ប្រមុខដឹកនាំរដ្ឋាភិបាលកម្ពុជា បានថ្លែងសារព្រមានធ្ងន់ៗ អំពីលទ្ធភាពនៃការរំលាយចោលគណបក្សនយោបាយ ដែលហ៊ានចេញមុខការពារមេដឹកនាំរបស់ខ្លួន ដែលត្រូវបានចាប់ខ្លួន ក្រោមបទចោទប្រកាន់ថា បានប្រព្រឹត្តអំពើ «ក្បត់ជាតិ»។
លោកនាយករដ្ឋមន្ត្រី ហ៊ុន សែន បានព្រមានខ្លាំងៗកាលពីថ្ងៃអាទិត្យថា គណបក្សសង្គ្រោះជាតិ អាចប្រឈមមុខនឹងការរំលាយចោល ប្រសិនបើគណបក្សនេះ ចេញមុនមកការពារប្រធានរបស់ខ្លួនដែលត្រូវបានអាជ្ញាធរចាប់ខ្លួននោះ។
ការថ្លែងព្រមានរបស់លោក ហ៊ុន សែន បែបនេះ ធ្វើឡើងនៅពេលដែលលោកជួបសំណេះសំណាលជាមួយកម្មករ និងកម្មការិនីរោងចក្រកាត់ដេរជាច្រើនពាន់នាក់នៅមជ្ឈមណ្ឌលកោះពេជ្រ តែប៉ុន្មានម៉ោងប៉ុណ្ណោះ ក្រោយពីមេដឹកនាំបក្សប្រឆាំងគឺលោក កឹម សុខា ត្រូវបានចាប់ខ្លួននៅគេហដ្ឋានរបស់លោកក្នុងក្រុងភ្នំពេញ កាលពីរំលងអធ្រាត្រ ថ្ងៃទី២ ឈានចូលថ្ងៃទី ៣ ខែកញ្ញានេះ។
«បើសិនជាបក្សចេញមុខ មកការពារបុគ្គលធ្វើខុសច្បាប់ បក្សក៏ប្រឈមមុខជាមួយនឹងការត្រូវរំលាយចោលដែរ»។
រដ្ឋាភិបាលកម្ពុជា បានលើកឡើងថា ការចាប់ខ្លួនលោក កឹម សុខា ទាំងរំលងអធ្រាត្រនេះ គឺអនុលោមតាមក្រមនីតិវិធីព្រហ្មទណ្ឌរបស់កម្ពុជា ដោយសារអាជ្ញាធរបានរកឃើញភស្តុតាងនៃបទល្មើសជាក់ស្ដែងអំពីអ្វីមួយដែលអាជ្ញាធរហៅថាជា«ផែនការសម្ងាត់នៃការឃុបឃិតគ្នា»រវាងលោក កឹម សុខា និងបក្សពួកជាមួយបរទេស។
រដ្ឋាភិបាល បានភ្ជាប់ក្លិបវីដេអូមួយ ដែលបង្ហាញលោក កឹម សុខា ថ្លែងទៅកាន់អ្នកគាំទ្ររបស់លោកនៅប្រទេសអូស្ត្រាលី អំពីយុទ្ធសាស្ត្ររបស់គណបក្សប្រឆាំង ក្នុងការដណ្ដើមជ័យជម្នះពីបក្សកាន់អំណាចនៅក្នុងការបោះឆ្នោត ប៉ុន្តែលោក ហ៊ុន សែន ដែលកាន់អំណាចជាង៣០ឆ្នាំមកហើយនោះ បានចាត់ទុកការថ្លែងសារនយោបាយនិងទង្វើរបស់លោក កឹម សុខា នោះថាជា «អំពើក្បត់ជាតិ» ដោយមានបរទេសជួយពីក្រោយ។
