ពលរដ្ឋខ្មែរអាមេរិកាំងជាច្រើនរយនាក់បានប្រមូលផ្តុំគ្នានៅវត្តព្រះពុទ្ធសាសនាមួយកន្លែងជិតរដ្ឋធានីវ៉ាស៊ីនតោនសហរដ្ឋអាមេរិក ដើម្បីប្រារព្ធពិធីបុណ្យចូលឆ្នាំប្រពៃណីខ្មែរ។
ពលរដ្ឋខ្មែររាប់រយនាក់ទាំងក្មេងចាស់ប្រុសស្រីមកពីរដ្ឋផ្សេងៗនិងបណ្តាសហគមន៍នានា បាននាំយកចង្ហាន់ បច្ច័យ និងទេយ្យទានមួយចំនួនដើម្បីមក ប្រគេនព្រះសង្ឃនៅវត្តធម្មរង្សី ឬហៅវត្តខ្មែរកម្ពុជាក្រោម ស្ថិតក្នុងសង្កាត់ណូកស៍វីល (Nokesville) ជិតក្រុងម៉ាណាសាស់ (Manassas) ក្នុងរដ្ឋវីជីនៀ (Virginia) ដែលជាប់នឹងរដ្ឋធានីវ៉ាស៊ីនតោន។
ពិធីបុណ្យចូលឆ្នាំឆ្លងពីឆ្នាំមមីព.ស.២៥៥៨ ចូលឆ្នាំមមែ ព.ស.២៥៥៩ ដែល បានប្រព្រឹត្តទៅកាលពីថ្ងៃសៅរ៍ទី១១ខែមេសា និងថ្ងៃអាទិត្យទី១២ ខែមេសា មុនកាលកំណត់ពីរថ្ងៃនេះគឺដោយសារជាថ្ងៃឈប់សម្រាកពីការងារសម្រាប់ពលរដ្ឋខ្មែរនៅអាមេរិក។ ក្រុមពុទ្ធបរិស័ទ្ធបានថ្លែងថា ពិធីបុណ្យចូលឆ្នាំនេះជាការរំឭកដល់បុព្វការីជនផង អបអរសាទរទទួលទេវតាឆ្នាំថ្មីផង ហើយនឹងរក្សាប្រពៃណី វប្បធម៌ សាសនា និងទំនៀមទម្លាប់ដែលជាអត្តសញ្ញាណខ្មែរផ។ ក្រុមអ្នករៀបចំពិធីបុណ្យបានថ្លែងថា មានការលេងល្បែងប្រជាប្រិយដូចជា ចោលឈូង បោះអង្គុញ រត់បាវ និងស្តាប់ព្រះសង្ឃចម្រើនព្រះបរិត ទេសនាបង្សុកូល ទទួលទានអាហារជាមួយគ្នា ដង្ហែ ព្រះកេសកបិលមហាព្រហ្មប្រទក្សិណជុំវិញភ្នំហេមពាន្ត ដែលជាតំណាងហើយនឹងមានពិធីស្រង់ព្រះស្រង់ទឹកជូនព្រះសង្ឃ ងូតទឹកជូនព្រឹទ្ធាចារ្យ និងពូនភ្នំខ្សាច់ជាដើម។
លោក ចៅ សុខបាន (Chau Sokban) ប្រធានគណៈកម្មាការវត្តធម្មរង្សី បានថ្លែង ថាពលរដ្ឋខ្មែរនៅឆ្នាំនេះដែលចូលរួមពិធីបុណ្យចូលឆ្នាំខ្មែរមានចំនួនច្រើនជាងឆ្នាំទៅ។
«នេះជាគម្រោងដែលខ្មែរយើងទូទៅនិយម គឺថាអបអរសាទរចូលឆ្នាំផង ហើយ នឹងដើម្បីគាំទ្រនិងរក្សាព្រះពុទ្ធសាសនាយើងឲ្យបានគង់វង្សទៅមុខទៀត»។
