វេទិកាសេដ្ឋកិច្ចពិភពលោកស្តីពីអាស៊ាន បានធ្វើឡើងនៅទីក្រុងហាណូយ ប្រទេសវៀតណាម កាលពីថ្ងៃទី១១ ដល់ថ្ងៃទី១៣ខែកញ្ញា ឆ្នាំ២០១៨ ដែលផ្តោតលើការប្រែក្លាយតំបន់អាស៊ានឲ្យទៅជាតំបន់ដែលមានបច្ចេកវិទ្យាឈានមុខ។ វិសមភាពក៏ត្រូវបានបញ្ចូលក្នុងរបៀបវរៈនៃកិច្ចប្រជុំនោះផងដែរ។
បើយោងតាមរបាយការណ៍ថ្មីមួយដែលផ្សាយដោយ PriceWaterhouseCoopers អាស៊ាន គឺជាតំបន់ដែលមានប្រទេសដែលមានសេដ្ឋកិច្ចវិវត្តន៍យ៉ាងឆាប់រហ័សបំផុតនៅលើសាកលលោក ដែលមានផលិតផលក្នុងស្រុកសរុបប្រមាណ២ពាន់៥រយលានដុល្លានៅក្នុងឆ្នាំ២០១៦។
ប៉ុន្តែតំបន់នេះត្រូវបានដឹងថាមានវិសមភាព ដែលប្រជាជនមួយភាគធំស្ថិតក្នុងភាពក្រីក្រ ដែលងាយរងគ្រោះចំពោះវិបត្តិសេដ្ឋកិច្ច និងគ្រោះធម្មជាតិ។
អនុប្រធានធនាគារអភិវឌ្ឍន៍អាស៊ីលោក Stephen Groff បានប្រាប់វេទិកាសេដ្ឋកិច្ចពិភពលោកស្តីពីអាស៊ាន ដែលបានផ្សាយតាមអ៊ីនធឺណិតថា កំណើនវិសមភាពនៅក្នុងបណ្តាប្រទេសអាស៊ាន ធ្វើឲ្យមានផលអវិជ្ជមានចំពោះសេដ្ឋកិច្ច និងប៉ះពាល់ដល់រចនាសម្ព័ន្ធសង្គម។
លោកបាននិយាយថា៖ «នៅក្នុងប្រទេសកំពុងអភិវឌ្ឍន៍ យើងបានឃើញថាមានបញ្ហាវិសមភាពកើនឡើងយ៉ាងខ្លាំងក្នុងអំឡុងប៉ុន្មានទសវត្សរ៍ចុងក្រោយនេះ។ កំណើនវិសមភាព គួរឲ្យបារម្ភខ្លាំងណាស់។ អត្រាវិសមភាពមិនបានថមថយនោះទេ ប៉ុន្តែវាកើនឡើងកាន់តែខ្លាំង»។
បើយោងតាមសារព័ត៌មាន ASEAN Post នៅក្នុងប្រទេសថៃ អភិជនដែលមានចំនួនត្រឹមតែមួយភាគរយនៃប្រជាជនថៃសរុប គ្រប់គ្រងប្រហែល៥៨ភាគរយនៃទ្រព្យសម្បត្តិរបស់ប្រទេសនេះ។ នៅក្នុងប្រទេសឥណ្ឌូនេស៊ី អភិជនដែលមានចំនួនត្រឹមតែមួយភាគរយនៃប្រជាជនឥណ្ឌូនេស៊ីសរុបដែរនោះ គ្រប់គ្រងទ្រព្យសម្បត្តិប្រហែលពាក់កណ្តាលនៃប្រទេសនេះ ហើយមហាសេដ្ឋីដែលមានបំផុត៤រូបនៅក្នុងប្រទេសនេះ មានទ្រព្យសមុ្បត្តិច្រើនជាងទ្រព្យសម្បត្តិរបស់ជនក្រីក្រ១០០លាននាក់នៅក្នុងប្រទេសឥណ្ឌូនេស៊ី។
លោកស្រី Anne-Birgitte Albrectsen នាយិកាប្រតិបត្តិនៃអង្គការ Plan International បានប្រាប់វេទិកាសេដ្ឋកិច្ចពិភពលោកថា វិសមភាពត្រូវបានបង្ហាញតាមរយៈរូបភាពដែលស្រ្តី និងកុមារីជាច្រើនមិនអាចទទួលបានឱកាសស្មើគ្នាជាមួយបុរស ក្នុងការទទួលបានការអប់រំ ការងារ និងសេវាកម្មសង្គម។
