លោករដ្ឋមន្ត្រីការបរទេសស.រ.អា. John Kerry បានមានប្រសាសន៍ថាប្រធានាធិបតីស៊ីរី Bashar al-Assad ត្រូវតែចុះចេញពីតំណែង ក៏ប៉ុន្តែពេលវេលានៃការចាកចេញពីតំណែងរបស់លោកត្រូវតែសម្រេចតាមការចរចាគ្នា។
ថ្លែងនៅក្នុងក្រុងឡុងដ៏នៅក្រោយកិច្ចចរចាជាមួយលោករដ្ឋមន្ត្រីការបរទេសអង់គ្លេស Philip Hammond លោក Kerry បានសុំដល់ប្រទេសរុស្សី និងប្រទេសអ៊ីរ៉ង់ឱ្យប្រើប្រាស់ឥទ្ធិពលរបស់ពួកគេក្នុងប្រទេសស៊ីរីដើម្បីនិយាយបញ្ចុះបញ្ចូលលោក Assad ឱ្យធ្វើការចរចា។
លោក Kerry បានមានប្រសាសន៍ថា «យើងត្រូវតែធ្វើឱ្យមានការចរចាគ្នា។ នេះជាអ្វីដែលយើងស្វែងរកឱ្យមាន ហើយយើងសង្ឃឹមថាប្រទេសរុស្សី និងប្រទេសអ៊ីរ៉ង់ព្រមទាំងប្រទេសឯទៀតៗដែលមានឥទ្ធិពលនឹងជួយធ្វើឱ្យមានកិច្ចចរចាគ្នានេះ ពីព្រោះការកាន់តំណែងរបស់លោក Assad ជាការរារាំងមិនឱ្យវិបត្តិនេះបញ្ចប់បាន។"
នៅក្នុងព្រឹត្តិការណ៍មួយដាច់ដោយឡែក អង្គការមួយឃ្លាំមើលស្ថានភាពនៅក្នុងប្រទេសស៊ីរីបាននិយាយថា ពួកបះបោរឥស្លាមនិយមបានសម្លាប់សមាជិក
៥៦នាក់នៃកងកម្លាំងរដ្ឋាភិបាលស៊ីរីនៅក្នុងខេត្ត Idlib នាប៉ែកពាយ័ព្យប្រទេស។អង្គការ Syrian Observatory for Human Rights មានមូលដ្ឋាននៅក្នុងប្រទេសអង់គ្លេសបាននិយាយកាលពីថ្ងៃសៅរ៍ថា ពួកយុទ្ធជនទាំងនេះរបស់រដ្ឋាភិបាលបានត្រូវបាញ់តាម «បែបប្រហារជីវិត» នៅឯចំណតយន្តហោះយោធា Abu Duhur។ ក្រុមឃ្លាំមើលនេះបានថ្លែងថាការសម្លាប់ទាហានទាំងនេះបានកើតមានឡើងកាលពីដើមសប្តាហ៍នេះក៏ប៉ុន្តែគេត្រូវការពេលបីបួនថ្ងៃដើម្បីបញ្ជាក់អំពីការស្លាប់នៃទាហានទាំងនេះ៕