នៅពេលផ្សារទំនើបចុងក្រោយបំផុតបានបើកសម្ពោធនៅទីក្រុងសេដ្ឋកិច្ចអាប៊ីចាននៃប្រទេសកូតឌីវ័រ លោកនាយករដ្ឋមន្ត្រី Alassane Ouattara បានចូលរួមពិធីសម្ពោធនោះដោយផ្ទាល់។ មជ្ឈមណ្ឌលពាណិជ្ជកម្មនេះ លាតសន្ធឹងលើទំហំដី ២០.០០០ ម៉ែត្រការេ ហើយក៏ជាផ្សារទំនើបដែលធំបំផុតនៅតំបន់អាហ្វ្រិចខាងលិចផងដែរ។
ផ្សារទំនើបនោះមានហាងលក់រាយទំនិញឈ្មោះ Carrefour ដែលជាហាងទំនិញក្នុងតំបន់ដំបូងនាំចូលពីប្រទេសបារាំង និងហាងអាហារឆ្អិនស្រាប់ Burger King។
ទាំងនេះគ្រាន់តែជាឧទាហរណ៍ចុងក្រោយបង្អស់នៃការវិនិយោគទុនបរទេសនៅក្នុងប្រទេស ដែលសេដ្ឋកិច្ចកំពុងងើបរើឡើងវិញ៥ឆ្នាំ បន្ទាប់ពីភាពចលាចលក្រោយការបោះឆ្នោត ដែលបានឆក់យកជីវិតមនុស្សចំនួន៣.០០០នាក់។
ជាមួយនឹងកំណើនសេដ្ឋកិច្ចប្រចាំឆ្នាំចំនួន៩ភាគរយនៅក្នុងរយៈពេល៤ឆ្នាំកន្លងទៅ ប្រទេសកូតឌីវ័របានក្លាយជាសេដ្ឋកិច្ចកំពុងរះមួយក្នុងតំបន់អាហ្វ្រិចខាងលិច។
កាលពីប៉ុន្មានថ្ងៃមុន មជ្ឈមណ្ឌលលើកកម្ពស់ការវិនិយោគទុន ( Center for the Promotion of Investment)នៃប្រទេសកូតឌីវ័រ ឬហៅកាត់ថា CEPICI បានធ្វើការវាយតម្លៃពីសកម្មភាពសេដ្ឋកិច្ចរបស់ប្រទេសក្នុងឆ្នាំ២០១៥។ ហើយបរិយាកាសវិនិយោគមានលក្ខណៈប្រសើរ។
នៅលើឆាក នាយកគ្រប់គ្រងទូទៅ លោក Esmel Emmanuel Essis បានថ្លែងអរគុណដល់អ្នកវិនិយោគជនជាតិម៉ារុក (Moroccan) ម្នាក់ ដែលនឹងបង្កើតគម្រោងតម្លៃរាប់លានដុល្លារមួយទៀតនៅក្នុងប្រទេសកូតឌីវ័រ។
លោក Essis បាននិយាយថា ការវិនិយោគទុនផ្ទាល់ពីបរទេស មានប្រមាណ៦៩ភាគរយនៃការវិនិយោគទុនសរុបនៅប្រទេសកូតឌីវ័រនៅក្នុងឆ្នាំ២០១៥។ ការភ័យខ្លាចនឹងភាពស្តួចស្តើងនៃស្ថានភាពនយោបាយ គឺមិនមានឡើយ។
គាត់និយាយថា មានមនុស្សមួយចំនួននិយាយថា ប្រទេសកូតឌីវ័រនឹងគ្មានវិនិយោគទុនទេក្នុងឆ្នាំ២០១៥ នៅអំឡុងពេលបោះឆ្នោតជ្រើសរើសនាយករដ្ឋមន្រ្តី ។ អ្នកវិនិយោគមានការព្រួយបារម្ភ ប៉ុន្តែវាជាកាតព្វកិច្ចរបស់ពួកយើង ក្នុងការបញ្ជាក់ប្រាប់ពួកគេថា នៅតែមានក្តីសង្ឃឹម។ លោកនាយករដ្ឋមន្រ្តីបានបង្ហាញថា ការបោះឆ្នោតគឺ ដោយសេរី យុត្តិធម៌ និងសន្តិភាព។
