ការវាយប្រហារតាមអាកាសរបស់អ៊ីស្រាអែលកាលពីថ្ងៃសៅរ៍បានធ្វើឱ្យជនស៊ីវិលដែលភៀសខ្លួនពីផ្ទះសម្បែងរាប់សិបនាក់ស្លាប់និងរងរបួស ដែលក្នុងនោះរួមមានទាំងមនុស្សម្នាក់នៅក្នុងបរិវេណសាលារៀនមួយកន្លែងនៅក្នុងជំរំជនភៀសខ្លួន Jabaliya នៅភាគខាងជើងតំបន់ហ្កាហ្សា (Gaza) ផងដែរ។ នេះបើយោងតាមការរាយការណ៍របស់ទីភ្នាក់ងារជំនួយនិងកិច្ចការអង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់មជ្ឈិមបូព៌ា (UNRWA)។
លោក Ahmed Radwan ដែលរងរបួសនៅក្នុងការវាយប្រហារនេះបានប្រាប់ទីភ្នាក់ងារសារព័ត៌មាន AP តាមទូរស័ព្ទអំពីការវាយប្រហាររបស់អ៊ីស្រាអែលលើសាលារៀន Fakhoura នៅក្នុងជំរំជនភៀសខ្លួន Jabaliya ថា៖ «ទិដ្ឋភាពគឺគួរឱ្យរន្ធត់។ មានសាកសពស្ត្រីនិងកុមារនៅលើដី។ អ្នកផ្សេងទៀតស្រែករកជំនួយ»។
រូបភាពរបស់ទីភ្នាក់ងារសារព័ត៌មាន AP អំពីមន្ទីរពេទ្យមូលដ្ឋានមួយកន្លែងបានបង្ហាញថា សាកសពជាង ២០ នាក់ត្រូវបានរុំដោយក្រណាត់ប្រឡាក់សុទ្ធតែឈាម។
អគ្គស្នងការទីភ្នាក់ងារ UNRWA លោក Philippe Lazzarini បានបង្ហោះសារនៅលើប្រព័ន្ធផ្សព្វផ្សាយសង្គមអនឡាញ X កាលពីព្រឹកថ្ងៃសៅរ៍ថា៖ «ការវាយប្រហារទាំងនេះគឺមិនអាចក្លាយជារឿងធម្មតាបានទេ។ វាត្រូវតែបញ្ចប់។ កិច្ចឈប់បាញ់គ្នាដើម្បីមនុស្សធម៌មិនអាចបង្អង់យូរទៀតបានទេ»។
យោធាអ៊ីស្រាអែលបានឆ្លើយតបដោយនិយាយថាទាហានរបស់ខ្លួនធ្វើសកម្មភាពនៅក្នុងតំបន់ជំរំ Jabaliya «ក្នុងគោលបំណងវាយប្រហារលើពួកភេរវករ» តែប៉ុណ្ណោះ ហើយព្យាយាមធ្វើយ៉ាងណាកុំឱ្យមានគ្រោះថ្នាក់ច្រើនដល់ជនស៊ីវិល។
កាលពីថ្ងៃសៅរ៍ យោធាអ៊ីស្រាអែលបានរំឭកជនស៊ីវិលនៅក្នុងផ្នែកនានានៅភាគខាងត្បូងនៃតំបន់ហ្កាហ្សា (Gaza) ឱ្យចាកចេញ។
លោក Mark Regev ទីប្រឹក្សារបស់លោកនាយករដ្ឋមន្ត្រី Benjamin Netanyahu នៃប្រទេសអ៊ីស្រាអែលបានប្រាប់ទូរទស្សន៍ MSNBC ថា៖ «យើងបានស្នើឱ្យពលរដ្ឋចាកចេញទៅកន្លែងផ្សេង»។
លោកថ្លែងដូច្នេះថា៖ «ខ្ញុំដឹងថាវាមិនងាយស្រួលនោះទេសម្រាប់ពួកគេជាច្រើន ប៉ុន្តែយើងមិនចង់ឃើញជនស៊ីវិលជាប់ផុងនៅក្នុងការប្រយុទ្ធគ្នានេះ»។
