អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្តីថ្លែងការណ៍មួយ ដោយគាំទ្រការបង្គាប់របស់ចៅក្រមបារាំងឲ្យមន្រ្តីយោធាជាន់ខ្ពស់កម្ពុជាពីររូបចូលរួមក្នុងសវនាការ ពាក់ព័ន្ធនឹងការបោកគ្រាប់បែកកាលពីឆ្នាំ១៩៩៧ ហើយបានជំរុញឲ្យបារាំងស្នើប៉ូលិសអន្តរជាតិ Interpol ចាប់ខ្លួនពួកគេផងដែរ។
តុលាការបារាំងបានចេញដីកាចាប់ខ្លួនមន្រ្តីយោធាជាន់ខ្ពស់កម្ពុជាពីររូបគឺ លោក ហ៊ុយ ពិសិដ្ឋ ដែលបច្ចុប្បន្នជារដ្ឋលេខាធិការក្រសួងការពារជាតិ និងលោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ ពាក់ព័ន្ធនឹងការវាយប្រហារដោយគ្រាប់បែកដៃយ៉ាងបង្ហូរឈាមកាលពី២៥ឆ្នាំមុន នៅរាជធានីភ្នំពេញ។ ពួកគេទាំងពីរត្រូវបានចោទប្រកាន់ពីបទ«សមគំនិតប៉ុនប៉ងសម្លាប់មនុស្ស» ក្នុងព្រឹត្តិការណ៍បោកគ្រាប់បែកដែលបានសម្លាប់មនុស្ស១៦នាក់។
សេចក្តីសម្រេចចេញកាលពីថ្ងៃទី៣០ ខែធ្នូ ឆ្នាំ២០២១ ដោយចៅក្រម Sabine Khéris នៃសាលាឧទ្ធរណ៍ក្រុងប៉ារីស បានលើកឡើងថាដីកាចាប់ខ្លួនត្រូវបានចុះកាលពីថ្ងៃទី២៩ ខែមីនា ឆ្នាំ២០២០មកលើលោកឧត្តមសេនីយ៍ ហ៊ុយ ពិសិដ្ឋ ដែលកាលពីគ្រានោះ មានតំណែងជាប្រធានអង្គភាពអង្គរក្សរបស់លោកនាយករដ្ឋមន្រ្តី ហ៊ុន សែន និងលោកឧត្តមសេនីយ៍ ហ៊ីង ប៊ុនហៀង អនុប្រធានអង្គភាពអង្គរក្ស ទាក់ទងតួនាទីរបស់អ្នកទាំងពីរនៅក្នុងការរៀបចំផែនការវាយប្រហារដោយគ្រាប់បែកដៃខាងលើនេះ។
នៅក្នុងសេចក្តីថ្លែងការណ៍មួយចេញផ្សាយនៅថ្ងៃអង្គារអង្គការឃ្លាំមើលសិទ្ធិមនុស្សបានលើកឡើងថាក្រៅពីមិនបានធានានូវការស៊ើបអង្កេតដោយឯករាជ្យនិងពេញលេញ ពាក់ព័ន្ធនឹងការវាយប្រហារដោយគ្រាប់បែកដៃនេះ លោកនាយករដ្ឋមន្រ្តី ហ៊ុន សែន បែរជាកោះហៅឲ្យមានការចាប់ខ្លួនលោក សម រង្ស៊ី និងអ្នករៀបចំបាតុកម្មដទៃទៀត ហើយរារាំងពួកគេមិនឲ្យចាកចេញពីប្រទេស។