ក្នុងខែវិច្ឆិកា លោក Ouattara អតីតសេដ្ឋកិច្ចវិទូ បានជាប់ឆ្នោតម្តងទៀត ជាមួយនឹងពាក្យសន្យាថា លោកនឹងដឹកនាំប្រទេសកូតឌីវ័រឲ្យក្លាយជាប្រទេសលេចធ្លោមួយនៅត្រឹមឆ្នាំ២០២០។
ប្រទេសនេះ បានយកតំណែងជាអ្នកផលិតកាកាវនាំមុខគេលើពិភពលោកម្តងទៀត ហើយរដ្ឋាភិបាលបានវិនិយោគទៅលើគម្រោងហេដ្ឋារចនាសម្ព័ន្ធធំៗ និងធ្វើកំណែទម្រង់លើការអនុវត្ត ដើម្បីធ្វើឲ្យប្រសើរនូវបរិយាកាសពាណិជ្ជកម្ម ក្នុងនោះក៏រាប់បញ្ចូលទាំងការអនុម័តច្បាប់វិនិយោគទុនថ្មីផងដែរ។
អ្នកតំណាងអង្គការមូលនិធិរូបិយវត្ថុអន្តរជាតិ (IMF) នៅប្រទេសកូតឌីវ័រ លោក Alain Feler និយាយថា ការងើបឡើងវិញនៃសេដ្ឋកិច្ចអាចជាលទ្ធផលនៃភាពប្រសើរឡើងវិញបន្ទាប់ពីមានវិបត្តិជាច្រើនឆ្នាំ។
«នៅពេលដែលអ្នកកំពុងទន់ខ្សោយ ហើយអ្នកងើបឡើងវិញ វាអាចផ្តល់ជាកម្លាំងសម្រាប់ការបន្តសារជាថ្មី ហើយស្ថានភាពដ៏ល្អមួយក៏ជាជំនួយផងដែរ។ ប្រសិនបើអ្នកមានគោលនយោបាយល្អៗដែលអាចទាញយកផលប្រយោជន៍ពីស្ថានភាពនោះ វានឹងអាចបន្ថែមទៅលើយន្តការនៃការងើបឡើងវិញនោះ»។
លោក Feler និយាយថា ការប្រឈមបន្ទាប់សម្រាប់ប្រទេសកូតឌីវ័រ គឺការបន្តសេ្ថរភាពសន្ទុះកំណើនសេដ្ឋកិច្ចនេះ។
«វាជាការសំខាន់ណាស់ ក្នុងការទាញយកផលប្រយោជន៍ពីស្ថានភាពនយោបាយដ៏ប្រសើរនេះ ប៉ុន្តែក៏គួរត្រៀមខ្លួនសម្រាប់ភាពស្តួចស្តើងនានា និងស្ថានភាពលំបាកជាងនេះនាថ្ងៃអនាគតផងដែរ។ វាមានសក្តានុពលដ៏ល្អមួយ ប៉ុន្តែការប្រឈមគឺរក្សាចីរភាពសក្តានុពលនោះនៅក្នុងរយៈពេលវែង ហើយនេះគឺជាអ្វីដែលនឹងធ្វើឲ្យមានការផ្លាស់ប្តូរសម្រាប់ប្រទេសកូតឌីវ័រ»។
អង្គការមូលនិធិរូបិយវត្ថុអន្តរជាតិបានព្យាករណ៍ថា ផលិតផលសរុបក្នុងសុ្រករបស់ប្រទេសកូតឌីវ័រនឹងកើនឡើងដល់៨,៦ភាគរយក្នុងឆ្នាំនេះ៕
ប្រែសម្រួលដោយ វិញ សុជាតា