នាង Ruth Mumbi បានធំធាត់នៅក្នុងតំបន់ Mathare ដែលជាតំបន់នៃលំនៅក្រៅផ្លូវការមួយរបស់ប្រទេសកេនយ៉ា ដែលជាធម្មតាត្រូវបានគេស្គាល់ថា ជាតំបន់អនាធិបតេយ្យ ដែលប្រជាជនក្រីក្រនិងអ្នកដែលមិនមានឯកសារត្រឹមត្រូវរស់នៅ ហើយក៏ជាទីកន្លែងដែលធ្វើឲ្យអ្នករស់នៅទីនោះងាយរងគ្រោះចំពោះការរំលោភបំពាន ដោយសារតែស្ថានភាពផ្លូវច្បាប់របស់ពួកគេ។
ប្អូនថ្លៃរបស់នាង Mumbi គឺលោក Stephen Gichuru បានបាត់បង់ជីវិតដោយសារតែស្ថានភាពនេះ។
នាង Mumbi បាននិយាយថា៖ «Stephen Gichuru មានអាយុ១៧ឆ្នាំនិងជាអ្នកកាយសម្ព័ន្ធ។ ក្រោយមកប្អូនថ្លៃខ្ញុំត្រូវបានធ្វើកំណត់ត្រាដោយប៉ូលិសមួយចំនួន ដែលមានទីស្នាក់ការនៅឯទីស្នាក់ការប៉ូលិស Huruma ថាជាក្មេងទំនើងដែលបានប្លន់ប្រជាជនក្នុងសហគមន៍។ លុះដល់មកព្រឹកថ្ងៃទី១៧ ខែឧសភា ឆ្នាំ២០១៥ ប្អូនថ្លៃរបស់ខ្ញុំបានដើរកាត់មន្ត្រីប៉ូលិសពីរនាក់ ហើយគាត់ត្រូវបានបាញ់សម្លាប់ ដោយប៉ូលិសទាំងពីរនាក់នោះ ទាំងមិនដឹងថា ប្អូនថ្លៃរបស់ខ្ញុំធ្វើអ្វីនៅក្នុងទីក្រុង Kiamaiko ឡើយ ពីព្រោះពួកគេបានព្រមានប្អូនថ្លៃរបស់ខ្ញុំរួចទៅហើយ ឲ្យចាកចេញទៅឲ្យឆ្ងាយពីសហគមន៍»។
លោក Gichuru គឺជាជនរងគ្រោះម្នាក់ក្នុងចំណោមជនរងគ្រោះរាប់រយនាក់ ដែលរងគ្រោះដោយសារអំពើហិង្សាពីសំណាក់ប៉ូលិសនៅក្នុងតំបន់អនាធិបតេយ្យក្នុងប្រទេស កេនយ៉ា។
សកម្មជនសិទ្ធិមនុស្សបាននិយាយថា មនុស្សប្រហែល៨០០នាក់ដែលត្រូវបានសម្លាប់ដោយប៉ូលិសនៅក្នុងអំឡុងពីរឬបីឆ្នាំចុងក្រោយនេះ មិនទាន់ទទួលបានយុត្តិធម៌នៅឡើយទេ។
អ្នកនាំពាក្យរបស់រដ្ឋាភិបាលកេនយ៉ា លោក Eric Karaithe បានចោទសួរលើតួលេខដ៏ខ្ពស់នេះ ប៉ុន្តែលោកទទួលស្គាល់ថាការសម្លាប់ដែលប្រព្រឹត្តដោយប៉ូលិសពិតជាបានកើតឡើងប្រាកដមែន។
លោក Kiraithe បានថ្លែងថា៖ «វាជាការពិតដែលជនសង្ស័យបានស្លាប់ក្នុងដៃប៉ូលិស។ ប៉ុន្តែករណីនីមួយៗគួរតែត្រូវបានដោះស្រាយទៅតាមលក្ខណៈនៃករណីនោះ ដូចជាតួលេខ៨០០នេះ ខ្ញុំមិនធ្លាប់បានឃើញករណីនីមួយៗដែលពួកគេត្រូវបានធ្វើកំណត់ត្រា និងមូលដ្ឋាននៃករណីនីមួយៗឡើយ។ ខ្ញុំមិនចង់បដិសេធតួលេខដែលខ្ញុំមិនអាចមានលទ្ធភាពសាកសួរបានទេ ប៉ុន្តែជាមូលដ្ឋាន ករណីឃាតកម្មនីមួយៗ គួរតែដោះស្រាយទៅតាមលក្ខណៈនៃករណីនោះ។ នេះគឺជាជំហររបស់យើង»។
លោក Gacheke Gachehe ដែលជាស្ថាបនិកនៃមជ្ឈមណ្ឌលយុត្តិធម៌សង្គម Mathareបានថ្លែងថា មជ្ឈមណ្ឌលយុត្តិធម៌សង្គម ស្វះស្វែងក្នុងការបំពេញចន្លោះខ្វះខាតនៃទិន្នន័យ។
លោក Gacheke Gacheke បានថ្លែងថា៖ «យើងសួរខ្លួនឯង ប្រសិនបើយើងមិនធ្វើដូច្នេះ មិនបានមកនៅទីនេះ មិនបានបង្កើតទីស្នាក់ការនៅទីនេះ និងតាំងផ្ទាំងរូបភាពមួយចំនួនទេនោះ ដែលនិយាយថាបញ្ឈប់ការដកប្រជាជនចេញពីសហគមន៍ តើនឹងមានអ្វីកើតឡើង? នេះនឹងក្លាយជាបញ្ហាអចិន្ត្រៃយ៍។ ប្រសិនបើយើងមិនធ្វើសកម្មភាពនោះទេ យើងនឹងបាត់បង់មនុស្សមួយជំនាន់នេះពីតំបន់ Kayole តំបន់ Mathare តំបន់ Dandora និងតំបន់ Kibera តែម្តង»។
