រាជរដ្ឋាភិបាលកម្ពុជាបានប្រកាសនៅព្រឹកថ្ងៃពុធនេះដាក់ឲ្យដំណើរការ «មូលនិធិគន្ធបុប្ផាកម្ពុជា» ជាផ្លូវការ ដោយសម្រេចដាក់ប្រាក់វិភាគទានដំបូងដែលជាថវិការបស់រដ្ឋចូលមូលនិធិនេះចំនួន១០លានដុល្លារអាមេរិក និងប្រកាសបន្តដាក់ថវិកា៥លានដុល្លារអាមេរិកចូលមូលនិធិនេះជារៀងរាល់ឆ្នាំ ដើម្បីទ្រទ្រង់ដំណើរការរបស់មន្ទីរពេទ្យគន្ធបុប្ផា។
ក្នុងពិធីសម្ពោធដាក់ឲ្យដំណើរការជាផ្លូវការនូវ «មូលនិធិគន្ធបុប្ផាកម្ពុជា» នៅព្រឹកថ្ងៃទី១១ ខែមេសា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន ថ្លែងថា រដ្ឋាភិបាលកម្ពុជាបានប្រកាសដាក់ឲ្យដំណើរការមូលនិធិនេះ ក្នុងគោលបំណងបន្តសកម្មភាពមនុស្សធម៌របស់មន្ទីរពេទ្យគន្ធបុប្ផា តាមរយៈការស្វែងរកថវិកាពីបណ្តាសប្បុរសជននានាមកទ្រទ្រង់ ដើម្បីព្យាបាលជំងឺកុមារកម្ពុជាដោយឥតគិតថ្លៃ។ លោកបន្ថែមថា បច្ចុប្បន្ន រដ្ឋាភិបាលបានធ្វើវិភាជន៍ដល់មន្ទីរពេទ្យនេះ តាមរយៈការលក់សំបុត្រចូលទស្សនាប្រាសាទអង្គរវត្ត ព្រមទាំងថវិកាចំនួន១លានដុល្លារពីកាកបាទក្រហមកម្ពុជា ជារៀងរាល់ឆ្នាំ និងថា ប្រសិនបើលោកនៅបន្តដឹកនាំប្រទេស នោះរដ្ឋាភិបាលនឹងផ្តល់១០លានដុល្លារជារៀងរាល់ឆ្នាំសម្រាប់ប្រតិបត្តិការមន្ទីរពេទ្យគន្ធបុប្ផានិង៥លានដុល្លារសម្រាប់មូលនិធិនេះ។
លោកបញ្ជាក់ថា៖
«បើខ្ញុំនៅតែបន្តកាន់តំណែងជានាយករដ្ឋមន្រ្តីនៃរាជរដ្ឋាភិបាល ដែលខ្ញុំនឹងបន្តដឹកនាំផ្តល់ការគាំទ្រជាប់មិនដាច់ដល់មន្ទីរពេទ្យគន្ធបុប្ផា សំដៅធានាឲ្យខាងតែបាននូវចីរភាព នៃកិច្ចដំណើរការរបស់មន្ទីរពេទ្យនេះ ក្នុងការផ្តល់សេវាព្យាបាល និងថែទាំសុខភាព តាមរយៈការបន្តផ្តល់ថវិកាយ៉ាងតិច ១០លានដុល្លារក្នុងមួយឆ្នាំសម្រាប់ប្រតិបត្តិការរបស់មន្ទីរពេទ្យ និងយ៉ាងតិច៥លានដុល្លារក្នុងមួយឆ្នាំសម្រាប់មូលនិធិគន្ធបុប្ផា»។
ក្នុងពិធីនោះ លោកនាយករដ្ឋមន្រ្តី ហ៊ុន សែន ក៏បានប្រកាសថាលោកនិងភរិយា នឹងផ្តល់ថវិកា៥ម៉ឺនដុល្លារក្នុងមួយឆ្នាំ រយៈពេល៥ឆ្នាំ ចូលមូលនិធិគន្ធបុប្ផាកម្ពុជា ព្រមទាំងបានប្រកាសគៀងគរថវិកាពីសប្បុរសជននានា ដើម្បីចូលរួមជាមួយមូលនិធិនេះផងដែរ។
ជាង២៥ឆ្នាំមកនេះ រាប់ចាប់ពីឆ្នាំ១៩៩២ ដល់ខែមីនា ឆ្នាំ២០១៧ មានកុមារជាង១២លាននាក់ ទទួលបានការព្យាបាលជំងឺដោយឥតគិតថ្លៃ ពីមន្ទីរពេទ្យគន្ធបុប្ផា ដែលមានទីតាំងចំនួនប្រាំកន្លែងនៅក្នុងប្រទេស ដោយចំណាយថវិកាអស់ជាច្រើនលានដុល្លារអាមេរិក។
លោកវេជ្ជបណ្ឌិត Beat Richner (បេអាត រិចឆ្នឺរ) ត្រូវបានបញ្ជូនមកធ្វើការនៅមន្ទីរពេទ្យគន្ធបុប្ផានៅប្រទេសកម្ពុជាក្នុងចន្លោះឆ្នាំ១៩៧៤ និង១៩៧៥ ដោយកាកបាទក្រហមប្រទេសស្វ៊ីស។ ក្រោយសម័យសង្គ្រាមគឺនៅខែធ្នូ ឆ្នាំ១៩៩១ រដ្ឋាភិបាលកម្ពុជាស្នើឲ្យលោកកសាងឡើងវិញ និងគ្រប់គ្រងមន្ទីរពេទ្យកុមារគន្ធបុប្ផា ដែលត្រូវបានបំផ្លិចបំផ្លាញក្នុងសម័យសង្គ្រាម។
លោក រិចឆ្នឺរ បានបង្កើតមូលនិធិមួយដើម្បីរៃអង្គាសប្រាក់ តាមរយៈការលេងសែលឡូ (ហៅវីយូឡុងធំ)នៅក្រៅប្រទេស ក្នុងការទ្រទ្រង់មន្ទីរពេទ្យគន្ធបុប្ផា។ លោកបានធ្លាក់ខ្លួនឈឺធ្ងន់កាលពីខែមីនា ឆ្នាំ២០១៧ ហើយមានការបារម្ភថា មន្ទីរពេទ្យដែលតែងព្យាបាលជំងឺជូនប្រជាជនកម្ពុជាដ៏ល្បីល្បាញមួយនេះ អាចនឹងត្រូវបិទទ្វារដោយសារមិនមានថវិកាដើម្បីទ្រទ្រង់បន្ត។
បច្ចុប្បន្ន ថវិកាដែលទ្រទ្រង់មន្ទីរពេទ្យគន្ធបុប្ផាទាំង៥សាខានេះ មួយចំនួនគឺបានមកពីមូលនិធិគន្ធបុប្ផាស្វីស ដោយរដ្ឋាភិបាលស្វីសបានចំណាយទឹកប្រាក់ប្រមាណជា៤លានដុល្លារអាមេរិក ជារៀងរាល់ឆ្នាំ និងមួយចំនួនទៀតបានមកពីសប្បុរសជនក្នុង និងក្រៅប្រទេស រួមទាំងរដ្ឋាភិបាលកម្ពុជាផងដែរ៕