អតីតអ្នកសារព័ត៌មានអាស៊ីសេរី ដែលកំពុងជាប់ឃុំ នៅថ្ងៃសុក្រនេះ លើកឡើងថា ការសម្រេចមិនអនុញ្ញាតឲ្យលោកបាននៅក្រៅឃុំ គឺជាការសងសឹក និងបំបាក់ស្មារតីអតីតអ្នកសារព័ត៌មានដែលហ៊ានរាយការណ៍ពីភាពអវិជ្ជាមានរបស់រដ្ឋាភិបាលលោក ហ៊ុន សែន។
ការលើកឡើងរបស់អតីតអ្នកសារព័ត៌មានអាស៊ីសេរីនេះធ្វើឡើង ក្រោយតុលាការកំពូលបញ្ចប់សវនាការ និងសម្រេចបន្តឃុំខ្លួនអតីតអ្នកសារព័ត៌មានវិទ្យុអាស៊ីសេរីពីររូប គឺលោក យាង សុធារិន ហៅ យាង សុជាមេត្តា និងលោក អ៊ួន ឈិន។ អ្នកសារព័ត៌មានទាំងពីរនេះត្រូវបានអាជ្ញាធរចាប់ខ្លួន និងចោទប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទ៍ដែលអាចធ្វើឲ្យអន្តរាយដល់ការការពារជាតិ ដោយផ្តល់ព័ត៌មានដល់វិទ្យុអាស៊ីសេរី។
ខណៈកំពុងត្រូវបានសមត្ថកិច្ចបណ្តើរចូលរថយន្តដើម្បីដឹកទៅឃុំខ្លួនក្នុងពន្ធនាគារព្រៃសវិញ លោក យាង សុធារិន ហៅ យាង សុជាមេត្តា អតីតអ្នកសារព័ត៌មានរបស់វិទ្យុអាស៊ីសេរីមួយរូប ថ្លែងប្រាប់អ្នកសារព័ត៌មានថា ការសម្រេចរបស់តុលាការ មានភាពអយុត្តិធម៌ ដោយថា ពួកគេមិនបានប្រព្រឹត្តបទល្មើស និងមិនបានបង្កព្យសនកម្មណាមួយទេ។ លោកបន្ថែមថា ការសម្រេចរបស់តុលាការគឺជាការសងសឹកលោក និងលោក អ៊ួន ឈិន ជាអតីតអ្នកសារព័ត៌មានរបស់វិទ្យុអាស៊ីសេរី។
មុនពេលសមត្ថកិច្ចរុញចូលក្នុងរថយន្តពន្ធនាគារ លោកបញ្ជាក់ក្នុងសម្រង់ន័យដើមថា៖
«ការសម្រេចមានចេតនាបំបាក់ស្មារតី ជាការគំរាមកំហែង និងសងសឹកអតីតអ្នកកាសែតដែលហ៊ានវាយប្រហារភាពអវិជ្ជមានរបស់រដ្ឋាភិបាល»។
មុននឹងថ្លែងប្រាប់អ្នកសារព័ត៌មាន លោក យាង សុធារិន ក៏បាននិយាយទៅកាន់កូនតូចៗស្រីប្រុស២នាក់របស់លោក ដែលមានអាយុ៤-៥ ឆ្នាំដែលកំពុងរងចាំលោកនៅខាងក្រៅបន្ទប់សវនាការនាពេលនោះ។ លោកនិយាយថា៖ «គេអត់ឲ្យប៉ាឈប់ទេ ប៉ាត្រូវទៅរៀនតទៀត»។
លោក អ៊ួន ឈិន និងលោក យាង សុធារិន ហៅយាង សុជាមេត្តា ដែលជាអតីតអ្នកយកព័ត៌មានរបស់វិទ្យុអាស៊ីសេរី ត្រូវបានអាជ្ញាធរចាប់ខ្លួន និងចោទប្រកាន់កាលពីខែវិច្ឆិកា ឆ្នាំ២០១៧ ពីបទប្រគល់ឲ្យរដ្ឋបរទេសនូវព័ត៌មាន ជាអាទ៍ដែលអាចធ្វើឲ្យអន្តរាយដល់ការការពារជាតិ តាមមាត្រា៤៤៥នៃក្រមព្រហ្មទណ្ឌកម្ពុជា។
