នៅក្នុងការរៀបចំយុទ្ធសាស្ត្រថ្មីមួយរបស់រដ្ឋាភិបាលស្តីពីការអភិវឌ្ឍសេដ្ឋកិច្ចក្រៅប្រព័ន្ធសម្រាប់ឆ្នាំ ២០២៣ ដល់ឆ្នាំ ២០២៨ អ្នកដែលកំពុងរកស៊ីក្នុងសេដ្ឋកិច្ចក្រៅប្រព័ន្ធនឹងត្រូវបានរំកិលឱ្យចូលទៅក្នុងប្រព័ន្ធសេដ្ឋកិច្ចដែលស្ថិតក្រោមការគាំទ្ររបស់អាជ្ញាធរពាក់ព័ន្ធ។
យុទ្ធសាស្ត្រថ្មីនេះនឹងរួមចំណែកក្នុងការកែលម្អជីវភាពរបស់ប្រជាពលរដ្ឋ និងសម្រេចឱ្យបានការអភិវឌ្ឍប្រកបដោយចីរភាព ហើយធ្វើឱ្យមានភាពធន់នឹងវិបត្តិផ្សេងៗ។ នេះបើតាមលទ្ធផលនៃសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី ២០ ខែកញ្ញា។
អ្នកនាំពាក្យរដ្ឋាភិបាល លោក ប៉ែន បូណា ប្រាប់វីអូអេថា យុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ នេះ គឺជាគិតគូរគាំពារដល់ប្រជាពលរដ្ឋដែលប្រកបរបរសេដ្ឋកិច្ចក្រៅប្រព័ន្ធ ឱ្យមានភាពរីកលូតលាស់ដូចអ្នកប្រកបរបរក្នុងសេដ្ឋកិច្ចក្នុងប្រព័ន្ធ។
លោកថ្លែងថា៖ «រាជរដ្ឋាភិបាលអាណត្តិទី ៧ នេះ គឺរៀបចំយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធសម្រាប់ឆ្នាំ ២០២៣ ដល់ ២០២៨។ ហេតុអីបានរៀបចំអាហ្នឹង ព្រោះរាជរដ្ឋាភិបាលមានគោលបំណងគាំពារទៅដល់បងប្អូនដែលប្រកបរបរអាជីវកម្មក្រៅប្រព័ន្ធទាំងអស់ ដើម្បីឱ្យគាត់ទទួលបានផលប្រយោជន៍ដូចអ្នកនៅក្នុងប្រព័ន្ធដែរ»។
លោកបន្ថែមថា៖ «អ៊ីចឹងថ្មីៗនេះ នៅពេលមានការប្រកាសរបស់អាជ្ញាធរមួយចំនួនឱ្យពួកគាត់ទៅចុះឈ្មោះ គាត់មានការព្រួយកាបារម្ភ គាត់ព្រួយបារម្ភថាគាត់ត្រូវខាតបង់ បង់ពន្ធ បង់អីនេះនោះអ៊ីចឹងទៅ។ អ៊ីចឹងសម្តេចធិបតីគឺលោកផ្អាកមិនឱ្យមានការចុះឈ្មោះអីសិន ចាំរៀបចំគោលនយោបាយយុទ្ធសាស្រ្តជាតិនេះរួចរាល់នឹងចេញទៅតែម្តង»។
អ្នកដែលពឹងផ្អែកលើសេដ្ឋកិច្ចក្រៅប្រព័ន្ធគឺសំដៅដល់អ្នកមានអាជីវកម្មតូចតាច ឬអ្នកលក់ដូរក្នុងផ្សារ និងតាមដងផ្លូវ និងអ្នករត់ម៉ូតូកង់បីជាដើម។
បើតាមសេចក្តីប្រកាសព័ត៌មានស្តីពីសម័យប្រជុំពេញអង្គគណៈរដ្ឋមន្ត្រីដែលបានចេញផ្សាយជាសាធារណៈកាលពីថ្ងៃពុធកន្លងទៅ យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ នឹងឆ្លើយតបទៅនឹងបញ្ហាប្រឈមនិងភាពជាក់ស្តែងមួយចំនួន ព្រមទាំងយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ និងគាំទ្រអ្នកប្រកបរបរសេដ្ឋកិច្ចក្រៅប្រព័ន្ធ បន្ទាប់ពីវិបត្តិជំងឺកូវីដ១៩។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ សាទរចំពោះការយកចិត្តទុកដាក់របស់រដ្ឋាភិបាលអាណត្តិថ្មីទៅលើអ្នកប្រកបមុខរបរសេដ្ឋកិច្ចក្រៅប្រព័ន្ធថាជាបរិបទថ្មីបន្ថែមទៀត ក្នុងការជំរុញធ្វើយ៉ាងណាឱ្យពួកគេបានចូលទៅក្នុងក្របខណ្ឌសេដ្ឋកិច្ចក្នុងប្រព័ន្ធដែលមានការតាមដានពីមន្ត្រីជំនាញ និងអាជ្ញាធរនៅតាមមូលដ្ឋាន។
