អាល្លឺម៉ង់ ចក្រភពអង់គ្លេស និងបារាំងបានអំពាវនាវកាលពីថ្ងៃចន្ទឱ្យមានបទឈប់បាញ់នៅហ្កាហ្សា ខណៈអ៊ីស្រាអែលត្រៀមខ្លួនទប់ទល់នឹងការវាយប្រហារទ្រង់ទ្រាយធំដែលអាចកើតឡើង។
សេចក្តីថ្លែងការណ៍រួមរបស់មេដឹកនាំអឺរ៉ុបទាំងនេះសរសេរថា៖ «ការប្រយុទ្ធគ្នាត្រូវតែបញ្ចប់ឥឡូវនេះ ហើយចំណាប់ខ្មាំងទាំងអស់ដែលក្រុមហាម៉ាស់នៅឃុំឃាំងត្រូវតែដោះលែងវិញ។ ពលរដ្ឋនៅតំបន់ហ្កាហ្សាត្រូវការការផ្តល់និងការចែកចាយជំនួយជាបន្ទាន់ដោយគ្មានឧបសគ្គរារាំង»។
សេចក្តីថ្លែងការណ៍នេះត្រូវបានចុះហត្ថលេខាដោយប្រធានាធិបតីបារាំងលោក Emmanuel Macron អធិការបតីអាល្លឺម៉ង់លោក Olaf Scholz និងនាយករដ្ឋមន្ត្រីចក្រភពអង់គ្លេសលោក Keir Starmer។
ប្រទេសទាំងបីក៏បានគាំទ្រផងដែរនូវផែនការសម្រុះសម្រួលចុងក្រោយបង្អស់របស់សហរដ្ឋអាមេរិក ប្រទេសកាតា និងអេហ្ស៊ីបដើម្បីបញ្ចប់សង្គ្រាមរវាងអ៊ីស្រាអែលនិងក្រុមហាម៉ាស់ដែលអូសបន្លាយពេលអស់ ១០ ខែមកហើយនេះ។
ផែនការនេះអំពាវនាវឱ្យមានការដោះដូរចំណាប់ខ្មាំងទាំងអស់ដែលក្រុមហាម៉ាស់នៅឃុំឃាំងជាមួយនឹងអ្នកទោសប៉ាឡេស្ទីនដែលនៅជាប់ក្នុងគុករបស់អ៊ីស្រាអែល និងឱ្យមានការដកទ័ពអ៊ីស្រាអែលចេញពីតំបន់ហ្កាហ្សា។
ផែនការនេះក៏អំនាវនាវផងដែរកុំឱ្យអ៊ីរ៉ង់និងសម្ព័ន្ធមិត្តវាយប្រហារលើអ៊ីស្រាអែលដើម្បីសងសឹកចំពោះការសម្លាប់មេដឹកនាំក្រុមសកម្មប្រយុទ្ធពីរនាក់នៅលីបង់និងអ៊ីរ៉ង់។
រដ្ឋមន្ត្រីការពារជាតិអ៊ីស្រាអែលលោក Yoav Gallant បានបញ្ជាក់កាលពីថ្ងៃចន្ទថាលោកបាននិយាយជាមួយរដ្ឋមន្ត្រីការពារជាតិអាមេរិកលោក Lloyd Austin ដើម្បីត្រៀមខ្លួនសម្រាប់ការវាយប្រហារយោធាទ្រង់ទ្រាយធំដែលអាចកើតឡើងលើអ៊ីស្រាអែល។
លោក Austin ថា សហរដ្ឋអាមេរិកនឹងចាត់វិធានការគ្រប់បែបយ៉ាងតាមដែលអាចធ្វើបានដើម្បីការពារអ៊ីស្រាអែល។ លោកបានកត់សម្គាល់ថាវត្តមានយោធាអាមេរិកកំពុងត្រូវបានពង្រឹងនៅតំបន់មជ្ឈិមបូព៌ា៕
ព័ត៌មានខ្លះក្នុងសេចក្តីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, Reuters និង AFP។