ក្រុមមន្ត្រីជាន់ខ្ពស់រដ្ឋាភិបាល នៅថ្ងៃសុក្រនេះ បន្តបញ្ចេញប្រតិកម្មដ៏ច្របូកច្របល់ដោយនៅតែធ្វើការវាយប្រហារលើលោក សម រង្ស៊ី មេដឹកនាំគណបក្សជំទាស់ដែលរងការចោទប្រកាន់ថា លោកបានសុំឲ្យសភាអឺរ៉ុបបិទទីផ្សារសម្លៀកបំពាក់ពីកម្ពុជានោះ។
ការលើកឡើងនេះ កើតឡើងមួយថ្ងៃក្រោយលោក សម រង្ស៊ី ដែលកំពុងនិរទេសខ្លួននៅក្រៅប្រទេសប្រកាសបដិសេធនៅលើទំព័រ Facebook របស់លោកកាលពីម្សិលមិញ ថា លោកគ្រាន់តែស្នើសុំបន្ថែមលក្ខខណ្ឌឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាប៉ុណ្ណោះ ក្នុងពេលថ្លែងប្រាប់សភាអឺរ៉ុបក្នុងសវនាការដេញដោយពីស្ថានការណ៍កម្ពុជា។ ហើយលោកស្តីបន្ទោសថា រដ្ឋាភិបាលកម្ពុជាកំពុងកុហកពលរដ្ឋ និងកម្មករ និងមានការបកប្រែពាក្យសម្តីរបស់លោកខុសទាំងស្រុង ពីភាសាបារាំងមកភាសាខ្មែរនោះ។
ដោយហាក់ដូចជាមិនទទួលយកការបកស្រាយរបស់លោក សម រង្ស៊ី នោះ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី ឲ្យដឹងថា ការបដិសេធរបស់លោក សម រង្ស៊ី ជាទង្វើខ្វះការទទួលខុសត្រូវក្នុងនាមជាអ្នកដឹកនាំ និងរំខានដល់ចរន្តនៃការបណ្តាក់ទុនរបស់អ្នកជំនួញមកកម្ពុជា។ លោក ផៃ ស៊ីផាន អះអាងថា ស្ថានភាពការងារ និងសិទ្ធិសេរីភាពរបស់កម្មករ និយោជិតនៅកម្ពុជា ត្រូវបានកំណត់ដោយអង្គការអន្តរជាតិពលកម្មពិភពលោក ILO ដោយមានការសម្របសម្រួលពីរដ្ឋាភិបាល។
«ការបដិសេធរបស់គាត់ហ្នឹងបង្ហាញនូវអ្វី ដែលគាត់មិនទទួលខុសត្រូវ ដែលមិនមានលក្ខណៈជាថ្នាក់ដឹកនាំ។ គាត់បដិសេធអ្វីដែលគាត់បានធ្វើ ដែលប្រឆាំងនឹងអ្វីដែលរាជរដ្ឋាភិបាលខំប្រឹងប្រែងអូសទាញអ្នកបណ្តាក់ទុនដើម្បីផលប្រយោជន៍កម្មករយើង»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មិនចាប់អារម្មណ៍ចំពោះការបកស្រាយរបស់ លោក សម រង្ស៊ី នោះទេ។ លោកបញ្ជាក់ថា ក្រសួងការងារ មានតួនាទីរក្សាលក្ខខណ្ឌការងារឲ្យល្អប្រសើរដល់ពលរដ្ឋ ហើយថ្កោលទោសចំពោះបុគ្គលណាដែលយកផលប្រយោជន៍កម្មករ ធ្វើជាចំណាត់ខ្មាំង។
«អ្វីដែលក្រសួងមាន គឺធ្វើម៉េចរក្សាការងារជូនប្រជាពលរដ្ឋ រក្សាលក្ខខណ្ឌការងារឲ្យល្អប្រសើរដល់ពលរដ្ឋ ហើយថ្កោលទោសរាល់បុគ្គលទាំងឡាយណាដែលមានបំណងយកផលប្រយោជន៍កម្មករ ចំណាច់ខ្មាំងដើម្បីផលប្រយោជន៍ខ្លួន ក្រុមខ្លួន បក្សខ្លួន ធ្វើឲ្យកម្មករលំបាក យើងសុំថ្កោលទោស ហើយយើងមិនលើកទឹកចិត្តទេ»។
ការបដិសេធរបស់លោក សម រង្ស៊ី នៅលើបណ្តាញសង្គមនេះកើតឡើង ក្រោយពេលដែលមានប្រតិកម្មយ៉ាងខ្លាំងពីសហជីពកម្មករ និងកម្មករ ដែលខ្លះបានអះអាងថា នឹងធ្វើបាតុកម្មរំលាយគណបក្សសង្គ្រោះជាតិ ប្រសិនបើអឺរ៉ុបបិទទីផ្សារសម្រាប់ផលិតផលសម្លៀកបំពាក់ពីកម្ពុជាមែននោះ។
