ក្រុមមន្ត្រីជាន់ខ្ពស់នៃធនាគារកណ្តាលស.រ.អា.បានប្រមូលផ្តុំគ្នានៅក្នុងរដ្ឋធានីវ៉ាស៊ីនតោន ក្នុងកិច្ចប្រជុំពីរថ្ងៃដើម្បីពិចារណាអំពីថាតើនឹងត្រូវដំឡើងអត្រាការប្រាក់សំខាន់បំផុតនៅពេលណា ហើយត្រូវឡើងប៉ុន្មានភាគរយ។
ពួកអ្នកសេដ្ឋសាស្ត្រភាគច្រើនបានទស្សន៍ទាយថា ធនាគារកណ្តាលស.រ.អា.នឹងរក្សាទុកអត្រាការប្រាក់នៅកម្រិតទាបបំផុតចាប់តាំងពីឆ្នាំ២០០៨មក នៅពេលដែលក្រុមមន្ត្រីបានខិតខំព្យាយាមបន្ធូរបន្ថយវិបត្តិហិរញ្ញវត្ថុដើម្បីលើកកម្លាំងសេដ្ឋកិច្ចដោយការឱ្យខ្ចីប្រាក់មានអត្រាការប្រាក់ទាប។ ពួកអ្នកជំនាញការជាច្រើននាក់និយាយថា នៅពេលនេះធនាគារកណ្តាលស.រ.អា.ទំនងជានឹងបង្កើនការប្រាក់ជាលើកដំបូងនៅក្នុងការប្រជុំមួយក្នុងខែកញ្ញាហើយ នឹងដំឡើងការប្រាក់ជាលំដាប់នៅពេលបន្ទាប់មកទៀត។
លោកស្រី Janet Yellen ប្រធានធនាគារកណ្តាលមានប្រសាសន៍ប្រាប់ពួកអ្នកកាសែតអំពីសេចក្តីសម្រេចចិត្តស្តីពីការប្រាក់និងអំពីស្ថានភាពនៃសេដ្ឋកិច្ចធំបំផុតក្នុងពិភពលោកនៅម៉ោង២កន្លះរសៀលថ្ងៃពុធ តាមពេលវេលានៃរដ្ឋធានី វ៉ាស៊ីនតោន។ ការងាររបស់ធនាគារកណ្តាលស.រ.អា.គឺតម្រែតម្រង់សេដ្ឋកិច្ចឆ្ពោះទៅកាន់តម្លៃទំនិញមានស្ថិរភាពនិងធ្វើឱ្យប្រជារាស្ត្រអាមេរិកាំងមានការងារធ្វើពេញម៉ោង។ នៅពេលដែលអត្រាមនុស្សគ្មានការងារធ្វើបានចុះថយច្រើនចាប់តាំងពីពេលដែលដំណើរសេដ្ឋកិច្ចមិនទៅមុខក៏ដោយ ក៏លោកស្រី Yellen បានសម្តែងកង្វល់អំពីចំនួនមនុស្សដែលនៅតែគ្មានការងារធ្វើក្នុងរយៈពេលយូរ៕