អ្នកនាំពាក្យក្រសួងការបរទេសអ៊ីរ៉ង់និយាយនៅថ្ងៃចន្ទថា ប្រទេសអ៊ីរ៉ង់និងប្រទេសធំៗចំនួន៦ទៀត បានជួបប្រជុំគ្នាប្រកបដោយការចម្រើនទៅមុខ ដើម្បីស្តារឡើងវិញនូវកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ប៉ុន្តែនៅមានបញ្ហាសំខាន់ៗមួយចំនួនទៀតដែលត្រូវដោះស្រាយ។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters។
ប្រទេសអ៊ីរ៉ង់និងប្រទេសធំៗមួយចំនួន បានជួបពិភាក្សាគ្នាក្នុងទីក្រុងវីយែន ប្រទេសអូទ្រីស ចាប់តាំងពីខែមេសាមក ក្នុងការស្វែងរកដំណោះស្រាយមួយដើម្បីធ្វើយ៉ាងណា ឲ្យរដ្ឋាភិបាលអាមេរិកដកទណ្ឌកម្មពីប្រទេសអ៊ីរ៉ង់ ហើយរដ្ឋាភិបាលអ៊ីរ៉ង់ខ្លួនឯង ត្រូវវិលត្រឡប់ទៅអនុវត្តកិច្ចព្រមព្រៀងនុយក្លេអ៊ែរនោះទាំងស្រុងឡើងវិញ។
អ្នកនាំពាក្យក្រសួងការបរទេសអ៊ីរ៉ង់លោក Saeed Khatibzadeh លើកឡើងក្នុងសន្និសីទកាសែតមួយដែលត្រូវបានផ្សព្វផ្សាយតាមទូរទស្សន៍ថា៖ «កិច្ចប្រជុំនីមួយៗក្នុងទីក្រុងវីយែន អាចក្លាយជាកិច្ចប្រជុំចុងក្រោយ។ យើងមិនគួរប្រញាប់ប្រញាល់ពេកនោះទេ។ កិច្ចប្រជុំនោះមានការចម្រើនទៅមុខដ៏ប្រសើរ ប៉ុន្តែនៅមានបញ្ហាសំខាន់ៗមួយចំនួនទៀត ដែលត្រូវដោះស្រាយ។ គេនៅពុំទាន់ឃើញមានភាពទាល់ច្រកណាមួយនៅឡើយទេ នៅក្នុងកិច្ចប្រជុំទាំងនោះ»។
ប្រធានាធិបតីសហរដ្ឋអាមេរិកលោក Joe Biden ធ្លាប់បានលើកឡើងថា រដ្ឋាភិបាលអាមេរិក នឹងវិលត្រឡប់ទៅរកកិច្ចព្រមព្រៀងនុយក្លេអ៊ែរនោះឡើងវិញ ប្រសិនបើអ៊ីរ៉ង់អនុវត្តជាមុននូវការកំហិតការផលិតសារធាតុអ៊ុយរ៉ាញ៉ូម សម្រាប់ផលិតក្បាលគ្រាប់នុយក្លេអ៊ែរ។
អ្នកនាំពាក្យក្រសួងការបរទេសអ៊ីរ៉ង់ថា៖ «ទណ្ឌកម្មទាំងអស់ គួរត្រូវបានដកចេញជាមុនសិន និងត្រូវបានផ្ទៀងផ្ទាត់ដោយអ៊ីរ៉ង់ ហើយពេលនោះអ៊ីរ៉ង់នឹងបញ្ឈប់រាល់សកម្មភាពនុយក្លេអ៊ែររបស់ខ្លួន»។
មន្ត្រីការទូតក្នុងតំបន់មួយរូប ដែលត្រូវបានប្រាប់ដោយអ្នកចូលរួមក្នុងកិច្ចប្រជុំនោះលើកឡើងថា «កិច្ចព្រមព្រៀងមួយ ដែលនឹងបញ្ជាក់នូវកាតព្វកិច្ចរបស់រដ្ឋាភិបាលអ៊ីរ៉ង់និងរដ្ឋាភិបាលអាមេរិក ក្នុងការធ្វើដំណើរទៅមុខជុំវិញកិច្ចព្រមព្រៀងនុយក្លេអ៊ែរនេះ «នឹងត្រូវប្រកាសឲ្យដឹងក្នុងទីក្រុងវីយែន នៅសប្តាហ៍នេះ»៕