មេធាវីការពារក្តីឱ្យអតីតមេដឹកនាំគណបក្សជំទាស់ លោក កឹម សុខា ជំរុញឱ្យសាលាឧទ្ធរណ៍ពន្លឿនការបើកសវនាការលើបណ្តឹងមិនសុខចិត្តនឹងការសម្រេចរបស់សាលាដំបូង ដែលបានកាត់ទោសឱ្យលោកជាប់ឃុំរយៈពេល២៧ឆ្នាំ ពីបទក្បត់ជាតិ។
អ្នកស្រី ម៉េង សុភាវី មេធាវីការពារក្តីរបស់លោក កឹម សុខា ប្រាប់វីអូអេនៅថ្ងៃទី ១០ ខែសីហានេះថា តុលាការគួរបើកសវនាការមួយដែលត្រឹមត្រូវ និងយុត្តិធម៌ជូនកូនក្តីរបស់អ្នកស្រី ដែលកំពុងជាប់ឃុំក្នុងផ្ទះ។
អ្នកស្រីប្រាប់វីអូអេតាមប្រព័ន្ធទំនាក់ទំនងតេឡេក្រាមថា៖ «ខ្ញុំយល់ថា ឯកឧត្តម កឹម សុខា មិនបានប្រព្រឹត្តបទឧក្រិដ្ឋអ្វីទេ ហើយគាត់គួរតែរួចខ្លួនពីបទចោទតាមរយៈសវនាការមួយដែលប្រព្រឹត្តក្នុងពេលវេលាដែលឆាប់រហ័ស»។
សាលាដំបូងរាជធានីភ្នំពេញកាលពីថ្ងៃទី ៣ ខែមីនា ឆ្នាំ ២០២៣ បានផ្តន្ទាទោសលោក កឹម សុខា ដាក់ឱ្យជាប់ឃុំរយៈពេល ២៧ ឆ្នាំ ពីបទសន្ទិដ្ឋិភាពជាមួយបរទេស ឬឃុបឃិតត្រូវរ៉ូវគ្នាជាមួយបរទេស ដែលត្រូវបានចោទប្រកាន់តាំងពីឆ្នាំ ២០១៧។ តុលាការបានដាក់បម្រាមមិនឱ្យលោក កឹម សុខា ធ្វើនយោបាយ មិនឱ្យចេញពីផ្ទះ និងមិនអនុញ្ញាតឱ្យជួបជនបរទេស លើកលែងតែមានការអនុញ្ញាតពីតុលាការ។
បើតាមអ្នកស្រី ម៉េង សុភាវី មេធាវីការពារក្តីរបស់លោក កឹម សុខា បានដាក់បណ្តឹងឧទ្ធរណ៍ប្តឹងទាស់សាលក្រមសាលាដំបូងតាំងពីថ្ងៃទី ៣០ ខែមីនា ប៉ុន្តែមកទល់ពេលនេះមិនទាន់ទទួលបានព័ត៌មានជុំវិញការបើកសវនាការលើបណ្តឹងនេះឡើយ។
លោក ឃុន លាងម៉េង អ្នកនាំពាក្យសាលាឧទ្ធរណ៍ប្រាប់វីអូអេយ៉ាងខ្លីតាមទូរស័ព្ទថា៖ «ចាំស្អែកបានខ្ញុំបញ្ជាក់គាត់បាន អត់ដឹងគាត់ [មេធាវីលោក កឹម សុខា] ដាក់តាំងពីពេលណា»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូអេថា តាមនីតិវិធីតុលាការ ការពន្យាពេលបើកសវនាការរបស់ជនជាប់ចោទតែងតែជះផលប៉ះពាល់ដល់ភាពសិទ្ធិ និងសេរីភាពរបស់ពួកគេ។ លោកថា បើតាមបទដ្ឋានអន្តរជាតិ ជនជាប់ចោទគួរតែទទួលបានជំនុំជម្រះមួយដោយយុតិ្តធម៌ និងស្មើភាពគ្នាចំពោះមុខច្បាប់។
លោកថ្លែងថា៖ «ក្នុងន័យហ្នឹងគឺគេចង់ធ្វើម៉េចដំណើរការនីតិវិធីឱ្យបានលឿនដើម្បីកុំឱ្យជាការប៉ះពាល់សិទ្ធិនៃជនជាប់ចោទ លុះត្រាប្រសិនជាគាត់រកឃើញគាត់មិនមានកំហុស ហើយគាត់ត្រូវបានលើកលែងចោទប្រកាន់ អ៊ីចឹងប្រសិនបើការឃុំខ្លួនគាត់យូរ ឬក៏ដំណើរការភាគីហ្នឹងយូរ វាប៉ះពាល់ទៅដល់សេរីភាព ក៏ដូចជាសិទ្ធិរបស់ជនជាប់ចោទ»។
ក្រោយលោក កឹម សុខា ត្រូវបានកាត់ទោសកាលពីថ្ងៃទី ៣ ខែមីនា ឆ្នាំ ២០២៣ បណ្តាប្រទេសប្រជាធិបតេយ្យធំៗ និងអង្គការសិទ្ធិមនុស្សអន្តរជាតិមួយចំនួន បានថ្កោលទោសការផ្តន្ទាទោសនោះ ថាមានចេតនារុញអ្នកនយោបាយជំទាស់ចាស់វស្សារូបនេះឱ្យនៅឆ្ងាយពីឆាកនយោបាយកម្ពុជា ហើយថា ការផ្តន្ទាទោសដ៏ធ្ងន់នេះ ក៏បានបង្ហាញតម្រុយនៃការធ្វើឱ្យប៉ះពាល់ដល់ភាពត្រឹមត្រូវនៃដំណើរការរៀបចំការបោះឆ្នោតជាតិ ដែលបានប្រព្រឹត្តទៅកាលពីថ្ងៃទី២៣ ខែកក្កដា នេះផងដែរ៕