អង្គការអន្តរជាតិដែលធ្វើការលើការការពារកុមារ និងក្រសួងពាក់ព័ន្ធ ប្រារព្ធទិវាកុមារពិភពលោកនៅរាជធានីភ្នំពេញ ខណៈកុមារកម្ពុជានៅបន្តប្រឈមបញ្ហាជាច្រើន ទាំងផ្នែកអាហារូបត្ថម្ភ លទ្ធភាពទទួលបានការអប់រំ ការកេងប្រវ័ញ្ចកម្លាំងពលកម្ម សុវត្ថិភាពតាមប្រព័ន្ធអ៊ីនធឺណិត និងការរំលោភសេពសន្ថវៈជាដើម។
នៅថ្ងៃទី១៨ ខែវិច្ឆិកា ឆ្នាំ២០២២ នេះ យូនីសេហ្វកម្ពុជា តំណាងស្ថាប័នអង្គការសហប្រជាជាតិ ក្រសួងពាក់ព័ន្ធ និងវិស័យឯកជន បានប្រារព្ធទិវាកុមារពិភពលោក ដែលជាខួបនៃការអនុម័តអនុសញ្ញាស្តីពីសិទ្ធិកុមារកាលពី ថ្ងៃទី២០ ខែវិច្ឆិកា ឆ្នាំ១៩៨៩។
ប្រធានស្តីទីអង្គការយូនីសេហ្វ (Unisef) ប្រចាំកម្ពុជា លោក អានៀរបាន ឆាតឺរជី (Anirban ChatterJee) ប្រាប់ VOA ថា បើទោះបីជាស្ថានភាពរបស់កុមារនៅកម្ពុជាមានភាពប្រសើរជាងមុន បើធៀបនឹងកាលពី១៥ឆ្នាំមុនក្តី ក៏ពួកគេនៅតែប្រឈមនឹងបញ្ហាជាច្រើន ទៅតាមកម្រិតនៃអាយុរបស់ពួកគេ។
ប្រធានស្តីទីអង្គការយូនីសេហ្វប្រចាំកម្ពុជា លោក អានៀរបាន ឆាតឺរជី ប្រាប់ VOA ក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
លោកនិយាយថា៖ «វាផ្អែកលើកម្រិតនៃអាយុរបស់ពួកគេ។ ក្មេងតូចៗអាយុក្រោម៥ឆ្នាំ ពួកគេមិនទទួលបានការថែរក្សាសុខភាព និងអាហារូបត្ថម្ភ។ ក្មេងជាច្រើនទទួលបាន បើធៀបនឹង១៥ឆ្នាំមុន ប៉ុន្តែក្មេងជាច្រើនទៀតនៅតែមិនទទួលបាន។ ក្មេងអាយុ១៤ឆ្នាំ បានទៅរៀន ប៉ុន្តែមិនប្រាកដថាអាចរៀនបានច្រើនតាមតម្រូវការទេ។ ក្មេងអាយុ១៧ឆ្នាំ ឬ១៨ឆ្នាំ ពួកគេមានចំណេះដឹង ប៉ុន្តែមិនប្រាកដថាមានជំនាញក្នុងការស្វែងរកការងារដើម្បីធ្វើការដែលគេចង់ធ្វើសម្រាប់ការងារវិជ្ជាជីវៈរបស់ពួកគេនោះទេ»។
ប្រធានស្តីទីអង្គការយូនីសេហ្វកម្ពុជារូបនេះបន្តថា ខណៈបញ្ហាប្រឈមរបស់កុមារនៅកម្ពុជាមានភាពប្រសើរជាងមុន រដ្ឋាភិបាលកម្ពុជាគួរតែបន្ថែមការយកចិត្តទុកដាក់លើកុមារ ដើម្បីធានាថា ពួកគេទទួលបានអ្វីដែលជាតម្រូវការគ្រប់ៗគ្នា និងស្មើភាព ទាំងនៅរាជធានី និងនៅតាមបណ្តាខេត្តផ្សេងៗ។
លោកបន្ថែមថា៖ «គ្រប់គ្នាគួរតែទទួលបានឱកាសស្មើៗគ្នាក្នុងការលូតលាស់។ ដូចគ្នាដែរ ក្មេងប្រុស និងក្មេងស្រី មិនគួរត្រូវបានកំណត់ពីឱកាសដែលទទួលបាននោះទេ។ ស្រដៀងគ្នានេះ កុមារដែលមានពិការភាពផ្នែករាងកាយ និងការរៀនសូត្រ គួរតែទទួលបានឱកាសស្មើគ្នាក្នុងការរៀនសូត្រ និងការលូតលាស់ និងដើម្បីរួមចំណែកសម្រាប់ការអភិវឌ្ឍក្នុងប្រទេស។ កុមារគឺជាអនាគតរបស់ពួកយើង ប្រសិនបើពួកយើងវិនិយោគលើកុមារក្នុងពេលឥឡូវនេះ កម្ពុជានឹងអាចក្លាយជាប្រទេសដែលមានប្រាក់ចំណូលខ្ពស់ក្នុងរយៈពេល២០ឆ្នាំទៀត»។