លោក Brad Adams នាយកអង្គការឃ្លាំមើលសិទ្ធិប្រចាំតំបន់អាស៊ី បាននិយាយក្នុងសេចក្តីថ្លែងការណ៍ខាងលើជាភាសាអង់គ្លេស និងត្រូវបានប្រែសម្រួលក្នុងន័យដើមថា៖ «រដ្ឋាភិបាលកម្ពុជាមិនដែលបានចាត់ការលើជនដែលទទួលខុសត្រូវចំពោះការវាយប្រហារដោយគ្រាប់បែកដៃកាលពីឆ្នាំ១៩៩៧ មកលើមេដឹកនាំគណបក្សប្រឆាំងលោក សម រង្ស៊ី និងអ្នកគាំទ្រ ពីព្រោះមានភស្តុតាងគ្រប់គ្រាន់ ដែលថា លោកនាយករដ្ឋមន្រ្តី ហ៊ុន សែន និងមេបញ្ជាការក្រោមបញ្ជារបស់លោកស្ថិតនៅពីក្រោយអំពើឃោរឃៅទ្រង់ទ្រាយធំនេះ»។
លោកបន្តថា៖ «រដ្ឋាភិបាលបារាំងគួរស្នើជាដីកាចាប់ខ្លួនពីអឺរ៉ុបនិងបញ្ជីខ្មៅរបស់ប៉ូលិសអន្តរជាតិ (Interpol Red Notice) ដើម្បីចាប់ខ្លួនលោក ហ៊ុយ ពិសិដ្ឋ និងលោក ហ៊ីង ប៊ុនហៀង និងបង្គាប់ឲ្យបង្ហាញខ្លួនក្នុងសវនាការនៅក្រុងប៉ារីស»។
វីអេអូមិនអាចទាក់ទងសុំការអធិប្បាយពីលោក ហ៊ុយ ពិសិដ្ឋ និងលោក ហ៊ីង ប៊ុនហៀង បានទេនៅថ្ងៃអង្គារនេះ។យ៉ាងណាក្តី លោក ហ៊ីង ប៊ុនហៀង បានថ្លែងប្រាប់វីអូអេកាលពីថ្ងៃទី២៥ ខែមីនាដោយហៅការសម្រេចរបស់តុលាការបារាំងថា ជាការរំលោភសិទ្ធិរបស់លោក ហើយបានបដិសេធថា លោកមិនមានវត្តមាននៅកន្លែងបាតុកម្ម ដែលមានការវាយប្រហារនោះទេ។
លោក ជិន ម៉ាលីន អ្នកនាំពាក្យក្រសួងយុត្តិធម៌ ថ្លែងថា តុលាការបារាំងមិនមានអំណាចយុត្តាធិការមកលើពលរដ្ឋកម្ពុជា ដែលកំពុងរស់នៅក្នុងប្រទេសកម្ពុជាឡើយ។
លោកបញ្ជាក់៖ «ជាគោលការណ៍ច្បាប់ជាតិក៏ដូចជាច្បាប់អន្តរជាតិតុលាការរបស់ប្រទេសបារាំង ឬក៏សេចក្តីសម្រេចរបស់តុលាការបារាំងពុំមានអំណាចយុត្តាធិការទៅលើពលរដ្ឋកម្ពុជាលើទឹកដីកម្ពុជានោះទេ ដែលជារដ្ឋអធិបតេយ្យ។ ហ្នឹងជាគោលការណ៍ច្បាប់អន្តរជាតិ»។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ប្រាប់វីអូអេយ៉ាងខ្លីថា ករណីតុលាការបារាំងចេញដីកាបង្គាប់មកលើលោក ហ៊ុយ ពិសិដ្ឋ និងលោក ហ៊ីង ប៊ុនហៀងគឺពាក់ព័ន្ធនឹងនីតិវិធី និងយុត្តាធិការរបស់តុលាការតែប៉ុណ្ណោះហើយការណ៍នេះមិនប៉ះពាល់ទំនាក់ទំនងរវាងកម្ពុជា និងបារាំងឡើយ។