លោក ថាច់ ហន អាចារ្យវត្តធម្មរង្សីបានថ្លែងថា ពលរដ្ឋខ្មែរនៅសរអាដែលចាក ចេញមកពីស្រុកខ្មែរមករស់នៅសរអាមិនភ្លេចទំនៀមទម្លាប់ប្រពៃណីខ្មែរទេ។
«ហេតុដូច្នេះបានជាញាតិញោមគ្រប់មជ្ឈដ្ឋានទាំងអស់ដែលបានអញ្ចើញមក ចូលរួមក្នុងពិធីនេះ ដើម្បីរំឭកដល់គុណបុព្វការីជនរបស់យើង។ មិនតែប៉ុណ្ណោះយើងរំឭកនូវប្រពៃណី វប្បធម៌ ក្នុងប្រទេសដែលយើងបានមករស់នៅដ៏សម្យ គួរនេះ»។
លោកស្រី ថាច់ សាម៉េត រស់នៅរដ្ឋ Michigan បានថ្លែងថា អ្នកស្រីមានភាព រីករាយដែលបានចូលរួមក្នុងពិធីបុណ្យចូលឆ្នាំជាមួយនឹងពលរដ្ឋខ្មែរជាច្រើនក្នុងរដ្ឋវីជីនៀ ដែលមានភាពអ៊ូអរខ្លាំងចំនួនពីរថ្ងៃមកនេះ។
«រាល់ថ្ងៃហ្នឹងបើមានកូនចៅនៅជុំវិញដែលយើងស្គាល់ យើងហៅគេមកបុណ្យ ចូលឆ្នាំដើម្បីរក្សាទំនៀមទម្លាប់ខ្មែរតាំងពីយូរលង់មក»។
អ្នកស្រី សាម៉នថា ទិត្យ រស់នៅសង្កាត់ Springfield រដ្ឋ Virginia បានថ្លែងថា ពលរដ្ឋខ្មែរជាពុទ្ធបរិស័ទ្ធ បានចូលរួមច្រើនដែលអ្នកស្រីចាត់ទុកថា ជាការ បង្ហាញពីគោលបំណងចង់ឃើញពុទ្ធសាសនាគង់វង្ស។
«តាមខ្ញុំមើលពេលនេះ ថ្ងៃនេះ គឺខ្ញុំឃើញចម្លែកច្រើន ព្រោះម៉េចបានថាអញ្ចឹង គឺខ្ញុំជឿថា ទឹកចិត្តបងប្អូនចង់ជួយ លើកកម្លាំងទឹកចិត្តដើម្បីឲ្យមានព្រះពុទ្ធសាសនាឈរនឹងនរដើម្បីជាទីកន្លែងការគោរពបូជា»។
លោក ហន យឹម ពុទ្ធបរិស័ទ្ធមួយរូបទៀតនៅសង្កាត់ Woodbridge រដ្ឋ Virginia បានថ្លែងថា លោកចូលរួមជារៀងរាល់ឆ្នាំ៖ «ខ្ញុំមកវត្តធម្មរង្សីនេះ គឺដើម្បីយកចង្ហាន់ប្រគេនព្រះសង្ឃនិងដើម្បីរក្សាប្រពៃណីជាតិខ្មែររបស់យើង ហើយលើកស្ទួយព្រះពុទ្ធសាសនាយើងឲ្យបានរីកចម្រើន»។
ពុទ្ធបរិស័ទ្ធមានក្តីសង្ឃឹមថា ពលរដ្ឋខ្មែរនឹងចូលរួមក្នុងការកសាងពង្រីកវត្ត អារាមដែលកកើតតាំងពីឆ្នាំ១៩៨២នេះបន្តទៀត ជាពិសេសព្រះធមុ្មសាលា ដែលក្រុមគណៈកម្មការវត្តចង់ធ្វើការកសាងឲ្យបានធំនិងចប់នៅក្នុងរយៈពេល ជិត២ឆ្នាំទៀត៕