អ្នកការទូតអឺរ៉ុបនិងអ៊ីរ៉ង់បានជួបគ្នាកាលពីថ្ងៃសុក្រដើម្បីពិភាក្សាអំពីថាតើពួកគេអាចប្រឡូកក្នុងការចរចាម៉ឺងម៉ាត់ឬក៏អត់ ដែលក្នុងនោះរួមទាំងការចរចាអំពីកម្មវិធីនុយក្លេអ៊ែររបស់អ៊ីរ៉ង់ផងដែរ មុនពេលលោក Donald Trump ចូលកាន់តំណែងជាប្រធានាធិបតីអាមេរិកម្តងទៀតនៅខែមករាខាងមុខ។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
កិច្ចប្រជុំនៅក្នុងទីក្រុងហ្សឹណែវនៃប្រទេសស្វីសនេះ ដែលជាកិច្ចប្រជុំលើកដំបូងតាំងពីការបោះឆ្នោតប្រធានាធិបតីអាមេរិកមក បានធ្វើឡើងបន្ទាប់ពីអ៊ីរ៉ង់ខឹងនឹងសេចក្តីសម្រេចមួយគាំទ្រដោយសហភាពអឺរ៉ុបកាលពីសប្តាហ៍មុនដែលបានរិះគន់អ៊ីរ៉ង់ថាមិនបានធ្វើកិច្ចសហប្រតិបត្តិការឱ្យបានល្អជាមួយក្រុមឃ្លាំមើលនុយក្លេអ៊ែររបស់អង្គការសហប្រជាជាតិ។
លោក Majid Takhtravanchi ដែលជាអនុរដ្ឋមន្រ្តីការបរទេសរបស់អ៊ីរ៉ង់និងជាអ្នកចរចាជាន់ខ្ពស់ខាងនុយក្លេអ៊ែរ បានជួបអ្នកសម្របសម្រួលរបស់សហភាពអឺរ៉ុបលោក Enrique Mora កាលពីល្ងាចថ្ងៃព្រហស្បតិ៍និងបានពិភាក្សាគ្នាកាលពីថ្ងៃសុក្រជាមួយអ្នកការទូតកំពូលមកពីចក្រភពអង់គ្លេស អាល្លឺម៉ង់ និងបារាំង។
លោក Mora បាននិយាយថា ការពិភាក្សាគ្នានោះគឺ «ស្មោះត្រង់» និងផ្តោតលើការគាំទ្រផ្នែកយោធារបស់អ៊ីរ៉ង់ចំពោះរុស្ស៊ី ស្ថានការណ៍នៅមជ្ឈិមបូព៌ា និងបញ្ហានុយក្លេអ៊ែរ។
លោក Takhtravanchi ថាបញ្ហាទាំងបីនេះ «ប្រទាក់ក្រឡាគ្នា»។
មន្ត្រីជាន់ខ្ពស់អ៊ីរ៉ង់ម្នាក់បានប្រាប់សារព័ត៌មាន Reuters ថា នៅសប្តាហ៍ក្រោយអ៊ីរ៉ង់នឹងជូនដំណឹងដល់ប្រទេសរុស្ស៊ីនិងចិនអំពីការពិភាក្សាគ្នានេះ។ រុស្ស៊ីនិងចិនគឺជាប្រទេសហត្ថលេខីមិនមែនបស្ចិមប្រទេសនៃកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។
ក្នុងពេលកាន់តំណែងជាប្រធានាធិបតីអាមេរិកកាលពីអាណត្តិមុន លោក Trump បានបោះបង់ចោលកិច្ចព្រមព្រៀងជាមួយអ៊ីរ៉ង់នេះ ហើយបន្ទាប់ពីនោះមក លោកបានប្រើគោលនយោបាយដាក់ «សម្ពាធជាអតិបរមា» ដើម្បីកម្ចេចសេដ្ឋកិច្ចអ៊ីរ៉ង់។ ក្នុងអាណត្តិថ្មីរបស់លោកលើកនេះ លោកកំពុងជ្រើសរើសមន្ត្រីណាដែលមានវោហារសាស្ត្ររិះគន់អ៊ីរ៉ង់៕
អ៊ីរ៉ង់និងអឺរ៉ុបសាកល្បងការទូតពេលអាណត្តិទីពីររបស់លោក Trump ជិតចាប់ផ្តើម
រូបឯកសារ៖ ឯកអគ្គរដ្ឋទូតអ៊ីរង៉ង់នៅអង្គការសហប្រជាជាតិលោក Majid Takht Ravanchi ថ្លែងនៅទីស្នាក់ការកណ្តាលរបស់ អ.ស.ប.នៅទីក្រុងញូវយ៉កកាលពីថ្ងៃទី២៤ មិថុនា ឆ្នាំ២០១៩។