អស់លោករដ្ឋមន្ត្រីការបរទេសមកពីប្រទេសអ៊ីរ៉ង់និងមហាអំណាចពិភពលោក៤ទៀតដែលចង់នៅជាផ្នែកមួយនៃកិច្ចព្រមព្រៀងនុយក្លេអ៊ែរដែលពួកគេបានចុះហត្ថលេខាឆ្នាំ២០១៥មានគម្រោងធ្វើការចរចានៅថ្ងៃសុក្រខាងមុខនេះថាតើរក្សាកិច្ចព្រមព្រៀងនោះយ៉ាងដូចម្តេចបន្ទាប់ពីការដកខ្លួនរបស់សហរដ្ឋអាមេរិកនោះ។
បណ្តាញព័ត៌មានរដ្ឋអ៊ីរ៉ង់បានរាយការណ៍កាលពីថ្ងៃអង្គារថា លោក Mohammad Javad Zarif រដ្ឋមន្ត្រីការបរទេសអ៊ីរ៉ង់នឹងជួបនៅក្នុងទីក្រុងវីយែនជាមួយសមភាគីរបស់លោកមកពីចក្រភពអង់គ្លេស ប្រទេសចិន បារាំង រុស្ស៊ីនិងអាល្លឺម៉ង់។
លោក Hassan Rouhani ប្រធានាធិបតីនៃប្រទេសអ៊ីរ៉ង់ក៏នឹងធ្វើដំណើរទៅកាន់ប្រទេសស្វ៊ីសនិងអូទ្រីសនៅសប្តាហ៍នេះដែលជាដំណើរទស្សកិច្ចខាងការទូតរបស់លោកដើម្បីព្យាយាមរក្សាកិច្ចព្រមព្រៀងដែលកម្រិតសកម្មភាពនុយក្លេអ៊ែររបស់អ៊ីរ៉ង់នៅក្នុងការដោះដូរការបន្ធូបន្ថយខាងសេដ្ឋកិច្ច។ប្រធានាធិបតីអ៊ីរ៉ង់បាននិយាយថា លោករំពឹងថា ប្រទេសនានានៅអឺរ៉ុបនឹងបញ្ចេញកម្មវិធីនៃវិធានការណ៍ក្នុងរយៈពេលប៉ុន្មានថ្ងៃខាងមុខទៀតដែលត្រូវបានរចនាឡើងដើម្បីរក្សាកិច្ចព្រមព្រៀងនោះនៅរស់រានមានជីវិត។
ប្រធានាធិបតីសហរដ្ឋអាមេរិក ដូណាល់ ត្រាំ បានដកសហរដ្ឋអាមេរិកចេញពីកិច្ចព្រមព្រៀងកាលពីខែឧសភា។ ភាគីផ្សេងៗទៀតក្នុងកិច្ចព្រមព្រៀងនុយក្លេអ៊ែរនោះនិយាយថា ពួកគេនៅតែតាំងចិត្តដល់កិច្ចព្រមព្រៀងនោះហើយបានសម្តែងនូវការរកាំចិត្តយ៉ាងខ្លាំងអំពីការដកខ្លួនរបស់រដ្ឋាភិបាលក្រុងវ៉ាស៊ីនតោននេះ។
សហរដ្ឋអាមេរិកកាលពីថ្ងៃចន្ទបានប្រកាសថា ខ្លួននឹងដាក់ទណ្ឌកម្មឡើងវិញលើផ្នែកថាមពលនិងធនាគាររបស់អ៊ីរ៉ង់ដោយនិយាយថា រដ្ឋាភិបាលអ៊ីរ៉ង់ចាំបាច់ធ្វើការផ្លាស់ប្តូរឥរិយាបទរបស់ខ្លួនហើយត្រូវធ្វើជាប្រទេសធម្មតា៕