មូលនិធិរូបិយវត្ថុអន្តរជាតិ (IMF) បានអនុម័តកញ្ចប់ថវិកាសង្គ្រោះជិត ៣ ពាន់លានដុល្លារសម្រាប់ប្រទេសស្រីលង្កា បន្ទាប់ពីមានការចរចាអស់រយៈពេលជាច្រើនខែកន្លងមកជាមួយនឹងប្រទេសដីកោះនៅអាស៊ីខាងត្បូងដែលមានវិបត្តិសេដ្ឋកិច្ចមួយនេះ។
មូលនិធិ IMF បានប្រកាសកាលពីថ្ងៃចន្ទថា ខ្លួននឹងផ្ដល់ថវិកាភ្លាមៗប្រហែល ៣៣៣ លានដុល្លារទៅឱ្យរដ្ឋាភិបាលស្រីលង្កា និងបានបញ្ជាក់ថា ស្រីលង្កាត្រូវតែធ្វើកំណែទម្រង់សេដ្ឋកិច្ចមួយចំនួននិងយុទ្ធសាស្ត្រប្រឆាំងនឹងអំពើពុករលួយជាផ្នែកមួយនៃកិច្ចព្រមព្រៀងជួយសង្គ្រោះនេះ។
កញ្ចប់ថវិកាសង្គ្រោះនេះត្រូវបានអនុម័តបន្ទាប់ពីប្រទេសចិន ឥណ្ឌា និងជប៉ុន ដែលជាប្រទេសផ្ដល់កម្ចីច្រើនជាងគេបំផុតឱ្យប្រទេសស្រីលង្កា បានយល់ព្រមចំពោះយុទ្ធសាស្ត្ររៀបចំលក្ខខណ្ឌបំណុលឡើងវិញ។
ខុទ្ទកាល័យរបស់ប្រធានាធិបតីស្រីលង្កាលោក Ramil Wickremesinghe បានចេញសេចក្ដីថ្លែងការណ៍មួយដោយបញ្ជាក់ថា កិច្ចព្រមព្រៀងនេះនឹងធ្វើឱ្យថវិកាសង្គ្រោះដែលបានមកពីមូលនិធិ IMF និងស្ថាប័នហិរញ្ញវត្ថុអន្តរជាតិផ្សេងទៀតសម្រាប់ប្រទេសស្រីលង្កាឡើងដល់ ៧ ពាន់លានដុល្លារ។
លោក Wickremesinghe បានធ្វើកំណែទម្រង់សេដ្ឋកិច្ចមួយចំនួនរួចហើយ ដែលក្នុងនោះរួមមានទាំងការដំឡើងពន្ធលើប្រាក់ចំណូលនិងការបញ្ចប់ការឧបត្ថម្ភធនដ៏ច្រើនរបស់រដ្ឋាភិបាលសម្រាប់វិស័យប្រេងឥន្ធនៈនិងអគ្គិសនីផងដែរ។
សេដ្ឋកិច្ចផ្អែកលើទេសចរណ៍របស់ប្រទេសស្រីលង្កាបានរងការបំផ្លិចបំផ្លាញដោយសារវិបត្តិជំងឺកូវីដ១៩ ក៏ដូចជាការសម្រេចចិត្តមួយចំនួនដែលជះផលអាក្រក់ដែលធ្វើឡើងដោយលោកអតីតប្រធានាធិបតី Gotabaya Rajapaksa ដែលបានធ្វើឱ្យហិនហោចដល់ថវិកាបម្រុងបរទេសរបស់ប្រទេសស្រីលង្កានិងធ្វើឱ្យប្រទេសនេះគ្មានលទ្ធភាពក្នុងការនាំចូលម្ហូបអាហារ ប្រេងឥន្ធនៈ ឬក៏ថ្នាំពេទ្យផ្សេងៗ។ ពលរដ្ឋស្រីលង្កាត្រូវទ្រាំទ្រជាមួយនឹងការគ្មានថាមពលប្រើប្រាស់រយៈពេលវែងអស់រយៈពេលជាច្រើនថ្ងៃ។
វិបត្តិសេដ្ឋកិច្ចនៅស្រីលង្កានេះបានបង្កឱ្យមានការបះបោររបស់ប្រជាពលរដ្ឋដែលជារឿយៗមានលក្ខណៈហិង្សាដែលធ្វើឱ្យលោក Gotabaya Rajapaksa គេចចេញពីប្រទេសនិងលាលែងពីតំណែង ដែលធ្វើឱ្យការក្ដោបក្ដាប់អំណាចនយោបាយរយៈពេល ២ ទសវត្សរ៍របស់គ្រួសារលោកឈានដល់ទីបញ្ចប់។
បងប្អូនប្រុសរបស់លោកដែលមានឈ្មោះ Mahinda និងឈ្មោះ Basil ក៏បានលាលែងពីតំណែងជានាយករដ្ឋមន្ត្រីនិងរដ្ឋមន្ត្រីហិរញ្ញវត្ថុផងដែរ នៅចំពេលដែលមានបាតុកម្មប្រឆាំងរដ្ឋាភិបាលនេះ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP , Reuters និង AFP។
IMF អនុម័តថវិកាសង្គ្រោះសេដ្ឋកិច្ចជិត ៣ ពាន់លានដុល្លារសម្រាប់ស្រីលង្កា
IMF អនុម័តថវិកាសង្គ្រោះសេដ្ឋកិច្ចជិត ៣ ពាន់លានដុល្លារសម្រាប់ស្រីលង្កា។