កងកម្លាំងស៊ីរីដែលគាំទ្រដោយអាមេរិក បានរំដោះភូមិ៣ទៀតក្នុងផ្នែកខាងជើងនៃប្រទេសស៊ីរី ចេញពីការត្រួតត្រារបស់ពួករដ្ឋឥស្លាម ដោយបានរុញច្រានពួករដ្ឋឥស្លាមឱ្យចេញឆ្ងាយថែមទៀតពីដែនដីដែលពួកគេបានកាន់កាប់ច្រើនឆ្នាំមកហើយនោះ។
អ្នកយកព័ត៌មានម្នាក់របស់វីអូអេបានធ្វើដំណើរទៅកាន់ភូមិ Herbel ភូមិ Um Hosh និងភូមិ Um Qurra ដែលនៅពេលនេះឋិតនៅក្រោមការត្រួតត្រារបស់កងកម្លាំងប្រជាធិបតេយ្យស៊ីរីដែលហៅកាត់ថា SDF ដែលជាសម្ព័ន្ធភាពមួយនៃក្រុមយុទ្ធជន Kurde និងអារ៉ាប់គាំទ្រដោយស.រ.អា.។
ពួករដ្ឋឥស្លាម បានដកថយទៅកាន់ភូមិនៅជិតខាងទីនោះ ហើយកងកម្លាំង SDFបានដេញតាមពួកយុទ្ធជននៃក្រុមជ្រុលនិយមនេះ។
លោក Mahmud ដែលជាមេបញ្ជាការម្នាក់នៃកងកម្លាំង SDF ដែលចង់ប្រើតែឈ្មោះផ្ទាល់ខ្លួនលោកបាននិយាយថា៖ «ការប្រយុទ្ធគ្នានៅមានធ្វើតទៅទៀតនៅក្នុងភូមិនៅជិតខាងទីនោះ។ គោលដៅរបស់យើងគឺបណ្តេញពួករដ្ឋឥស្លាមឱ្យចេញទាំងអស់ពីទីនេះ»។
កងកម្លាំងប្រឆាំងនឹងពួករដ្ឋឥស្លាម បានជម្រុលទៅមុខនៅពេលដែលកងយន្តហោះចម្បាំងស.រ.អា.បានវាយប្រហារលើទីដៅរបស់ពួកជ្រុលនិយមនៅក្នុងតំបន់នោះ។ ផ្នែកនេះក្នុងភាគខាងជើងនៃប្រទេសស៊ីរីមានសារៈសំខាន់ខាងយុទ្ធសាស្ត្រសម្រាប់ពួករដ្ឋឥស្លាម ដោយសារវាឋិតនៅលើផ្លូវពាណិជ្ជកម្មសំខាន់មួយនៅចន្លោះព្រំដែននៃប្រទេសតួកគី និងក្រុង Raqqa ដែលពួករដ្ឋឥស្លាម បានប្រកាសថាជារដ្ឋធានីរបស់ពួកគេ៕