ស្របពេលដែលសហភាពអឺរ៉ុបបន្តដំណើរការត្រៀមដកកម្ពុជាពីប្រព័ន្ធឋានអនុគ្រោះពន្ធពាណិជ្ជកម្មមួយ ដែលអាចឲ្យកម្ពុជាខាតបង់ប្រមាណ ៦៥៤ លានដុល្លារក្នុងមួយឆ្នាំៗនោះ លោកនាយករដ្ឋមន្ត្រី ហ៊ុន សែន បានលើកពីមោទនភាពនៃគោលនយោបាយឈ្នះ-ឈ្នះរបស់លោក នៅទីក្រុងបាងកក ប្រទេសថៃ។
លោកហ៊ុន សែន លើកឡើងថា ផ្តើមចេញពីគោលនយោបាយឈ្នះ-ឈ្នះដែលបានពន្លត់ភ្លើងសង្គ្រាមនៅកម្ពុជា កំណើនសេដ្ឋកិច្ចប្រទេសនេះបានស្ថិតក្នុងស្ថានភាពរឹងមាំរយៈពេល ២០ ឆ្នាំចុងក្រោយនេះ។
នាយករដ្ឋមន្ត្រីកម្ពុជា លោកហ៊ុន សែន នៅថ្ងៃចន្ទនេះ បានលើកសរសើរពីគោលនយោបាយឈ្នះ-ឈ្នះរបស់លោក ដែលបានផ្តល់សន្តិភាពដល់កម្ពុជាពេញលេញតាំងពីឆ្នាំ ១៩៩៨ មក។ លោកចាត់ទុកថា សន្តិភាពគឺជាបុរេលក្ខខណ្ឌដ៏ចម្បង និងសំខាន់បំផុត សម្រាប់កសាងខឿនសេដ្ឋកិច្ច និងអភិវឌ្ឍសង្គមជាតិ។
អត្ថាធិប្បាយរបស់មេដឹកនាំយូរឆ្នាំរបស់កម្ពុជារូបនេះ បានធ្វើឡើងនៅក្នុងទីក្រុងបាងកក ប្រទេសថៃ ទីដែលលោកបានឡើងថ្លែងក្នុងសន្និបាតប្រចាំឆ្នាំលើកទី៧៥ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN-ESCAP) ក្រោមប្រធានបទ៖ «ការផ្តល់សិទ្ធិអំណាចជូនប្រជាជន និងការធានានូវបរិយាប័ន្ន និងសមភាព»។ ការធានានូវបរិយាប័ន្ន មានន័យថា ការធ្វើសេចក្តីសម្រេចចិត្តលើគោលនយោបាយមួយ ដែលនឹងគ្រប់ដណ្តប់រាល់ពលរដ្ឋ ដោយមិនប្រកាន់ជំនឿ សាសនា និងនិន្នាការនយោបាយ។
ផ្តើមចេញពីគោលនយោបាយឈ្នះ-ឈ្នះនេះ លោកហ៊ុន សែន ដែលជាអតីតទាហានខ្មែរក្រហមមួយរូបអះអាងថា សេដ្ឋកិច្ចកម្ពុជាបានសម្រេចកំណើនជាមធ្យមក្នុងរង្វង់ ៧,៧ ភាគរយ ក្នុងមួយឆ្នាំ ក្នុងរយៈពេលជាង ២ទសវត្សរ៍ចុងក្រោយនេះ។ លោកបន្តថា អត្រាភាពក្រីក្រនៅកម្ពុជា បានបន្តធ្លាក់ចុះជាលំដាប់ពីជាង ៥៣ ភាគរយ ក្នុងឆ្នាំ ២០០៤ មកត្រឹម ១៣,៥ ភាគរយ ក្នុងឆ្នាំ ២០១៤ ហើយត្រូវបានប៉ាន់ស្មានថា ស្ថិតក្នុងរង្វង់ ១០ ភាគរយនាបច្ចុប្បន្ន។
លោកហ៊ុន សែន សង្កត់ធ្ងន់ថា ជាមួយនឹងការវិវត្តន៍ជាវិជ្ជមាន ក្រោយបានសន្តិភាព ២០ ឆ្នាំមកនេះ ប្រជាពលរដ្ឋខ្មែរបានចូលរួមរក្សាសន្តិភាពរបស់ប្រទេស។
«លើមូលដ្ឋាននៃបទពិសោធន៍នេះ ប្រជាជាតិកម្ពុជាទាំងមូល ផ្តល់តម្លៃខ្ពស់បំផុត ចំពោះការខិតខំបន្តថែរក្សាសនិ្តភាព និងស្ថិរភាព ព្រមទាំងការជំរុញកិច្ចអភិវឌ្ឍ ប្រកបដោយបរិយាប័ន្ន ដែលបច្ចុប្បន្ននេះ កំពុងតែហុចផ្លែផ្កា យ៉ាងពិតប្រាកដ ជាប្រយោជន៍ជូនដល់ពលរដ្ឋកម្ពុជា នៅគ្រប់ឆកល្ហកក្នុងផ្ទៃប្រទេស»។