«កុំថាប្រទេសនេះផ្ដាច់ការណា។ រដ្ឋអធិបតេយ្យមួយ មិនអាចឲ្យបរទេសមកធ្វើរបៀបនេះបានទេ។ នេះជាអំពើក្បត់ជាតិ លក់ផលប្រយោជន៍ជាតិ ឲ្យបរទេស គ្រាន់តែដើម្បីផ្ដួលរំលំ និងឡើងកាន់អំណាចខ្លួនឯង»។
ការព្រមានរំលាយបក្សប្រឆាំងថែមទៀត ក្រោយពីមានការចាប់ខ្លួនមេបក្សនេះ កើតឡើង បន្ទាប់ពីរដ្ឋាភិបាលបានចាត់វិធានការរឹតបន្តឹងជាបន្តបន្ទាប់ទៅលើក្រុមអង្គការក្រៅរដ្ឋាភិបាលជាតិនិងអន្តរជាតិ សង្គមស៊ីវិល និងប្រព័ន្ធផ្សព្វផ្សាយមួយចំនួន ដែលហ៊ានរិះគន់រដ្ឋាភិបាល។
ក្នុងនោះ រដ្ឋាភិបាល បានសម្រេចបិទការិយាល័យតំណាងរបស់អង្គការអន្តរជាតិ NDI នៅកម្ពុជានិងបណ្ដេញបុគ្គលិកបរទេសរបស់អង្គការនេះចេញពីកម្ពុជា ហើយក៏បានព្រមានបិទកាសែត The Cambodia Daily ប្រសិនបើកាសែតនេះ មិនព្រមបង់ពន្ធជូនរដ្ឋនូវទឹកប្រាក់ចំនួនជាង៦លានដុល្លារអាមេរិក ដែលរដ្ឋាភិបាល អះអាងថា កាសែតនេះ បានជំពាក់រដ្ឋ។
រដ្ឋាភិបាល ក៏បានបង្គាប់ឲ្យស្ថានីយវិទ្យុក្នុងស្រុក ដែលផ្សាយបន្តឬផ្សាយឡើងវិញនូវកម្មវិធីព័ត៌មានរបស់វិទ្យុសំឡេងសហរដ្ឋអាមេរិក និងវិទ្យុអាស៊ីសេរី បញ្ឈប់ការចាក់ផ្សាយកម្មវិធីព័ត៌មានរបស់វិទ្យុទាំងពីរនេះ ដែលឧបត្ថម្ភថវិកាដោយរដ្ឋាភិបាលអាមេរិកផងដែរ។
លោក ហ៊ុន សែន ថ្លែងថា ចំណាត់ការរបស់រដ្ឋាភិបាលទៅលើមេដឹកនាំបក្សប្រឆាំងនៅពេលនេះ គឺដើម្បីបញ្ចៀសកុំឲ្យកម្ពុជា ជាន់ដានប្រវត្តិសាស្ត្រកាលពីសម័យលន់ នល់។
«អាមេរិកាំងធ្លាប់ធ្វើរឿងនេះជាមួយ លន់ នល់។ ឥឡូវ អាមេរិកាំង ក៏ធ្វើរឿងនេះជាមួយ កឹម សុខា»។
លោក ហ៊ុន សែន ក៏បានថ្លែងព្រមានសហរដ្ឋអាមេរិក កុំឲ្យលូកដៃចូលក្នុងកិច្ចការផ្ទៃក្នុងរបស់កម្ពុជាផងដែរ ប៉ុន្តែគណបក្សសង្គ្រោះជាតិ រួមទាំងសហគមន៍ជាតិនិងអន្តរជាតិ បានអំពាវនាវឲ្យរដ្ឋាភិបាលកម្ពុជា ដោះលែងលោក កឹម សុខា វិញ «ជាបន្ទាន់និងដោយឥតលក្ខខណ្ឌ» ដើម្បីធានាថា ការបោះឆ្នោតជាតិឆ្នាំ២០១៨ខាងមុខ នឹងមានភាពគួរឲ្យជឿជាក់ និងទទួលយកបានពីគ្រប់ភាគីពាក់ព័ន្ធទាំងអស់៕