សកម្មជនសហគមន៍ខ្មែរបានរៀបចំពិធីជួបជុំគ្នាមួយនៅទីក្រុងឡុងប៊ិច រដ្ឋ California កាលពីថ្ងៃសៅរ៍ដើម្បីសម្តែងការដឹងគុណលោក Alan Lowenthal សមាជិករដ្ឋសភាប្រចាំមណ្ឌលទី៤៧នៃរដ្ឋ California ដែលត្រូវចូលនិវត្តន៍បន្ទាប់ពីបម្រើការងារជាតំណាងរបស់ពួកគេអស់រយៈពេល១០ឆ្នាំ។
បើទោះបីជាលោក Alan Lowenthal បានកាន់ការជាសមាជិករដ្ឋសភារយៈពេលខ្លីប៉ុន្តែលោកបម្រើការងារលើវិស័យនយោបាយរយៈពេល៣០ឆ្នាំដោយចាប់ផ្តើមពីសមាជិកក្រុមប្រឹក្សាក្រុងឡុងប៊ិច នៅឆ្នាំ១៩៩២ និងជាសមាជិករដ្ឋសភាថ្នាក់រដ្ឋក្នុងឆ្នាំ១៩៩៨ រហូតដល់ជាប់ឆ្នោតជាសមាជិកព្រឹទ្ធសភាថ្នាក់រដ្ឋនៃរដ្ឋ California នៅឆ្នាំ២០០៤។ លោកបានតំណែងនេះ រយៈពេល១០ឆ្នាំមុនពេលលោកជាប់ឆ្នោតជាសមាជិករដ្ឋសភាថ្នាក់ជាតិប្រចាំមណ្ឌលទី៤៧នេះ។ មណ្ឌលនេះគ្របដណ្តប់លើទីក្រុងឡុងប៊ិច ជាទីដែលមានពលរដ្ឋខ្មែររស់នៅជាង៥ម៉ឺននាក់ហើយគឺជាសហគមន៍ខ្មែរដែលធំជាងគេបង្អស់នៅក្រៅប្រទេស។
លោក ឆល សុង អនុប្រធានក្រុមអ្នករៀបចំកម្មវិធីបានបញ្ជាក់ប្រាប់វីអូអេថា៖
«កិច្ចការរបស់គាត់ដែលមានតួនាទីជាអ្នកតំណាងរាស្ត្រគឺមានសារៈសំខាន់ដែលគាត់តែងតែព្យាយាមធ្វើការប្រមូលភោគផលទាំងឡាយផ្តល់ទៅដល់សហគមន៍ដែលនៅក្នុងតំបន់របស់គាត់ជាពិសេសនៅក្នុងទីក្រុងឡុងប៊ិចតែម្តង»។
សមាជិករដ្ឋសភាវ័យ៨១ឆ្នាំរូបនេះត្រូវបានគេទទួលស្គាល់និងដឹងគុណចំពោះស្នាដៃរបស់លោកក្នុងការជួយលើវិស័យជាច្រើនដូចជាសេដ្ឋកិច្ច សង្គមកិច្ច សុខាភិបាល អប់រំសិក្សាធិការ សិទ្ធិមនុស្សនិងនយោបាយ។
ពិធីដ៏ពិសេសនេះបានទាក់ទាញអ្នកចូលរួមជិត៣០០នាក់ហើយភាគច្រើនក្នុងចំណោមនេះគឺជាអ្នកដែលជីវិតរបស់ពួកគេត្រូវបានផ្លាស់ប្តូរនិងប្រសើរឡើងដោយសារការយកចិត្តទុកដាក់របស់លោក Alan Lowenthal។ អ្នកចូលរួមដែលមានមនុស្សវ័យក្មេងរហូតដល់វ័យចំណាស់បានយកឱកាសដ៏កម្រនេះថ្លែងអំណរលោកនិងបានធ្វើជាកាដូអនុស្សាវរីយ៍ជូនលោកទៀតផង។
អ្នកស្រីស៊ូលី សារ៉ូសមាជិកក្រុមប្រឹក្សាទីក្រុងឡុងប៊ិចនិងជាចៅសង្កាត់លេខ៦យល់ថាលោក Lowenthal ស្រឡាញ់ពលរដ្ឋគ្រប់ៗគ្នានៅក្នុងមណ្ឌលរបស់លោកនិងអបអរសាទរស្នាដៃនិងការចូលនិវត្តន៍របស់លោក។
អ្នកស្រីស៊ូលី សារ៉ូបានបញ្ជាក់ប្រាប់វីអូអេថា៖
«គាត់សំខាន់ណាស់នៅទីក្រុងឡុងប៊ិចគឺមិនសម្រាប់តែខ្មែរយើងទេគឺគាត់ធ្វើការច្រើន។ ខាងខ្ញុំគោរពគាត់ជាងគេ។ គាត់មានបេះដូងល្អ។ គាត់ដឹកនាំដោយបេះដូងមិនមែនដោយអំណាចលុយកាក់ទេ។ គាត់ធ្វើការល្អ។ ខ្ញុំគោរពគាត់ជាងគេ»។
