អ្នកស្រី Kristalina Georgieva បានព្រមានថា ការឆ្លងរាតត្បាតនៃមេរោគកូរ៉ូណាប្រភេទថ្មី ដែលបង្កឲ្យកើតជំងឺ COVID-19 កំពុងតែបង្កឲ្យមានវិបត្តិសេដ្ឋកិច្ចដ៏អាក្រក់បំផុត តាំងពីមហាវិបត្តិសេដ្ឋកិច្ច ឬ The Great Depression កាលពីទសវត្សរ៍ ១៩៣០ មក និងតម្រូវឲ្យមានការឆ្លើយតបដ៏មហិមាមួយ ដើម្បីធានាឲ្យមានការងើបឡើងវិញនៃសេដ្ឋកិច្ច។
នៅក្នុងវីដេអូចេញផ្សាយមុនការមកដល់នូវកិច្ចប្រជុំរដូវផ្ការីកតាមអនឡាញឆ្នាំ ២០២០ នាយិកាមូលនិធិរូបិយវត្ថុអន្តរជាតិបាននិយាយថា សូម្បីតែនៅក្នុងករណីដែលល្អបំផុត មូលនិធិរូបិយវត្ថុអន្តរជាតិរំពឹងថា សេដ្ឋកិច្ចនឹង «ងើបឡើងវិញមួយផ្នែក» តែប៉ុណ្ណោះនៅឆ្នាំក្រោយ នេះបើសន្មតក្នុងករណីថាមេរោគនេះនឹងថមថយនៅចុងឆ្នាំនេះ ដែលអនុញ្ញាតឲ្យអាជីវកម្មបើកដំណើរការធម្មតាឡើងវិញ ក្រោយពីបម្រាមនៃការបិទដើម្បីទប់ទល់នឹងមេរោគនេះត្រូវបានដកចេញ។
អ្នកស្រីព្រមានថា៖ «ស្ថានភាពអាចអាក្រក់ជាងនេះ» ហើយ «មានភាពស្រពិលស្រពិលយ៉ាងខ្លាំងទាក់ទិននឹងស្ថានការណ៍នេះនៅពេលអនាគត» និងទាក់ទិននឹងរយៈពេលនៃការឆ្លងរាលដាលនៃមេរោគនេះ។
មុនការឆ្លងរាតត្បាតនៃជំងឺ COVID-19 នេះកើតឡើង អ្នកស្រី Georgieva បានលើកឡើងថា មូលនិធិរូបិយវត្ថុអន្តរជាតិបានព្យាករណ៍ថា កំណើនប្រាក់ចំណូលជាមធ្យមនៅក្នុងប្រទេសចំនួន ១៦០ មានលក្ខណៈវិជ្ជមាន។ ប៉ុន្តែឥឡូវនេះ មូលនិធិនេះមើលឃើញថាប្រាក់ចំណូលជាធម្យមរបស់ពលរដ្ឋក្នុងប្រទេសជាង ១៧០ នឹងធ្លាក់ចុះ។
អ្នកស្រីបាននិយាយថា បណ្ដាប្រទេសកំពុងអភិវឌ្ឍន៍បានបាត់បង់ប្រាក់ប្រមាណ ១០០ ពាន់លានដុល្លាររួចទៅហើយនៅក្នុងការវិនិយោគ ដែលចំនួននេះគឺច្រើនជាង ៣ ដងនៃទឹកប្រាក់ដែលបាត់បង់ក្នុងអំឡុងពេលវិបត្តិសេដ្ឋកិច្ចពិភពលោកឆ្នាំ ២០០៨ ទៅទៀត។
ខណៈពេលដែលប្រទេសជាច្រើនបានបោះជំហានក្នុងសកម្មភាពស្ដារឡើងវិញមួយដែលមានទំហំទឹកប្រាក់រួមបញ្ចូលគ្នាចំនួនប្រមាណ ៨ ទ្រីលានដុល្លារ ដើម្បីជួយស្ដារសេដ្ឋកិច្ចរបស់ពួកគេ និងជួយដល់អាជីវកម្មនានា អ្នកស្រី Georgieva បានជំរុញរដ្ឋាភិបាលទាំងនោះឲ្យធ្វើអ្វីៗបន្ថែមទៀតដើម្បីផ្ដល់ «ដង្ហើមជីវិត» ដល់អាជីវកម្ម និងក្រុមគ្រួសារនានា ដើម្បី «ចៀសផុតពីការធ្វើឲ្យមានស្លាកស្នាមដល់សេដ្ឋកិច្ច ដែលពិបាកនឹងស្ដារឡើងវិញ»។
នៅថ្ងៃអង្គារទី ១៤ ខែមេសា មូនិធិរូបិយវត្ថុអន្តរជាតិនឹងចេញរបាយការណ៍ស្តីអំពីទស្សនវិស័យសេដ្ឋកិច្ចពិភពលោក ឬ World Economic Outlook ដែលមានការព្យាករណ៍សម្រាប់ប្រទេសជាសមាជិកនៅក្នុងឆ្នាំនេះ និងឆ្នាំបន្ទាប់៕
ប្រែសម្រួលដោយ សឿន វឌ្ឍនា