះការប្រកាសរបស់ប្រធានាធិបតីរុស្ស៊ីលោក Vladimir Putin អំពីផែនការដាក់ពង្រាយអាវុធនុយក្លេអ៊ែរកលយុទ្ធនៅក្នុងប្រទេសបេឡារុស។
ក្រសួងការបរទេសអ៊ុយក្រែនបានបញ្ជាក់នៅក្នុងសេចក្ដីថ្លែងការណ៍មួយថា វិធានការរបស់លោក Putin គឺជាការ «បង្កហេតុ» និងធ្វើឱ្យអន្តរាយដល់សន្តិសុខអន្តរជាតិ។
ប្រទេសរុស្ស៊ីអាចបញ្ឈប់វិធានការណាមួយនៅឯក្រុមប្រឹក្សាសន្តិសុខអង្គការសហប្រជាជាតិបានក្នុងនាមជាសមាជិកអចិន្ត្រៃយ៍មួយក្នុងចំណោម ៥ ដែលមានសិទ្ធិបោះឆ្នោតវេតូ។
អ៊ុយក្រែនបានបញ្ជាក់ថា ខ្លួនរំពឹងថានឹងមាន «វិធានការមានប្រសិទ្ធភាព» ពីប្រទេសជាសមាជិកអចិន្ត្រៃយ៍ចំនួន ៤ ទៀតដែលនោះគឺចក្រភពអង់គ្លេស ចិន បារាំង និងសហរដ្ឋអាមេរិក ដោយសារតែប្រទេសទាំងនោះ «មានការទទួលខុសត្រូវចម្បងនៅក្នុងការបង្ការការគំរាមកំហែងបែបគឃ្លើននៃការប្រើអាវុធនុយក្លេអ៊ែរ»។
កាលពីថ្ងៃសៅរ៍ លោក Putin បានប្រកាសដាក់ពង្រាយអាវុធនុយក្លេអ៊ែរកលយុទ្ធនៅបេឡារុស ដោយបាននិយាយថាវាជារឿងត្រឹមត្រូវដោយសារតែក្រុមបស្ចិមប្រទេសបានបង្កើនការគាំទ្រផ្នែកយោធាសម្រាប់កងទ័ពអ៊ុយក្រែន ដែលក្នុងនោះរួមមានទាំងការសម្រេចរបស់ចក្រភពអង់គ្លេសកាលពីសប្ដាហ៍មុននៅក្នុងការបញ្ជូនគ្រាប់កាំភ្លើងដែលអាចទម្លុះរថពាសដែកបានដែលមានផ្ទុកកាកអ៊ុយរ៉ាញ៉ូមទៅឱ្យអ៊ុយក្រែនផងដែរ។
លោក Putin បាននិយាយថា ការដាក់ពង្រាយរបស់រុស្ស៊ីនូវក្បាលគ្រាប់នុយក្លេអ៊ែរកលយុទ្ធនៅក្នុងប្រទេសបេឡារុសគឺមិនខុសពីការដាក់ពង្រាយរបស់សហរដ្ឋអាមេរិកនូវអាវុធនុយក្លេអ៊ែរនៅក្នុងប្រទេសបែលហ្ស៊ិក អាល្លឺម៉ង់ អ៊ីតាលី ហូឡង់ និងតួកគីនោះទេ។
លោក Putin បានបញ្ជាក់ទៀតថា ប្រធានាធិបតីបេឡារុសលោក Alexander Lukashenko បានស្នើជាយូរមកហើយឱ្យមានអាវុធនុយក្លេអ៊ែរនៅក្នុងប្រទេសបេឡារុសដើម្បីទប់ទល់នឹងការគំរាមកំហែងណាមួយដែលអាចកើតឡើងពីអង្គការអូតង់ (NATO) ដែលធ្វើចេញពីសមាជិកអង្គការអូតង់នៅក្បែរបេឡារុស។ ប្រទេសបេឡារុសមានព្រំដែនជាប់ប្រទេស ៣ ដែលជាសមាជិកអង្គការអូតង់ដែលនោះគឺឡេតូនី លីទុយអានី និងប៉ូឡូញ។ រុស្ស៊ីបានប្រើទឹកដីបេឡារុសជាកន្លែងចាប់ផ្ដើមនៅក្នុងការបញ្ជូនទាហានចូលទៅក្នុងអ៊ុយក្រែននៅពេលដែលការឈ្លានពានបានធ្វើឡើងកាលពីខែកុម្ភៈឆ្នាំមុន។
អ្នកនាំពាក្យអង្គការអូតង់អ្នកស្រី Oana Lungescu បាននិយាយថា ការប្រៀបធៀបរបស់រុស្ស៊ីរឿងដាក់ពង្រាយអាវុធនុយក្លេអ៊ែរនៅបេឡារុសជាមួយនឹងការដាក់ពង្រាយដែលធ្វើឡើងដោយសមាជិកអង្គការអូតង់គឺជារឿងដែលនាំឱ្យមានការយល់ខុស និងថា «វោហារសាស្ត្រនុយក្លេអ៊ែររបស់រុស្ស៊ីគឺគ្រោះថ្នាក់និងគ្មានការទទួលខុសត្រូវ»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
អ៊ុយក្រែនស្នើអង្គការសហប្រជាជាតិកោះប្រជុំលើផែនការដាក់អាវុធនុយក្លេអ៊ែររុស្ស៊ីនៅបេឡារុស
រូបឯកសារ៖ ក្រុមអ្នកតំណាងស្មឹងស្មាធិ៍នៅឯក្រុមប្រឹក្សាសន្ដិសុខអង្គការសហប្រជាជាតិដើម្បីរំឭកដល់ខួបមួយឆ្នាំនៃការឈ្លានពានរបស់រុស្ស៊ីលើអ៊ុយក្រែន នៅទីក្រុងញូវយ៉ក សហរដ្ឋអាមេរិក ថ្ងៃទី២៤ ខែកុម្ភៈ ឆ្នាំ២០២៣។