សកម្មជនសហគមន៍ខ្មែរដែលមានអ្នកខ្លះគាំទ្រគណបក្សសាធារណរដ្ឋនិងអ្នកខ្លះគាំទ្រគណបក្សប្រជាធិបតេយ្យក្នុងនយោបាយនៅសហរដ្ឋអាមេរិកយល់ថាលោកAlan Lowenthal បានធ្វើការដោយមិនប្រកាន់និន្នាការនយោបាយដើម្បីសម្រេចតាមការចង់បានរបស់អ្នកបោះឆ្នោតរបស់លោកបើទោះបីជាលោកមកពីគណបក្សប្រជាធិបតេយ្យក៏ដោយ។ ក្នុងចំណោមនេះរួមមានការកាន់តំណែងជាសហប្រធានក្រុមការងារសភាទទួលបន្ទុកកិច្ចការកម្ពុជាជាមួយនឹងលោក Steve Chabot សមាជិករដ្ឋសភាមណ្ឌលទី១នៃរដ្ឋ Ohio ដែលមកពីគណបក្សសាធារណរដ្ឋ។ ក្រុមការងារនេះបានស្នើច្បាប់មួយចំនួនដើម្បីជួយលើកកម្ពស់សិទ្ធិមនុស្សនិងលទ្ធិប្រជាធិបតេយ្យកម្ពុជាក្នុងនោះមានច្បាប់ស្តីពីប្រជាធិបតេយ្យកម្ពុជាឆ្នាំ២០២១ដែលបានឆ្លងផុតរដ្ឋសភាហើយពេលនេះកំពុងស្ថិតនៅគណៈកម្មាធិការទំនាក់ទំនងការបរទេសនៃព្រឹទ្ធសភា។
លោក ឆល សុង បានបន្ថែមថា៖
«និយាយទៅគាត់ជាអ្នកជើងឯក នៅក្នុងតួនាទីមួយដែលតែងតែស្វែងរកនូវអ្វីដែលហៅថាប្រជាធិបតេយ្យនិងសិទ្ធិមនុស្សនៅខាងភូមិភាគអាស៊ីប៉ែកអាគ្នេយ៍យើងហ្នឹងជាពិសេសគឺប្រទេសកម្ពុជាយើងតែម្តង»។
រូបឯកសារ៖ លោក Alan Lowenthal (ទី៤រាប់ពីឆ្វេង) រួមជាមួយវាគ្មិនដទៃទៀត ពិភាក្សាអំពីស្ថានភាពនយោបាយក្នុងប្រទេសកម្ពុជា និងតួនាទីរបស់សហរដ្ឋអាមេរិក នៅទីក្រុង Annandale រដ្ឋ Virginia ថ្ងៃទី ៣ ខែធ្នូ ឆ្នាំ ២០១៧។ (លឹម ហ្គេចហៀង/វីអូអេ)
លោក ស ស៊ីថន ប្រធានក្រុមអ្នករៀបចំកម្មវិធីក៏បានបញ្ជាក់ប្រាប់វីអូអេដែរថា៖
«ដោយសារស្នាដៃគាត់ឃើញថាកិច្ចការច្រើនដែលថាគាត់ទៅទស្សនាស្រុកខ្មែរពេលឥឡូវហ្នឹងបើសិនជាអត់គាត់ខ្ញុំមិនជឿថាអស់លោកហ្នឹងទៅទេ។ ដោយសារឥទ្ធិពលគាត់ហ្នឹងហើយបានគាត់ធ្វើបានហ្នឹង។ អ៊ីចឹងហើយបានជាពួកយើងដែលមានការចាប់អារម្មណ៍ទៅដល់រឿងស្រុកខ្មែរហ្នឹងបានពេញចិត្តកិច្ចការទាំងអស់។ គាត់ធ្វើដូចថាយើងរំពឹងថា១០ប៉ុន្តែគាត់ធ្វើរហូតដល់១៥។ អ៊ីចឹងហើយបានជាខ្មែរយើងទូទៅមានការពេញចិត្តគាត់»។
អមដំណើរដោយសមាជិកក្រុមគ្រួសារត្រកូល Lowenthal ជាច្រើននាក់ក្នុងនោះមានកូនប្រុសរបស់លោកផង លោកAlan Lowenthal ចាត់ទុកថាវាជាថ្ងៃដ៏ល្អបំផុតសម្រាប់ជីវិតរបស់លោកដែលបានឃើញនិងឮដោយផ្ទាល់នូវមតិរបស់សហគមន៍ខ្មែរ។