រូបឯកសារ៖ លោក សម រង្ស៊ី ប្រធានគណបក្សសង្គ្រោះជាតិ (កណ្តាល) ថ្លែងសុន្ទរកថាក្នុងថ្ងៃប្រារព្ធទិវាសិទ្ធិមនុស្សអន្តរជាតិ នៅមុខរដ្ឋសភាជាតិ នៅទីក្រុងភ្នំពេញ កាលពីថ្ងៃពុធ ទី១០ ខែធ្នូ ឆ្នាំ២០១៤។
លោក សម រង្ស៊ី បញ្ជាក់ទៀតថា ការទាមទាររបស់លោកឲ្យមានលក្ខខណ្ឌការងារល្អនោះ គឺដូចគ្នានឹងសហជីពធំៗនៅកម្ពុជាដែរ ដោយបានស្នើឲ្យក្រុមហ៊ុនអន្តរជាតិធំៗ ដែលជាអ្នកបញ្ជាទិញទាំងនោះ គិតគូរអំពីលក្ខខណ្ឌការងារដ៏លំបាកវេទនារបស់កម្មករកម្ពុជា ហើយដាក់សម្ពាធឲ្យថៅកែរោងចក្រកាត់ដេរទាំងនោះ ដំឡើងប្រាក់ខែ និងកែលំអលក្ខខណ្ឌការងារប្រសើរដល់កម្មករ។
យ៉ាងណាក៏ដោយ លោក ខេន លូ អគ្គលេខាធិការរបស់តំណាងសមាគមរោងចក្រកាត់ដេរនៅកម្ពុជា ហៅកាត់ថា GMAC បញ្ជាក់ប្រាប់ VOA ថាកិច្ចសហការរវាងសហភាពអឺរ៉ុបចំពោះវិស័យវាយនភណ្ឌនៅកម្ពុជា និងប្រទេសដទៃនោះ មានកំណត់លក្ខខណ្ឌរួចហើយ។ តំណាងសមាគមរោងចក្ររូបនេះយល់ថា ការទាមទារលក្ខខណ្ឌបន្ថែមរបស់លោក សម រង្ស៊ី អាចប៉ះពាល់ដល់ផលប្រយោជន៍សេដ្ឋកិច្ច និងជីវភាពកម្មករកម្ពុជា។
«នៅក្នុង GSP [Generalized Scheme of Preferences] របស់ EU គាត់មានមានដាក់លក្ខខណ្ឌហើយៗមិនមែនសម្រាប់តែស្រុកខ្មែរទេ ដូចបង់ក្លាដេស មីយ៉ាន់ម៉ាអីហ្នឹង គេមានលក្ខខណ្ឌដូចគ្នា។ ចឹងខ្ញុំអត់សូវយល់ថាលោក សម រង្ស៊ី ស្នើសុំទៅខាង EUដាក់លក្ខខណ្ឌយ៉ាងម៉េច? លក្ខខណ្ឌពិសេស? អ្នកប៉ះពាល់ខ្លាំងជាងគេ គឺកម្មករ»។
រហូតមកទល់ពេលនេះ គេមិនទាន់ឃើញការប្រកាសណាមួយដែលថា សភាអឺរ៉ុបបិទទីផ្សារសម្រាប់ការនាំចេញរបស់កម្ពុជាទេ។ តែប្រតិកម្មរបស់ក្រុមសហជីពកម្មកររោងចក្រ គឺកើតឡើងក្រោយ ពេលដែលលោក សម រង្ស៊ី បានថ្លែងថា សភាអឺរ៉ុបកំពុងពិចារណាដាក់ទណ្ឌកម្មដល់រដ្ឋាភិបាល កម្ពុជាមិនធ្លាប់មានពីមុន ដែលលោកអះអាងថា ទាក់ទងនឹងការធ្វើទុក្ខបុកម្នេញក្រុមជំទាស់។
វិស័យវាយនភណ្ឌនៅក្នុងប្រទេសកម្ពុជាត្រូវបានគេដឹងថា បានផ្តល់ការងារដល់កម្មករជាង៧០ម៉ឺននាក់ទូទាំងប្រទេសកម្ពុជា។ កម្ពុជានាំចេញផលិតផលសម្លៀកបំពាក់របស់ខ្លួនប្រមាណ៤៦ភាគរយទៅកាន់សហភាពអឺរ៉ុប ៣០ភាគរយទៅកាន់សហរដ្ឋអាមេរិក និង២៤ភាគរយផ្សេងទៀតទៅកាន់ប្រទេសកាណាដា និងជប៉ុន។ ចំណូលដែលបានមកពីការនាំចេញនេះ មានជាង៦.០០០លានដុល្លារអាមេរិកនៅឆ្នាំ២០១៥។ នេះបើយោងទៅតាមទិន្នន័យដែលផ្តល់ដោយសមាគមមណ្ឌលព័ត៌មានកម្មករ៕