អ៊ីស្រាអែលកាលពីថ្ងៃព្រហស្បតិ៍ បានប្រុងប្រៀបកងទ័ពជើងគោកនៅតាមបណ្តោយព្រំដែនតំបន់ Gaza សម្រាប់លទ្ធភាពនៃការទន្ទ្រានចូលទឹកដីរបស់ជនជាតិប៉ាឡេស្ទីននេះ នៅពេលដែលក្រុម Hamas បានបន្តបាញ់គ្រាប់រ៉ុក្កែតកាន់តែច្រើនឡើងចូលក្នុងសង្កាត់មួយចំនួននៅក្នុងប្រទេសអ៊ីស្រាអែល។
សំឡេងស៊ីរ៉ែនព្រមានពីការវាយប្រហារតាមអាកាស ត្រូវគេបានឮនៅទូទាំងតំបន់ភាគខាងត្បូងអ៊ីស្រាអែលនៅថ្ងៃទី៤ជាប់ៗគ្នា ខណៈដែលគ្រាប់រ៉ុក្កែតខ្លះរបស់ Hamas បានធ្លាក់រហូតដល់ទីក្រុង Tel Aviv នៅតំបន់ភាគខាងជើង។
មានសេចក្តីរាយការណ៍ថា ជនជាតិប៉ាឡេស្ទីននិងអ៊ីស្រាអែលកាន់តែច្រើន បានត្រូវសម្លាប់នៅក្នុងតំបន់ Gaza និងតំបន់ភាគខាងត្បូងអ៊ីស្រាអែល ខណៈដែលអំពើហិង្សាបង្ហូរឈាម បានផ្ទុះឡើងនៅក្នុងទីក្រុងចម្រុះសាសន៍អារ៉ាប់ជ្វីវជាច្រើននៅក្នុងទឹកដីអ៊ីស្រាអែល។ ទីភ្នាក់ងារព័ត៌មាន AP បានរាយការណ៍កាលពីថ្ងៃព្រហស្បតិ៍ដោយបានដកស្រង់ប្រភពពីក្រសួងសុខាភិបាលតំបន់ Gaza មកចុះផ្សាយថា ចំនួនមនុស្សស្លាប់ឥឡូវនេះ បានឡើងដល់៨៣នាក់ រួមមានកុមារ១៧នាក់ និងស្ត្រី៧នាក់។ ចំណែកអ៊ីស្រាអែលវិញប្រកាសថា មានអ្នកស្លាប់ ៧នាក់ពីការវាយប្រហារតាមគ្រាប់រ៉ុក្កែត រួមមានក្មេងស្រីអាយុ៦ឆ្នាំម្នាក់ផង។
ភាពតានតឹងបានរាលដាលដល់ទឹកដីអ៊ីស្រាអែលទៀត ជាទីកន្លែងដែលការប៉ះទង្គិចគ្នាបានកើតមានឡើងនៅទីក្រុងចម្រុះសាសន៍ អារ៉ាប់-ជ្វីវ ជាច្រើន។ អាជ្ញាធរបានដាក់បម្រាមគោលចរពេលយប់នៅក្នុងទីក្រុង Lod ភាគកណ្តាលអ៊ីស្រាអែលដែលនៅទីនោះ មានមនុស្សយ៉ាងតិចណាស់ក៏ម្នាក់ដែរត្រូវបានគេបាញ់ក្នុងសប្តាហ៍នេះ ខណៈដែលមនុស្សរាប់រយនាក់ទៀតនៅក្នុងទីក្រុង Lod និងទីក្រុងផ្សេងទៀតបានត្រូវចាប់ខ្លួន។ អ្នកស្រុកអំបូរជ្វីវស្តាំនិយមនៅក្នុងទីក្រុង Bat Yam ក្បែរក្រុង Tel Aviv បានវាយប្រហារយ៉ាងឃោរឃៅទៅលើអ្នកបើកបរជនជាតិអារ៉ាប់ម្នាក់ រហូតដល់សន្លប់។
កងទ័ពអ៊ីស្រាអែលនិយាយថា ក្រុម Hamas បានបាញ់គ្រាប់រ៉ុក្កែតចំនួន១.៦០០គ្រាប់ឆ្លងព្រំដែនចាប់តាំងពីថ្ងៃចន្ទមក ដោយគ្រាប់រ៉ុក្កែតភាគច្រើន ត្រូវបានបាញ់ស្ទាក់ដោយប្រព័ន្ធការពារកាំជ្រួចមីស៊ីល Iron Dome របស់អ៊ីស្រាអែល។
មេបញ្ជាការជាច្រើនរបស់ក្រុមកងជីវពល Hamas បានត្រូវសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅក្នុងតំបន់ Gaza។ នេះតាមការប្រកាសរបស់ក្រុម Hamas និងអ៊ីស្រាអែលកាលពីថ្ងៃពុធ។ មេបញ្ជាការដែលស្លាប់ទាំងនោះរួមមាន Bassem Issa មេដឹកនាំប្រតិបត្តិការយោធារបស់ Hamas នៅក្នុងតំបន់ Gaza City និងប្រធានវិស្វកម្មរបស់ក្រុមនោះនិងក្រុមមេដឹកនាំសង្គ្រាមតាមប្រព័ន្ធកំព្យូទ័រនិងការផលិតគ្រាប់រ៉ុក្កែត៕