អគ្គិភ័យដ៏សន្ធោរសន្ធៅមួយដែលចង់លេបត្របាក់យកសារមន្ទីរចាស់បំផុតក្នុងប្រទេស ប្រេស៊ីល ត្រូវបានពន្លត់ឲ្យរលត់ទាំងស្រុងហើយ។ នេះបើយោងតាមលោក Roberto Robadey អ្នកនាំពាក្យមន្ទីរពន្លត់អគ្គិភ័យប្រេស៊ីល ដែលបានឲ្យដឹងកាលពីព្រឹកថ្ងៃចន្ទ។
សារមន្ទីរជាតិវ័យ២០០ឆ្នាំនេះ មានផ្ទុកស្នាដៃសិល្បៈចំនួន២០លាន។
លោក Michel Temer ប្រធានាធិបតីប្រេស៊ីលបានមានប្រសាសន៍ថា ការបាត់បង់នេះគឺ «មិនអាចគណនាបាននោះទេ»។
លោក Temer បានថ្លែងក្នុងសេចក្តីថ្លែងការណ៍មួយថា «នេះគឺជាថ្ងៃដ៏សោកនាដកម្មសម្រាប់ប្រទេស ប្រេស៊ីល។ ស្នាដៃការងារ ការស្រាវជ្រាវ និងចំណេះដឹងរយៈពេល២០០ឆ្នាំ ត្រូវបានបាត់បង់»។
លោក Sergio Sa Leitao រដ្ឋមន្ត្រីវប្បធម៌ប្រេស៊ីលបានបង្ហោះសារលើបណ្តាញសង្គម Tweeter ថា «ការបាត់បង់នេះគឺមិនមានអ្វីមកជំនួសបានទេ។ កាលណាវប្បធម៌រលត់ ជាតិក៏រលាយដែរ»។
លោក Robadey និយាយថា «យើងអាចយកវត្ថុជាច្រើនចេញពីក្នុងសារមន្ទីរដែលកំពុងឆាបឆេះនោះ ដោយមានជំនួយពីក្រុមការងារនៅក្នុងសារមន្ទីរ»។
គេហទំព័ររបស់សារមន្ទីរនោះបានឲ្យដឹងថា សារមន្ទីរមានវត្ថុជាង២ម៉ឺន ដែលពាក់ព័ន្ធនឹងប្រវត្តិសាស្ត្រប្រេស៊ីលនិងប្រទេសដទៃទៀត ហើយវត្ថុជាច្រើនគឺមកពីក្រុមគ្រួសាររាជវង្សានុវង្សរបស់ប្រេស៊ីល។
អ្នកស្រី Marina Silva ដែលជាបេក្ខជនឈរឈ្មោះប្រធានាធិបតីនៅក្នុងការបោះឆ្នោតនៅខែក្រោយនេះ បានថ្លែងថា អគ្គិភ័យនេះប្រៀបដូចជា «ការវះយកការចងចាំចេញពីប្រជាពលរដ្ឋប្រេស៊ីលអញ្ចឹង»។
មិនមានតួលេខអ្នកស្លាប់ឬរងរបួសនៅក្នុងហេតុការណ៍នេះត្រូវបានរាយការណ៍នោះទេ៕