របាយការណ៍មួយរបស់មជ្ឈមណ្ឌលយុត្តិធម៌សង្គម Mathare ក្នុងឆ្នាំ២០១៧ បានបញ្ជាក់ថា ប៉ូលិសបានសម្លាប់បុរសចំនួន១៥៦នាក់ ពីចន្លោះខែមករាឆ្នាំ២០១៣ និងខែធ្នូឆ្នាំ២០១៦ នៅក្នុងតំបន់ Mathare។
លោក Kiraithe បាននិយាយថា វាគឺគ្រោះថ្នាក់សម្រាប់ប៉ូលិសនៅក្នុងតំបន់អនាធិបតេយ្យ ដែលមានអត្រាអត់ការងារធ្វើខ្ពស់ អត្រាមិនគោរពច្បាប់ខ្ពស់ និងមានអំពើហិង្សាកើតឡើងជាធម្មតា។
លោក Kiraithe បានថ្លែងទៀតថា៖ «ខ្ញុំអាចប្រាប់អ្នកក្នុងនាមជាមន្ត្រីប៉ូលិសម្នាក់ថា បញ្ហាប្រឈមនៃការល្បាតនៅក្នុងតំបន់របៀបនេះមានច្រើនណាស់។ បញ្ហាអត្រាគ្មានការងារធ្វើ បញ្ហាខ្វះការតាំងទីលំនៅដោយមានរបៀបរៀបរយ បរិយាកាសនេះផ្ទាល់បានធ្វើឲ្យយុវជនមានឥរិយាបថមិនស្របនឹងបទដ្ឋានច្បាប់និងសង្គម ហើយអ្វីដែលយើងបានបណ្តុះបណ្តាលប៉ូលិសឲ្យអនុវត្ត និងស្នើសុំឲ្យពួកគេធ្វើនោះ ទោះជាមានបញ្ហាប្រឈមជាច្រើនក៏ដោយ ក៏ប៉ូលិសត្រូវតែបំពេញភារកិច្ចប្រកបដោយវិជ្ជាជីវៈ»។
មជ្ឈមណ្ឌលយុត្តិធម៌សង្គមជាង១០០ នៅក្នុងតំបន់អនាធិបតេយ្យក្នុងប្រទេស កេនយ៉ា បានទទួលបណ្តឹងតវ៉ាជាច្រើនជារៀងរាល់ថ្ងៃអំពី ការបៀតបៀន ការរំលោភបំពាន និងអំពើពុករលួយ។
មន្ត្រីផ្នែកទំនាក់ទំនងនិងការផ្សព្វផ្សាយ លោក Denis Oketch នៃអាជ្ញាធរត្រួតពិនិត្យប៉ូលិសឯករាជ្យ បាននិយាយថា ពួកគេជួយក្នុងការស៊ើបអង្កេតលើការប្រព្រឹត្តខុសរបស់ប៉ូលិស។
លោក Oketch បានថ្លែងថា៖ «អ្វីដែលក្រុមទាំងអស់នោះធ្វើដែរនោះ គឺពួកគេមានលទ្ធភាពក្នុងការចង្អុលបង្ហាញសាក្សីជាច្រើនឲ្យមកកាន់យើង និងដាក់ពាក្យតវ៉ាជាមួយនឹងយើង នៅពេលដែលបណ្តឹងតវ៉ាដាក់ជូនមក ពីព្រោះក្រុមទាំងនោះនៅថ្នាក់មូលដ្ឋាន ហើយប្រជាជនថ្នាក់មូលដ្ឋានជឿជាក់លើពួកគេ។ ពួកគេមានលទ្ធភាពរាយការណ៍ពីអ្វី ដែលបានកើតឡើងនៅក្នុងដែនយុត្តាធិការរបស់យើង ប៉ុន្តែបន្ទាប់ពីយើងទទួលបានព័ត៌មានទាំងនោះពីពួកគេ យើងនឹងធ្វើការស៊ើបអង្កេតដោយឯករាជ្យមិនចំណុះឲ្យភាគីខាងក្រៅណាមួយឡើយ»។
ប៉ុន្តែយុត្តិធម៌សម្រាប់ប្រជាពលរដ្ឋក្រីក្រនិងអ្នកមិនមានឯកសារគ្រប់គ្រាន់ក្នុងប្រទេសកេនយ៉ា គឺតែងតែមានភាពស្មុគស្មាញ។
នៅក្នុងករណី លោក Stephen Gichuhu អាជ្ញាធរត្រួតពិនិត្យប៉ូលិសឯករាជ្យ បានកំណត់អត្តសញ្ញាណមន្ត្រីប៉ូលិស ដែលខ្លួនជឿជាក់ថាត្រូវតែទទួលខុសត្រូវលើករណីនេះ ប៉ុន្តែករណីមួយនេះបានជាប់គាំងនៅឯការិយាល័យរដ្ឋអាជ្ញាសាធារណៈ ហើយបីឆ្នាំក្រោយមក នៅតែមិនមានកាលបរិច្ឆេទតុលាការណាមួយត្រូវបានកំណត់ឡើយ ហើយមន្ត្រីប៉ូលិសពីររូបនោះនៅតែបំពេញកាតព្វកិច្ចដដែល៕
ប្រែសម្រួលដោយ យូ សុធារី