កាលពីថ្ងៃសៅរ៍ ការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងតិច ៤៧ នាក់នៅក្នុងទីក្រុង Khan Younis និងតំបន់ជុំវិញ។ នេះបើតាមការបញ្ជាក់របស់ទាហានពេទ្យ។
ការវាយប្រហារតាមអាកាសមួយទៅលើអគារមួយចំនួននៅក្នុងទីក្រុង Khan Younis ដោយធ្វើឱ្យជនជាតិប៉ាឡេស្ទីន ២៦ នាក់ស្លាប់និង ២៣ នាក់ទៀតរងរបួស។ នេះបើតាមការបញ្ជាក់របស់មន្ត្រីសុខាភិបាល។ មន្ត្រីសុខាភិបាលបានបន្ថែមថា មនុស្ស ៦ នាក់ទៀតត្រូវបានសម្លាប់នៅចម្ងាយពីរបីគីឡូម៉ែត្រនៅភាគខាងជើង នៅពេលដែលផ្ទះមួយខ្នងនៅក្នុងក្រុង Deir Al-Balah ត្រូវបានផ្លោងចំ។
ជនជាតិប៉ាឡេស្ទីន ១៥ នាក់បានស្លាប់កាលពីរសៀលថ្ងៃសៅរ៍នៅក្នុងផ្ទះមួយខ្នងនៅភាគខាងលិចទីក្រុង Khan Younis ជិតកន្លែងស្នាក់នៅបណ្ដោះអាសន្នមួយកន្លែងរបស់ជនជម្លៀសចេញពីផ្ទះសម្បែង។ នេះបើតាមការបញ្ជាក់របស់ទាហានពេទ្យនិងអ្នកដែលឃើញហេតុការណ៍នេះ។
អង្គការសុខភាពពិភពលោក (WHO) បានដឹកនាំបេសកកម្មមនុស្សធម៌រួមគ្នាមួយរបស់អង្គការសហប្រជាជាតិកាលពីថ្ងៃសៅរ៍ទៅកាន់មន្ទីរពេទ្យ Shifa។
ក្រុមបេសកកម្មនេះដែលបានចំណាយពេលមួយម៉ោងនៅឯមន្ទីរពេទ្យនោះបាននិយាយថា មន្ទីរពេទ្យនេះ «ដែលធ្លាប់ជាមន្ទីរពេទ្យធំជាងគេបង្អស់ ទំនើបបំផុត និងមានគ្រឿងបរិក្ខារល្អបំផុតនៅក្នុងតំបន់ហ្កាហ្សា» ឥឡូវនេះបានក្លាយជា «តំបន់មរណៈ»។
បុគ្គលិកសុខាភិបាល ២៥ នាក់នៅតែស្ថិតនៅក្នុងមន្ទីរពេទ្យនោះដើម្បីផ្ដល់ការព្យាបាលដល់អ្នកជំងឺ ២៩១ នាក់ ដែលមានទារក ៣២ នាក់ស្ថិតក្នុង «ស្ថានភាពធ្ងន់ធ្ងរខ្លាំង អ្នកជំងឺ ២ នាក់កំពុងទទួលការព្យាបាលដិតដល់ដោយគ្មានឧបករណ៍ដកដង្ហើម និងអ្នកជំងឺលាងឈាម ២២ នាក់ផងដែរ»។ អង្គការសុខភាពពិភពលោកបានបញ្ជាក់នៅក្នុងសេចក្ដីថ្លែងការណ៍មួយថា អ្នកជំងឺភាគច្រើនមានរបួសធ្ងន់ធ្ងរ៕
ប្រែសម្រួលដោយលោក ភី សុភាដា
អ្នកឆ្លើយឆ្លងព័ត៌មានរបស់ VOA ប្រចាំអង្គការសហប្រជាជាតិអ្នកស្រី Margaret Besheer រួមចំណែកនៅក្នុងសេចក្ដីរាយការណ៍នេះ។ ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។