នាយករដ្ឋមន្ត្រីអ៊ីស្រាអែលលោក Benjamin Netanyahu កំពុងព្យាយាមជំរុញការគាំទ្ររបស់សហរដ្ឋអាមេរិកសម្រាប់ការប្រយុទ្ធរបស់អ៊ីស្រាអែលប្រឆាំងនឹងក្រុមហាម៉ាស់ និងក្រុមសកម្មប្រយុទ្ធផ្សេងទៀតដែលគាំទ្រដោយអ៊ីរ៉ង់នៅក្នុងសុន្ទរកថាទៅកាន់សភាអាមេរិកាំង។
សមាជិកសភាគណបក្សប្រជាធិបតេយ្យជាង៥០រូបបានធ្វើពហិការមិនចូលរួមក្នុងអង្គប្រជុំរួមរបស់សភាទេ ហើយមានបាតុកររាប់ពាន់នាក់បានប្រមូលផ្តុំគ្នាជុំវិញវិមានសភាកាលពីថ្ងៃពុធដើម្បីថ្កោលទោសសង្រ្គាមនៅហ្កាហ្សា និងវិបត្តិមនុស្សធម៌ដែលសង្គ្រាមនេះបានបង្កើត។
លោក Netanyahu ក៏ចង់បង្ហាញរូបភាពនៃរដ្ឋបុរសដ៏គួរឱ្យគោរពមួយរូបសម្រាប់អ្នករិះគន់កាន់តែខ្លាំងឡើងនៅអ៊ីស្រាអែល។ ប៉ុន្តែកិច្ចការនោះមានភាពស្មុគស្មាញដោយសារទស្សនៈបែកខ្ញែកគ្នារបស់ពលរដ្ឋអាមេរិកាំងលើអ៊ីស្រាអែល និងសង្រ្គាមដែលបានលេចចេញជាបញ្ហាសំខាន់ក្នុងការបោះឆ្នោតប្រធានាធិបតីអាមេរិក។
បាតុកររាប់រយនាក់ បានប្រមូលផ្តុំគ្នាកាលពីថ្ងៃពុធ នៅក្បែរអាគាររដ្ឋសភាសហរដ្ឋអាមេរិក ថ្កោលទោសសង្គ្រាមរបស់អ៊ីស្រាអែលនៅតំបន់ហ្កាហ្សា និងលោកនាយករដ្ឋមន្ត្រីអ៊ីស្រាអែល Benjamin Netanyahu នៅប៉ុន្មានម៉ោងមុនលោកឡើងថ្លែងសុន្ទរកថា ទៅកាន់សមាជិកសភា។
បាតុករកាន់បដាដែលសរសេរថា «ចាប់ខ្លួន Netanyahu » និងថា «បញ្ចប់ជំនួយអាមេរិកទាំងអស់ទៅឱ្យអ៊ីស្រាអែល។ ពួកគេនាំគ្នាស្រែកថា «ដោះលែងប៉ាឡេស្ទីន» មួយថ្ងៃក្រោយពីបានអង្គុយធ្វើបាតុកម្ម នៅក្នុងអគារការិយាល័យសភាមួយ ដែលបានបញ្ចប់ទៅដោយមានការចាប់ខ្លួនជាច្រើននាក់។
បាតុករមួយចំនួនបានធ្វើរូបសំណាកលោក Netanyahu យ៉ាងធំមួយ ដែលមានស្នែង និងឈាមហូរចេញពីមាត់រូបសំណាកនោះ។ ប៉ូលិសដែលយាមល្បាតតាមបណ្តោយរុក្ខវិថី Pennsylvania បាននាំខ្លួនមនុស្សមួយចំនួន ដែលបានអង្គុយលើផ្លូវ ចេញពីកន្លែង។
មេដឹកនាំបាតុករបាននិយាយថា ផ្លូវកែង៦ដែលស្ថិតនៅតាមបណ្តោយផ្លូវឆ្ពោះទៅកាន់អគារសភាត្រូវបាន«កាន់កាប់ដោយជនជាតិប៉ាឡេស្ទីន»។ ក្រុមអ្នករៀបចំបាតុកម្ម បាននិយាយពីមុនមកថា ពួកគេព្យាយាមរាំងផ្លូវរបស់លោក Netanyahu ទៅកាន់អគារសភា។
អ្នកស្រី Zeina Hutchinson នាយិកាគណៈកម្មាធិការអភិវឌ្ឍន៍សម្រាប់ការប្រឆាំងនឹងការរើសអើងលើជនជាតិអាមេរិកាំងដើមកំណើតអារ៉ាប់ បានអានឈ្មោះអ្នកកាសែតប៉ាឡេស្ទីនដែលត្រូវបានយោធាអ៊ីស្រាអែលសម្លាប់។
បាតុករខ្លះបានថ្កោលទោសអ៊ីស្រាអែលប៉ុន្តែអ្នកខ្លះទៀត បានសម្តែងការគាំទ្រ ស្របពេលជាមួយការទាមទារឱ្យលោក Netanyahu ធ្វើកិច្ចព្រមព្រៀងឈប់បាញ់មួយ នៅក្នុងសង្គ្រាមជាមួយក្រុមហាម៉ាស់ ហើយនាំខ្លួនជនចំណាប់ខ្មាំង ដែលកំពុងស្ថិតនៅក្រោមការឃុំឃាំងរបស់ពួកកងជីវពល ត្រឡប់ទៅជួបជុំគ្រួសាររបស់ពួកគេវិញ។
ប៉ូលិសការពារអគារសភា បាននិយាយថាមនុស្សប្រហែល២០០នាក់ ត្រូវបានចាប់ខ្លួន កាលពីថ្ងៃអង្គារ ក្នុងបទចោទទាក់ទងនឹងការអង្គុយតវ៉ានៅក្នុងអគារការិយាល័យរដ្ឋសភាមួយ៕
លោក Netanyahu ថ្លែងសុន្ទរកថាខ្លាំងៗនៅសភាអាមេរិកាំងដើម្បីស្វែងរកការគាំទ្រសង្គ្រាមនៅហ្កាហ្សា
នាយករដ្ឋមន្ត្រីអ៊ីស្រាអែលលោក Benjamin Netanyahu ថ្លែងទៅកាន់សភាអាមេរិកនៅក្នុងរដ្ឋធានីវ៉ាស៊ីនតោន។
វ៉ាស៊ីនតោន —