ពួកគេត្រូវបានចោទថា បានបន្តលួចផ្តល់ព័ត៌មានដល់វិទ្យុអាស៊ីសេរី ក្រោយពីវិទ្យុនេះបានប្រកាសបិទការិយាល័យរបស់ខ្លួនក្នុងរាជធានីភ្នំពេញ កាលពីដើមខែកញ្ញា ឆ្នាំមុន ដោយវិទ្យុនេះបញ្ជាក់ថា ការសម្រេចបិទការិយាល័យរបស់ខ្លួនទាំងបង្ខំនាពេលនោះ គឺដោយសាររងគំនាបពីរដ្ឋាភិបាលកម្ពុជា។ អ្នកទាំងពីរអាចប្រឈមមុខជាប់ពន្ធនាគារពី៧ ដល់១៥ឆ្នាំ ប្រសិនបើតុលាការរកឃើញថា មានទោស។
រហូតមកដល់ពេលនេះ អ្នកទាំងពីរកំពុងត្រូវបានឃុំខ្លួនក្នុងពន្ធនាគាររយៈពេលជាង៤ខែមកហើយ។
ក្នុងបន្ទប់សវនាការដែលមានការចូលរួមពីអ្នកទាំងពីរ មេធាវីការពារក្តី ព្រមទាំងមន្រ្តីការពារសិទ្ធិមនុស្សមួយចំនួនផង លោក យាង សុធារិន និងលោក អ៊ួន ឈិន សុទ្ធតែបាននិយាយដូចគ្នាថា ពួកគេបានឈប់បម្រើការងារឲ្យអាស៊ីសេរី ចាប់តាំងពីវិទ្យុមួយនេះបិទ កាលពីដើមខែកញ្ញា ឆ្នាំ២០១៧។ ពួកគេបន្ថែមថា ពួកគេមិនបានបន្តរាយការណ៍ព័ត៌មានឲ្យវិទ្យុអាស៊ីសេរីនោះទេ ហើយពួកគេសុំនៅក្រៅឃុំដើម្បីមើលថែទាំគ្រួសារ និងកូនតូចៗរបស់ពួកគេ ដោយមានដាក់លិខិតឆ្លងដែនធានាថា ពួកគេនឹងមិនរត់គេច និងសន្យាថា នឹងសហការគ្រប់នីតិវិធីរបស់តុលាការ។
ក្រោយសវនាការរយៈពេលជិត១ម៉ោង ក្រុមប្រឹក្សាអង្គជំនុំជម្រះតុលាការកំពូល ដែលមានលោក សឹង បញ្ញាវុឌ្ឍ ជាប្រធាន បានប្រកាសតម្កល់សាលដីកាសាលាឧទ្ធរណ៍ទុកជាបានការ និងសម្រេចឲ្យអតីតអ្នកសារព័ត៌មានអាស៊ីសេរីទាំងពីររូបស្ថិតនៅក្នុងការឃុំខ្លួន ដោយលើកមូលហេតុថា ការកាត់ក្តីរបស់សាលាដំបូងរាជធានីភ្នំពេញ និងសាលាឧទ្ធរណ៍មានភាពត្រឹមត្រូវតាមច្បាប់ និងថា ការបន្តឃុំខ្លួនអ្នកទាំងពីរគឺដើម្បីបញ្ចប់បទល្មើស និងបង្ការកុំឲ្យមានភាពអសន្តិសុខ និងការខូចខាតធ្ងន់ធ្ងរកើតឡើង។
លោក សឹង បញ្ញាវុឌ្ឍ បានប្រកាសសាលដីកាក្នុងន័យដើមយ៉ាងដូច្នេះ៖
«បណ្តឹងសារទុក្ខរបស់មេធាវីពុំមានមូលហេតុត្រឹមត្រូវ [...] បដិសេធបណ្តឹងសារទុក្ខរបស់មេធាវីឈ្មោះ កែវ វន្នី មេធាវីការពារក្តីឲ្យជនចាប់ចោទ។ តម្កល់សាលដីកាសាលាឧទ្ធរណ៍ទុកជាបានការ»។
លោក កែវ វ៉ាន្នី មេធាវីការពារក្តីឲ្យលោក យាង សុធារិន និងលោក អ៊ួន ឈិន ថ្លែងប្រាប់អ្នកសារព័ត៌មាននៅខាងក្រៅបរិវេណតុលាការ ក្រោយបញ្ចប់សវនាការនោះថា ការសម្រេចរបស់តុលាការជាការសម្រេចដែលមិនអាចទទួលយកបាន និងថា តុលាការមិនមានអំណះអំណាងណាមួយក្នុងការដាក់បន្ទុកលើកូនក្តីរបស់លោកនោះទេ។
លោកមានប្រសាសន៍ថា៖
