អតីតប្រធានាធិបតីស៊ីមបាវ៉េ លោក Robert Mugabe បានទទួលមរណភាពក្នុងជន្មាយុ៩៥ឆ្នាំ។ នេះបើតាមការប្រកាសតាមគណនី Twitter ផ្លូវការរបស់លោកប្រធានាធិបតីប្រទេសស៊ីមបាវ៉េបច្ចុប្បន្នគឺលោក Emmerson Mnangagwa។
លោក Mugabe បានទទួលមរណភាពនៅប្រទេសសិង្ហបុរី ជាទីដែលលោកតែងបានទៅព្យាបាលសុខភាពនៅក្នុងប៉ុន្មានឆ្នាំចុងក្រោយនេះ នេះបើតាមប្រភពច្បាស់ការណ៍មួយដែលបានបញ្ជាក់ប្រាប់ទីភ្នាក់ងារ Reuters។
នៅក្នុងសារប្រកាសតាម Twitter លោកប្រធានាធិបតីស៊ីមបាវ៉េបានថ្លែងថា៖ «ខ្ញុំមានសេចក្តីសោកសៅបំផុតក្នុងការប្រកាសអំពីមរណភាពរបស់អតីតបិតាស្ថាបនិកនៃប្រទេសស៊ីមបាវ៉េនិងជាអតីតប្រធានាធិបតី Cde Robert Mugabe»។
It is with the utmost sadness that I announce the passing on of Zimbabwe%27s founding father and former President, Cde Robert Mugabe (1/2)
— President of Zimbabwe (@edmnangagwa) September 6, 2019
ក្នុងអំឡុងគ្រប់គ្រងអំណាចប្រទេសស៊ីមបាវ៉េរយៈពេល៣៧ឆ្នាំ លោក Robert Mugabe ត្រូវបានរិះគន់ថា មានលក្ខណៈផ្តាច់ការនិងរំលោភសិទ្ធិមនុស្ស។ ការគ្រប់គ្រងអំណាចរបស់លោកបានបញ្ចប់ក្រោយពីការចូលកាន់តំណែងរបស់លោក Emmerson Mnangagwa កាលពីខែវិច្ឆិកាឆ្នាំ២០១៧៕