លោកបន្តទៀតថា យុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ របស់រាជរដ្ឋាភិបាលដែលបានសម្រេចនេះ គឺជាការឆ្លើយតបមួយដ៏សំខាន់មកកាន់ប្រជាពលរដ្ឋប្រកបមុខរបរសេដ្ឋកិច្ចក្រៅប្រព័ន្ធ ខណៈពួកគេកំពុងប្រឈមនឹងបញ្ហាមួយចំនួន រួមមានការធ្លាក់ចុះនៃប្រាក់ចំណូល និងសម្ពាធនៃការកើនឡើងថ្លៃទំនិញលើទីផ្សារ ក្រោយមានការរាតត្បាតនៃជំងឺកូវីដ១៩។
លោកថ្លែងថា៖ «តម្រូវការរបស់គាត់[អ្នកប្រកបរបរសេដ្ឋកិច្ចក្រៅប្រព័ន្ធ] គឺសេវាសង្គមទាំងសេវាសិទ្ធិផ្នែកសេដ្ឋកិច្ច សង្គមនិងវប្បធម៌ និងយុត្តិធម៌សង្គមសម្រាប់របស់ពួកគាត់ដែរ។ នេះគឺជាតម្រូវការចាំបាច់ គឺធ្វើយ៉ាងឱ្យសេដ្ឋកិច្ចគាត់ដំណើរការល្អឡើងវិញដូចមុនសម័យកូវីដ រដ្ឋត្រូវធ្វើអ៊ីចឹង[នោះវា] គឺ[ជា]ការសាទរហើយរបស់ពួកយើងប្រសិនជាអាចធ្វើបាន»។
ការដាក់ចេញនូវយុទ្ធសាស្ត្រនៃការអភិវឌ្ឍសេដ្ឋកិច្ចក្រៅប្រព័ន្ធដែលមានរយៈពេល ៥ ឆ្នាំ ក៏មានគោលបំណងពង្រឹងសមត្ថភាពផលិតភាព និងភាពធន់នៃអ្នករកទទួលទានក្នុងសេដ្ឋកិច្ចក្រៅប្រព័ន្ធ និងពន្លឿនដល់ការចូលរួមសេដ្ឋកិច្ចក្នុងប្រព័ន្ធ ដើម្បីធានាបានវឌ្ឍនភាពនៃការធ្វើធុរកិច្ច ពាណិជ្ជកម្ម ការវិនិយោគ និងការប្រកបអាជីវកម្ម មុខរបរ និងការងារចិញ្ចឹមជីវិតនៅកម្ពុជា។
យុទ្ធសាស្រ្តជាតិនេះ បានកំណត់អាទិភាពលើចំណុចសំខាន់ៗ ចំនួន ៥ រួមមាន៖
- ការកំណត់ ការកែសម្រួល និងការរៀបចំយន្តការក្នុងការបង្កលក្ខណៈងាយស្រួលដើម្បីឈានចូលក្នុងប្រព័ន្ធ
- ការកាត់បន្ថយបន្ទុកលើការបំពេញអនុលោមភាព
- ការផ្តល់ការគាំពារ និងគាំទ្រដល់អ្នកដែលបានឈានចូលក្នុងប្រព័ន្ធ
- ការលើកកម្ពស់សមត្ថភាព និងគាំទ្រដល់អ្នកដែលឈានចូលក្នុងប្រព័ន្ធ
- ការពង្រឹងនិងពង្រីកការផ្សព្វផ្សាយ និងលើកកម្ពស់ការយល់ដឹងនិងការចូលរួម។
រាជរដ្ឋាភិបាលបានចាត់ទុកការដាក់ចេញនូវយុទ្ធសាស្ត្រជាតិថ្មីមួយនេះថា ជាការត្រួសត្រាយផ្លូវក្នុងការអភិវឌ្ឍសេដ្ឋកិច្ចក្រៅប្រព័ន្ធ ដើម្បីបង្កើននូវកិច្ចសហប្រតិបត្តិការរវាងក្រសួង ស្ថាប័ន វិស័យឯកជន អង្គការជាតិ និងអន្តរជាតិ និងការផ្សាភ្ជាប់ទំនាក់ទំនងជាមួយសមាគមនានា៕