លោកស្រីបាននិយាយថា៖ «ដូច្នេះរូបភាពនៃវិសមភាពសម្រាប់ខ្ញុំ សំដៅលើទឹកមុខខកបំណងនៃកុមារី និងស្រ្តីរាប់លាននាក់នៅពេលដែលពួកគេមិនទទួលបានឱកាសអប់រំ ការងារ និងសេវាកម្មសង្គម។
លោក Groff បាននិយាយថា កំណើនវិសមភាព បានគំរាមកំហែងដល់កំណើនសេដ្ឋកិច្ចពិភពលោក ក៏ដូចជាសុខុមាលភាពនៃប្រជាជន។
លោកបានថ្លែងថា៖ «ហេតុអ្វីបានជាយើងបារម្ភអំពីវិសមភាព? ពីព្រោះវិសមភាពមិនត្រឹមតែមានសារៈសំខាន់សម្រាប់ប្រជាជនក្នុងការទទួលបានសមភាពនៃឱកាសតែប៉ុណ្ណោះទេ ប៉ុន្តែវាក៍គំរាមកំហែងដល់កំណើនសេដ្ឋកិច្ចពិភពលោកផងដែរ»។
លោកស្រី Ng Yeen Seen នាយិកាប្រតិបត្តិនៃមជ្ឈមណ្ឌលស្រាវជ្រាវ ប្រឹក្សាយោបល់ និងបច្ចេកវិទ្យា ដែលជាវិទ្យាស្ថានស្រាវជ្រាវនៅក្នុងម៉ាឡេស៊ី បាននិយាយថា វិសមភាពចាក់ឫសនៅក្នុងគោលនយោបាយនៃរដ្ឋាភិបាលជាច្រើន ដែលមិនឆ្លើយតបចំពោះតម្រូវការរបស់ប្រជាពលរដ្ឋ ដែលគោលនយោបាយទាំងនោះបម្រើប្រយោជន៍តែមតិភាគច្រើន និងមិនបានយកចិត្តទុកដាក់ចំពោះសំឡេងភាគតិច។
លោកស្រីបាននិយាយថា៖ «អ្វីដែលខ្ញុំនិយាយនៅថ្ងៃនេះ គឺថារដ្ឋាភិបាលជាច្រើន រដ្ឋបាលជាច្រើន បង្កើតគោលនយោបាយសម្រាប់តែមនុស្សភាគច្រើន»។
លោកស្រី Albrectsen បាននិយាយថា៖ «ដើម្បីធ្វើឲ្យមានសមភាព វាតម្រូវឲ្យមានការផ្លាស់ប្តូររចនាសម្ព័ន្ធនៃបញ្ហា និងនិយាមសង្គម ដើម្បីរួមបញ្ចូលស្រ្តីឲ្យកាន់តែច្រើនថែមទៀតក្នុងការអភិវឌ្ឍន៍សេដ្ឋកិច្ច»។
លោកស្រីបានបន្ថែមថា៖ «អ្នកដឹកនាំវ័យក្មេង អ្នកដឹកនាំជាន់ខ្ពស់ ថ្នាក់ដឹកនាំរដ្ឋាភិបាល និងថ្នាក់ដឹកនាំរបស់វិស័យឯកជន ចាប់ផ្តើមនិយាយអំពីនិយាមដែលបង្កគ្រោះភ័យដល់សង្គម ដែលរារាំងស្រ្តីក្នុងការចូលរួមក្នុងវិស័យធុរៈកិច្ច ឬក៏រារាំងម្ចាស់ធុរៈកិច្ចមិនឲ្យទទួលយកស្រ្តីឲ្យបម្រើការក្នុងអាជីវកម្មរបស់ពួកគេ។ នេះគឺជាចំណុចដែលគោលនយោបាយ ត្រូវតែអនុវត្តន៍ឲ្យហួសពីការត្រឹមតែអនុម័តច្បាប់ ហើយឈានដល់ការផ្លាស់ប្តូរឥរិយាបថ»។
លោក Groff បានថ្លែងថា រដ្ឋាភិបាលអាស៊ាន ត្រូវតែយកចិត្តទុកដាក់ឲ្យកាន់តែខ្លាំងចំពោះ គោលនយោបាយគាំពារសង្គម ដើម្បីកាត់បន្ថយវិសមភាព និងលើកកម្ពស់សុខុមាលភាពរបស់ប្រជាជន។
លោកបានប្រាប់ថា៖ «ខ្ញុំគិតថា នៅទីបញ្ចប់ រដ្ឋាភិបាលត្រូវបង្កើតគោលនយោបាយគាំពារសង្គមរឹងមាំ ដោយពិចារណាអំពីការវិនិយោគសាធារណៈ គោលនយោបាយសង្គម និងការគ្រប់គ្រងធនធានរបស់ប្រទេស។ ទាំងនេះ នឹងដោះស្រាយបញ្ហាប្រឈមនៃវិសមភាព»៕