ការវាយប្រហារដោយគ្រាប់បែកដៃចំនួន៤គ្រាប់បានកើតឡើងកាលពីថ្ងៃទី៣០ ខែមីនា ឆ្នាំ១៩៩៧ នៅគ្រាដែលមានបាតុកម្មដោយសន្តិវិធីដឹកនាំដោយលោក សម រង្ស៊ី អតីតប្រធានគណបក្សជាតិខ្មែរ និងមានសញ្ជាតិបារាំង ដើម្បីថ្កោលទោសលើកង្វះឯករាជ្យភាព និងអំពើពុករលួយនៅក្នុងប្រព័ន្ធតុលាការកម្ពុជា។ហេតុការណ៍នេះបានកើតឡើងនៅខាងក្រៅរដ្ឋសភា ក្នុងរាជធានីភ្នំពេញ ហើយបានសម្លាប់មនុស្ស១៦នាក់ និងធ្វើឲ្យរងរបួសយ៉ាងតិច១៥០នាក់។
សេចក្តីសម្រេចរបស់តុលាការបារាំងធ្វើឡើងនៅក្នុងសំណុំរឿងមួយប្តឹងដោយលោក សម រង្ស៊ី ដែលជាមេដឹកនាំគណបក្សប្រឆាំង និងជាគោលដៅនៃការវាយប្រហារដោយគ្រាប់បែកដៃ កាលពីពេលនោះ។លោក សម រង្ស៊ី បានរងរបួស ដោយសារអម្បែងគ្រាប់បែកហើយអង្គរក្សរបស់លោកម្នាក់បានស្លាប់ បន្ទាប់ពីរងបន្ទុះគ្រាប់បែកពេញមួយទំហឹង ពេលធ្វើជាខែលការពារលោកសម រង្ស៊ី។
បើតាមអង្គការសិទ្ធិមនុស្សអន្តរជាតិ សេចក្តីសម្រេចរបស់តុលាការបារាំង កាលពីថ្ងៃទី១០ ខែកុម្ភៈ ឆ្នាំ២០១៧ ក៏បានបង្គាប់ឲ្យលោកនាយករដ្ឋមន្រ្តី ហ៊ុន សែន ចូលសវនាការ ពាក់ព័ន្ធនឹងការវាយប្រហារដោយគ្រាប់បែកនេះដែរប៉ុន្តែកាលពីថ្ងៃទី៨ ខែសីហា ឆ្នាំ២០១៧ក្រសួងការបរទេសបារាំងឲ្យដឹងថា ដោយសារឋានៈរបស់លោក ហ៊ុន សែន ជាប្រមុខរដ្ឋាភិបាលកម្ពុជាគឺលោកមានអភ័យឯកសិទ្ធិរួចផុតពីការចាប់ខ្លួន។
ពាក់ព័ន្ធករណីនេះ លោក Brad Adams នាយកអង្គការឃ្លាំមើលសិទ្ធិប្រចាំតំបន់អាស៊ី និយាយថា៖ «ប្រសិនបើមិនមានអភ័យឯកសិទ្ធិ លោក ហ៊ុន សែន ប្រហែលកំពុងប្រឈមនឹងការបង្គាប់ឲ្យបង្ហាញខ្លួននៅសវនាការនៅប្រទេសបារាំង ពាក់ព័ន្ធនឹងតួនាទីរបស់លោកនៅក្នុងការវាយប្រហារដ៏អាក្រក់មកលើបាតុករអហិង្សា»។
គួរបញ្ជាក់ថា តុលាការបារាំងមិនទាន់កំណត់ពេលច្បាស់លាស់នៅឡើយទេសម្រាប់សវនាការនៅពេលខាងមុខ។
លោក សម រង្ស៊ី មេដឹកនាំគណបក្សប្រឆាំងដែលកំពុងនិរទេសខ្លួននៅក្រៅប្រទេស និងជាជនរងគ្រោះម្នាក់ក្នុងព្រឹត្តិការណ៍បោកគ្រាប់បែក កាលពីកន្លងទៅ នោះ បានចាត់ទុកថា ចំណាត់ការរបស់តុលាការបារាំង គឺជា«ពន្លឺយុត្តិធម៌» និង«ក្តីសង្ឈឹម»សម្រាប់អ្នកស្លាប់១៦នាក់ និងអ្នករងរបួសធ្ងន់ជាង១០០នាក់៕