«ខ្ញុំមិនអាចទទួលយកបានទេ ដោយសារតែគ្រាន់តែជាការយល់ឃើញរបស់គាត់ អត់មានអីអំណះអំណាងដើម្បីគាំទ្រនូវសំអាងហេតុយល់ឃើញរបស់គាត់។ គាត់ថា ចង់ឲ្យបញ្ចប់បទល្មើស កុំឲ្យបទល្មើសកើតឡើងជាថ្មី ព្យសនកម្មធ្ងន់ធ្ងរ កុំឲ្យត្រូវរ៉ូវគ្នារវាងជនត្រូវចោទ និងអ្នកផ្សេង។ ប៉ុន្តែអ្វីៗវាខុសពីការណ៍ពិតទាំងអស់ ។ វាមិនដូចជាអ្វីដែលគាត់យល់ឃើញអញ្ចឹងទេ។ ហើយខាងគាត់អត់មានអីបង្ហាញមូលដ្ឋានទេ បែរជាគាត់យល់ឃើញថា ការលើកអំណះអំណាងរបស់មេធាវីអត់មានមូលដ្ឋានទៅវិញ»។
លោក អ៊ុក គឹមសិទ្ធិ អគ្គព្រះរាជអាជ្ញាអមតុលាការកំពូលប្រាប់ VOA ថា តុលាការសម្រេចសេចក្តីទៅតាមច្បាប់ដែលបានកំណត់។
លោកមានប្រសាសន៍ថា៖
«តុលាការគាត់សម្រេចទៅតាមអ្វីដែលច្បាប់បានកំណត់ គឺទាក់ទិននឹងអង្គហេតុអង្គច្បាប់ អីចឹងវាមិនទាក់ទិននឹងអ្វីដែលគាត់លើកឡើងទេ។ ការលើកឡើងរបស់គាត់គឺជាសិទ្ធិរបស់គាត់»។
លោក ស៊ឹង សែនករុណា មន្រ្តីផ្នែកអង្កេតនៃសមាគមការពារសិទ្ធិមនុស្សអាដហុក ដែលបានចូលរួមឃ្លាំមើលសវនាការនោះ ប្រាប់អ្នកសារព័ត៌មានថា ការសម្រេចរបស់តុលាការក្នុងការបន្តឃុំខ្លួនអ្នកទាំងពីរជាការសម្រេចដែលមិនសមហេតុផល និងធ្វើឲ្យប៉ះពាល់យ៉ាងធ្ងន់ធ្ងរដល់សិទ្ធិរបស់ជនត្រូវចោទ។ លោកបន្ថែមថា ការសម្រេចនេះបង្ហាញថាប្រព័ន្ធតុលាការមានភាពខ្សាយ និងធ្វើឲ្យជំនឿលើផ្លូវច្បាប់របស់ប្រជាពលរដ្ឋត្រូវធ្លាក់ចុះ។
លោក ស៊ឹង សែនករុណា បញ្ជាក់ថា៖
«យើងដឹងហើយថា រាល់ករណីដែលពាក់ព័ន្ធទៅនឹងករណីអ្នកដែលមានមនសិការការងារដូចពួកគាត់អីចឹង យើងដឹងហើយថា ពិបាកណាស់។ ហើយដូចខ្ញុំបានលើកឡើងអីចឹង វាមិនចម្លែកទេ។ បើចម្លែកគឺការដោះលែងនោះទេ។ ដូច្នេះយើងឃើញហើយ វាមិនមានការដោះលែងពួកគាត់ទេ។ ហើយករណីបែបនេះយើងបង្ហាញថា កាលណាច្បាប់មានចែង ហើយមិនមានភស្តុតាងគាំទ្រ ហើយយកច្បាប់ហ្នឹងមកចោទទៅលើជនដែលត្រូវចោទដោយគ្មានភស្តុតាងគ្រប់គ្រាន់អីចឹង វាប៉ះពាល់ដល់សិទ្ធិសេរីភាពរបស់ប្រជាពលរដ្ឋហើយ»។
ក្រោយការចាប់ឃុំខ្លួន និងចោទប្រកាន់អ្នកទាំងពីរ គេឃើញបណ្តុំអង្គការការពារអ្នកកាសែតទាំងជាតិ និងអន្តរជាតិមួយចំនួន បានហៅការឃុំខ្លួនអតីតអ្នកយកព័ត៌មានអាស៊ីសេរីទាំងពីររូបថា ជាទង្វើ «ដ៏ឃោរឃៅ និងមិនសមហេតុផល» ផ្ទុយពីការប្តេជ្ញាចិត្តរបស់កម្ពុជាក្នុងការធានាសិទ្ធិសេរីភាពក្នុងការបញ្ចេញមតិ ដូចដែលបានចែងក្នុងរដ្ឋធម្មនុញ្ញកម្ពុជា។
ចំណែកក្រុមអ្នកសារព័ត៌មានជាតិ និងអន្តរជាតិដែលកំពុងធ្វើការក្នុងប្រទេសកម្ពុជាប្រមាណជា៥០នាក់ ក៏បានផ្តិតមេដៃលើញត្តិទាមទារឲ្យមានការទម្លាក់បទចោទលើអ្នកទាំងពីរផងដែរ៕