នៅថ្ងៃចន្ទក្នុងសប្តាហ៍ទី៣ក្នុងខែឧសភានេះ ក្រុមបាតុករតវ៉ាបានប្រមូលផ្តុំគ្នានៅខាងក្រៅគណៈកម្មការតំបន់ និងរៀបចំការបោះឆ្នោតឯករាជ្យកេនយ៉ា នៅរដ្ឋធានីណៃរ៉ូប៊ី ទាមទារឲ្យសមាជិកគណៈកម្មការនេះលាលែងចេញពីមុខតំណែង។ ក្រុមបាតុករតវ៉ាក៏បានកាន់កាប់ប៉ែកបស្ចិមប្រទេសផងដែរ។
ក្រុមបាតុករតវ៉ា ដែលភាគច្រើនជាអ្នកគាំទ្រសម្ព័ន្ធគណបក្សប្រឆាំងហៅកាត់ថា CORD បានចោទប្រកាន់គណៈកម្មការតំបន់ និងរៀបចំការបោះឆ្នោតឯករាជ្យ ហៅកាត់ថា IEBC ថាបានជួយសម្ព័ន្ធគណបក្ស Jubilee ដែលកំពុងដឹកនាំប្រទេស។ ក្រុមបាតុករតវ៉ា បាននិយាយថា គណៈកម្មការអសមត្ថភាពក្នុងការធ្វើឲ្យមានការបោះឆ្នោតដោយសេរី យុត្តិធម៌ និងតម្លាភាព។
សមាជិកព្រឹទ្ធសភាមួយរូបមកពីសម្ព័ន្ធគណបក្សប្រឆាំង CORD លោក James Orengo បានដឹកនាំហ្វូងបាតុករតវ៉ា និងបានស្រែកថា «គ្មានកំណែទម្រង់ គ្មានការបោះឆ្នោត»។ លោកបានបន្ថែមថា នឹងមិនមានការបោះឆ្នោតដោយយុត្តិធម៌ដែលរៀបចំដោយគណៈកម្មការរៀបចំការបោះឆ្នោតក្នុងពេលបច្ចុប្បន្ននេះទេ។
«ដូច្នេះ យើងទាមទារឲ្យមានភាពច្បាស់លាស់ថា ប្រសិនបើមានការបោះឆ្នោត នោះការបោះឆ្នោតត្រូវធ្វើឡើងតាមការកំណត់ក្នុងរដ្ឋធម្មនុញ្ញកេនយ៉ា ដែលបានចែងថា ការបោះឆ្នោតត្រូវប្រព្រឹត្តទៅដោយសេរី និងយុត្តិធម៌។ ការបោះឆ្នោតនោះ គឺជាការបោះឆ្នោត ដែលមានការរាប់សន្លឹកឆ្នោតទាំងអស់ ហើយអ្នកបោះឆ្នោតទាំងអស់មានឱកាសក្នុងការចុះឈ្មោះបោះឆ្នោត»។
បាតុកម្មនាថ្ងៃទី១៦ ខែឧសភា មិនបានឈានទៅដល់ការសម្តែងមតិឡើយ ពីព្រោះក្រុមប៉ូលិសបានបាញ់ឧស្ម័នបង្ហូរទឹកភ្នែក និងបាញ់ទឹកបំបែកហ្វូងបាតុករតវ៉ា។
លោក Orengo និយាយថា បាតុករតវ៉ាម្នាក់ ដែលលោកបានអមនាំយកទៅមន្ទីរពេទ្យ ត្រូវបានប៉ូលិសបាញ់ដោយគ្រាប់កាំភ្លើងពិត។
សាក្សីម្នាក់ឈ្មោះ Ali Hassan ដែលជាម្ចាស់ភោជនីយដ្ឋានមួយនៅក្បែរអគារគណៈកម្មការនេះ បាននិយាយថា គាត់រងគ្រោះ ដោយសារតែការប៉ះទង្គិចគ្នារវាងក្រុមបាតុករតវ៉ា និងក្រុមប៉ូលិស។
«ក្រុមបាតុករតវ៉ាបានសម្រុកចូលក្នុងភោជនីយដ្ឋានខ្ញុំ ពួកគេបានវាយបំផ្លាញរបស់របរនានា។ ក្រុមប៉ូលិសបានតម្រង់បាញ់ឧស្ម័នបង្ហូរទឹកភ្នែកចូលក្នុងភោជនីយដ្ឋាន និងក្នុងចង្រ្កានបាយ»។
លោក Orengo បានបដិសេធលើការណ៍ដែលនិយាយថា ក្រុមបាតុករតវ៉ាគ្មានសណ្តាប់ធ្នាប់។
«មិនអញ្ជឹងទេ វាជារឿងប្រជាភិថុត ជារឿងប្រជាភិថុត។ បាតុករតវ៉ាទាំងអស់ ក្រុមយើងទាំងអស់គ្នាកាន់តែមែកឈើ បាតុករតវ៉ាទាំងអស់ត្រូវបានប្រាប់ឲ្យកាន់មែកឈើ ឬកាន់កន្សែងដៃ»។
លោក Orengo និយាយថា ក្រុមបាតុករតវ៉ានឹងបន្តធ្វើការតវ៉ារៀងរាល់ថ្ងៃច័ន្ទ រហូតដល់រដ្ឋាភិបាលសម្រេចចិត្តមកអង្គុយជាមួយនឹងក្រុមប្រឆាំង និងផ្តើមជជែកពិភាក្សាអំពីដំណើរការនៃការបោះឆ្នោត។
ប្រទេសកេនយ៉ា គ្រោងនឹងរៀបចំការបោះឆ្នោតជ្រើសរើសប្រធានាធិបតី និងសមាជិករដ្ឋសភានៅខែសីហា ឆ្នាំ២០១៧ខាងមុខ៕
ប្រែសម្រួលដោយ កោះ សុគន្ធី