ក្រុមកុមារ និងយុវជនកំពុងបង្ហាញអំពីស្នាដៃនៃការបង្កើតថ្មី ព្រមទាំងគម្រោងនានាពាក់ព័ន្ធនឹងបច្ចេកវិទ្យា បរិស្ថាន និងសុវត្ថិភាព ក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
ក្រុមកុមារ និងយុវជនកំពុងបង្ហាញអំពីស្នាដៃនៃការបង្កើតថ្មី ព្រមទាំងគម្រោងនានាពាក់ព័ន្ធនឹងបច្ចេកវិទ្យា បរិស្ថាន និងសុវត្ថិភាព ក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
ក្នុងការប្រារព្ធទិវាកុមារពិភពលោកនៅថ្ងៃសុក្រនេះ គេឃើញមានការថ្លែងរបស់កុមារពីតម្រូវការរបស់ពួកគេ ព្រមទាំងការបង្ហាញស្នាដៃរបស់កុមារ និងយុវជននៃកម្មវិធីជំនាន់ថ្មី ពាក់ព័ន្ធនឹងបច្ចេកវិទ្យា ការការពារបរិស្ថាន និងសុវត្ថិភាពចំណីអាហារជាដើម។
អគ្គនាយកនៃអគ្គនាយកដ្ឋានអប់រំទូទៅនៃក្រសួងអប់រំ យុវជន និងកីឡា លោក ពុធ សាមិត្ត ថ្លែងទៅកាន់អ្នកសារព័ត៌មានក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
អគ្គនាយកនៃអគ្គនាយកដ្ឋានអប់រំទូទៅនៃក្រសួងអប់រំ យុវជន និងកីឡា លោក ពុធ សាមិត្ត ប្រាប់អ្នកសារព័ត៌មានក្នុងពិធីប្រារព្ធទិវាកុមារពិភពលោកនេះថា គុណភាពអប់រំនៅកម្ពុជាមានស្ថានភាពល្អប្រសើរជាងមុន បើទោះបីជាសិស្សប្រមាណជា៥០ភាគរយមិនបានទទួលការសិក្សាតាមអនឡាញក្នុងអំឡុងពេលនៃការឆ្លងរីករាលដាលជំងឺកូវីដ១៩ រយៈពេលពីរឆ្នាំកន្លងទៅក៏ដោយ។ លោកបន្ថែមថា ក្រសួងអប់រំតែងដាក់ចេញនូវអាទិភាពសម្រាប់ការអប់រំ ដើម្បីជំរុញគុណភាពអប់រំកាន់តែប្រសើរ។
លោកថ្លែងថា៖ «តាមរយៈសន្និបាតអប់រំរបស់យើង យើងតែងតែបានដាក់ចេញនូវអាទិភាពរបស់យើង។ ដូចកាលពីសន្និបាតកន្លងមកនេះ យើងបានដាក់ចេញនូវអាទិភាពរបស់យើងមាន៨ចំណុច។ ហើយក្នុងហ្នឹងមាន បរិវត្តកម្មអប់រំ ការអប់រំបែប STEM (វិទ្យាសាស្រ្ត បច្ចេកវិទ្យា វិស្វកម្ម និងគណិតសាស្រ្ត) បែបអីហ្នឹង សុទ្ធតែជាអាទិភាពរបស់យើងហើយ»។
រដ្ឋលេខាធិការក្រសួងសង្គមកិច្ច និងយុវនីតិសម្បទា លោក សំហេង បុរស ថ្លែងទៅកាន់អ្នកសារព័ត៌មានក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
រដ្ឋលេខាធិការក្រសួងសង្គមកិច្ច និងយុវនីតិសម្បទា លោក សំហេង បុរស លើកឡើងដែរថា បញ្ហាកុមារនៅកម្ពុជានៅតែមាន ប៉ុន្តែលោកថា ភាពប្រសើរឡើងក៏កំពុងមានជាបន្តបន្ទាប់ផងដែរ។ លោកបន្ថែមថា ក្រសួងសង្គមកិច្ចបានផ្តល់កញ្ចប់ថវិកាផ្តល់ឲ្យស្រ្តីមានផ្ទៃពោះ និងកុមារ ផ្តល់គម្រោងឧបត្ថម្ភសាច់ប្រាក់សម្រាប់គ្រួសារក្រីក្រ ដោយមានបន្ថែមសម្រាប់គ្រួសារដែលមានកុមារ ព្រមទាំងផ្តល់កញ្ចប់ថវិកាទៅតាមសាលារៀនក្នុងភូមិឃុំក្រីក្រ ដើម្បីផ្តល់អាហារឲ្យកុមារតាមសាលារៀនផងដែរ។