លោក Alan Lowenthal បានថ្លែងថា៖
«សូមអរគុណ។ ខ្ញុំនឹងបំភ្លេចមិនបានកម្មវិធីយប់នេះទេ។ នេះគឺជាបទពិសោធដ៏ល្អអស្ចារ្យ»។
លោក Alan Lowenthal បានបន្ថែមថាលោកនឹងនៅតែបន្តការងារសង្គមក្នុងពេលចូលនិវត្តន៍នេះ៖
«ខ្ញុំនឹងមិនទៅណាឆ្ងាយទេ។ ខ្ញុំនឹងបន្តនៅទីក្រុងឡុងប៊ិចនេះ។ ខ្ញុំនឹងបន្តធ្វើការជាមួយនឹងកុមារ។ ខ្ញុំនឹងបន្តធ្វើការជាមួយនឹងសហគមន៍ហើយខ្ញុំនឹងបន្តក្រោកឈរប្រយុទ្ធដើម្បីសិទ្ធិមនុស្សនិងសមភាពសម្រាប់មនុស្សគ្រប់គ្នា»។
មណ្ឌលទី៤៧របស់លោក Alan Lowenthal ត្រូវបានបែងចែកជាថ្មីនិងបានក្លាយជាមណ្ឌលលេខ៤២វិញក្រោយពីការធ្វើជំរឿនឆ្នាំ២០២០។ បច្ចុប្បន្នលោក Robert Garcia ចៅហ្វាយក្រុងឡុងប៊ិចមកពីខាងគណបក្សប្រជាធិបតេយ្យនិងលោក John Briscoe មកពីខាងគណបក្សសាធារណរដ្ឋកំពុងប្រកួតប្រជែងយកអាសនៈនេះ។
ប៉ុន្តែលោក Alan Lowenthal បានប្រាប់ VOA ក្នុងបទសម្ភាសន៍ពិសេសនៅឯលំនៅដ្ឋានរបស់លោកថាអ្នកណាក៏ដោយដែលមកជំនួសអាសនៈរបស់លោកត្រូវតែធ្វើការឲ្យបានច្រើនជាងមុនសម្រាប់សហគមន៍ខ្មែរ៖
«ខ្ញុំគិតថាប្រសិនបើខ្ញុំធ្វើការងារបានលទ្ធផល១៥ ខណៈពេលដែលសហគមន៍ចង់បានតែ១០ពីគឺខ្ញុំរំពឹងថាអ្នកស្នងតំណែងខ្ញុំត្រូវធ្វើឲ្យបាន២០។ ខ្ញុំគិតថាយើងត្រូវតែធ្វើការងារដោយមានការចូលរួមពី គណបក្សទាំងពីរជាមួយនឹងខាងសាធារណរដ្ឋ។ ខ្ញុំគិតថាកម្ពុជាគឺជាបញ្ហាដែលទាំងគណបក្សប្រជាធិបតេយ្យនិងសាធារណរដ្ឋយល់ស្របគ្នា។ នេះគឺជាបញ្ហាមួយដែលយើងអាចឃើញពីការពិភាក្សាដេញដោលអំពីលទ្ធិប្រជាធិបតេយ្យ។ កម្ពុជាជាប្រទេសតូចប៉ុន្តែវាតំណាងឲ្យទិសដែលពិភពលោកកំពុងរេទៅរកថាតើត្រូវរេទៅរកលទ្ធិប្រជាធិបតេយ្យឬលទ្ធិផ្តាច់ការ»។
បញ្ហាដទៃទៀតដែលលោកចង់ឲ្យអ្នកស្នងតំណែងជួយដល់សហគមន៍ខ្មែរគឺគិតគូរដល់សមាជិកខ្លះដែលពុំទាន់មានសញ្ជាតិអាមេរិក ដែលបានប្រព្រឹត្តខុសហើយត្រូវប្រឈមនឹងការបណ្តេញចេញពីអាមេរិកទៅប្រទេសកម្ពុជាវិញផងដែរហើយវាជាបញ្ហាដ៏ចម្រូងចម្រាសរវាងរដ្ឋាភិបាលកម្ពុជានិងសហរដ្ឋអាមេរិកក្នុងពេលកន្លងមក។
បើទោះបីជា នៅពេលនេះលោក Alan Lowenthal ត្រូវចូលនិវត្តន៍ពីការងារជាសមាជិកសភាប៉ុន្តែលោកបានសន្យាថាការងារជួយសង្គមនឹងនៅតែស្ថិតនៅជាបេសកកម្មរបស់លោកជានិច្ចហើយ
សម្រាប់សហគមន៍ខ្មែរការងាររបស់លោកបានជួយផ្លាស់ប្តូរជីវិតនិងសង្គមខ្មែរជាច្រើនដែលពួកគេមិនអាចបំភ្លេចបាន៕