ការប្រកាសរបស់លោកហ៊ុន សែន អំពីវឌ្ឍនភាពខាងសង្គម និងសេដ្ឋកិច្ចរបស់កម្ពុជាក្នុងរយៈពេល ២០ ឆ្នាំចុងក្រោយនេះ កើតមានឡើង នៅស្របពេលដែលសហភាពអឺរ៉ុបបានកំពុងដំណើរការនីតិវិធីដែលមានរយៈពេល ១៨ ខែ ដើម្បីពិនិត្យដកកម្ពុជាជាបណ្តោះអាសន្នចេញពីប្រពន្ធឋានៈអនុគ្រោះពន្ធ «អ្វីៗទាំងអស់លើកលែងតែអាវុធ» ឬហៅថា EBA ដោយសារតែការធ្លាក់ថយក្រោយនៃការគោរពសិទ្ធិមនុស្ស និងអនុវត្តលទ្ធិប្រជាធិបតេយ្យ។
ចំណាត់ការនេះបានធ្វើឲ្យសភាពាណិជ្ជកម្មកម្ពុជា និងតំណាងខាងវិស័យឯកជនផ្សេងទៀត មានទាំងខាងសភាពាណិជ្ជកម្មសហភាពអឺរ៉ុប សមាគមរោងចក្រកាត់ដេរនៅកម្ពុជា ឬហៅថា GMAC និងក្រុមសហជីពបម្រើប្រយោជន៍កម្មករ បានលើកឡើងថា នឹងមានការខូចខាតធ្ងន់ធ្ងរមកលើសេដ្ឋកិច្ចកម្ពុជា ប្រសិនបើប្រទេសនេះបាត់បង់ប្រព័ន្ធឋានៈអនុគ្រោះពន្ធ EBA។
GMAC បានបញ្ជាក់ថា ការផ្អាកបណ្តោះអាសន្ននូវកម្មវិធីអនុគ្រោះពន្ធ EBA ឬក៏ការដាក់ទណ្ឌកម្មឯកតោភាគីរយៈពេលខ្លីណាមួយ អាចនឹងមានផលប៉ះពាល់រយៈពេលវែងលើជីវិតកម្មករយ៉ាងហោចណាស់ ៧០ ម៉ឺននាក់ និងគ្រួសាររបស់ពួកគេ។
ចំណាត់ការរបស់សហភាពអឺរ៉ុបទៅលើការដកប្រព័ន្ធអនុគ្រោះពន្ធនេះ កើតមានឡើង ក្រោយពីមានការបង្ក្រាបលើអ្នកនយោបាយគណបក្សប្រឆាំង ការគាបសង្កត់អង្គការសង្គមស៊ីវិលដែលទទួលថវិកាពីរដ្ឋាភិបាលសហរដ្ឋអាមេរិក និងការបិទប្រព័ន្ធផ្សព្វផ្សាយឯករាជ្យមួយចំនួន រួមទាំងការរំលោភសេរីភាពផ្សេងៗជាច្រើនទៀត មានដូចជាការរំលោភសិទ្ធិដីធ្លីជាដើម។
យ៉ាងណាក៏ដោយ ដើម្បីជាការរំឭកដល់ជោគជ័យនៃគោលនយោបាយឈ្នះ-ឈ្នះរបស់លោកនោះ លោកហ៊ុន សែន បានកសាងវិមានមួយ ដោយឲ្យឈ្មោះថា «វិមានអនុស្សាវរីយ៍នយោបាយឈ្នះ-ឈ្នះ»។
ក៏ប៉ុន្តែលោក រ៉ុង ឈុន ដែលជាអតីតសមាជិកមួយរូបរបស់គណៈកម្មាធិការជាតិរៀបចំការបោះឆ្នោត (គ.ជ.ប) ធ្លាប់លើកឡើងថា ការសាងសង់វិមានឈ្នះ-ឈ្នះ របស់រដ្ឋាភិបាល មិនបានឆ្លុះបញ្ចាំងពីស្ថានភាពជាក់ស្ដែងនៅកម្ពុជានោះទេ ដោយហេតុថា កម្ពុជាមិនមានសង្គ្រាមពិតមែននាពេលបច្ចុប្បន្ននេះ តែមានការព្យាបាទខាងនយោបាយ និងការរំលោភបំពានសិទ្ធិមនុស្ស ដែលបានធ្វើឲ្យប្រទេសនេះរងការថ្កោលទោសជាលក្ខណៈអន្តរជាតិផងដែរ៕