កាលពីខែសីហា ឆ្នាំ២០២១ អង្គការយូនីសេហ្វ បានចេញរបាយការណ៍មួយមានចំណងជើងថា «វិបត្តិអាកាសធាតុ គឺជាវិបត្តិនៃសិទ្ធិកុមារ» បង្ហាញថា កម្ពុជាប្រឈមនឹងហានិភ័យខ្ពស់នៃវិបត្តិអាកាសធាតុ ខណៈដែលមនុស្សវ័យក្មេងដែលរស់នៅក្នុងប្រទេសនេះស្ថិតនៅក្នុងចំណោមក្រុមដែលប្រឈមនឹងហានិភ័យខ្ពស់ពីផលប៉ះពាល់នៃការប្រែប្រួលអាកាសធាតុ ដែលបង្កការគំរាមកំហែងដល់សុខភាព ការអប់រំ និងការទទួលបានការការពារ។ របាយការណ៍រកឃើញថា កុមារនៅកម្ពុជាប្រឈមមុខខ្ពស់នឹងបញ្ហាខ្វះទឹក គ្រោះទឹកជំនន់តាមដងទន្លេ និងជំងឺឆ្លងតាមមេរោគចម្លង។
ក្រុមកុមារ និងយុវជនកំពុងបង្ហាញអំពីស្នាដៃនៃការបង្កើតថ្មី ព្រមទាំងគម្រោងនានាពាក់ព័ន្ធនឹងបច្ចេកវិទ្យា បរិស្ថាន និងសុវត្ថិភាព ក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
ក្រុមកុមារ និងយុវជនកំពុងបង្ហាញអំពីស្នាដៃនៃការបង្កើតថ្មី ព្រមទាំងគម្រោងនានាពាក់ព័ន្ធនឹងបច្ចេកវិទ្យា បរិស្ថាន និងសុវត្ថិភាព ក្នុងពិធីប្រារព្ធទិវាកុមារពិភពលោក ថ្ងៃទី១៨ ខែវិច្ឆិកា ឆ្នាំ២០២២។ (កាន់ វិច្ឆិកា/វីអូអេ)
ការសិក្សាថ្មីមួយរបស់ក្រសួងអប់រំ យុវជននិងកីឡា និងអង្គការយូនីសេហ្វ ចេញកាលពីខែមេសា ឆ្នាំ២០២២ បង្ហាញថា ការរាតត្បាតជំងឺកូវីដ១៩ បណ្តាលឲ្យមានការបាត់បង់ការរៀនសូត្រយ៉ាងច្រើនរបស់កុមារកម្ពុជា។ ដោយប្រៀបធៀបជាមួយការវាយតម្លៃដូចគ្នានៅឆ្នាំ២០១៦ ភាគរយនៃសិស្សានុសិស្ស ដែលមិនអាចបង្ហាញអំពីជំនាញចំណេះដឹងមូលដ្ឋានផ្នែកភាសាខ្មែរ បានកើនឡើងពី៣៤%ទៅ៤៥% និងផ្នែកគណិតវិទ្យាបានកើនឡើងពី៤៩% ទៅ៧៤%។ នេះបើតាមការសិក្សា។
កាលពីខែកញ្ញា ឆ្នាំ២០២២ អង្គការយូនីសេហ្វបានចេញរបាយការណ៍មួយមានចំណងជើងថា «ការបញ្ឈប់គ្រោះថ្នាក់ក្នុងប្រទេសកម្ពុជា» ដោយបានរកឃើញថា កុមារដែលប្រើប្រាស់អ៊ីនធឺណិតចំនួន១១% អាយុចន្លោះពី១២ ទៅ ១៧ឆ្នាំ ធ្លាប់ទទួលរងនូវការរំលោភបំពាន និងការកេងប្រវ័ញ្ចផ្លូវភេទតាមប្រព័ន្ធអនឡាញ ក្នុងទម្រង់មួយចំនួនជាក់លាក់។
ក្រៅពីការរកឃើញថ្មីៗរបស់អង្គការយូនីសេហ្វ ក៏មានអង្គការជាតិ និងអន្តរជាតិមួយចំនួនទៀតបានរកឃើញអំពីកង្វះអាហារូបត្ថម្ភ ការកេងប្រវ័ញ្ចកម្លាំងពលកម្ម ការប្រើហិង្សា និងការរំលោភបំពានផ្លូវភេទលើកុមារដែលនៅបន្តកើតមាន៕