ប្រធានអង្គការស្បៀងអាហារនិងកសិកម្មរបស់អង្គការសហប្រជាជាតិ ហៅកាត់ថា FAO ថ្មីៗនេះបានវិលត្រឡប់ពីបឹង Chad Basin នៃទ្វិបអាហ្រ្វិក ដែលជាកន្លែងនៃការរីករាលដាលវិបត្តិមនុស្សធម៌ និងកំពុងគំរាមកំហែងតំបន់ភាគឦសាននៃប្រទេសនីហ្សេរីយ៉ា។ លោកប្រធានបានបន្ទោសថា ជម្លោះ កង្វះខាតការយកចិត្តទុកដាក់ជាច្រើនឆ្នាំ និងផលប៉ះពាល់នៃបម្រែបម្រួលអាកាសធាតុ ជាមូលហេតុដែលបង្កឲ្យមានគ្រោះទុរភិក្ស និងភាពក្រីក្រនៅទីនោះ។
អង្គការស្បៀងអាហារនិងកសិកម្មរបស់អង្គការសហប្រជាជាតិ ហៅកាត់ថា FAO ព្យាករណ៍ថា នឹងមានមនុស្សប្រមាណ៧លាននាក់ ប្រឈមនឹងគ្រោះទុរភិក្សធ្ងន់ធ្ងរនៅបឹង Chad Basin ដែលរួមមានផ្នែកមួយចំនួននៃប្រទេសនីហ្សេរីយ៉ាកាមេរូន ឆាដ និងនីហ្សេផងដែរ។ ហើយមានប្រជាជនប្រមាណ ៥ ម៉ឺននាក់ កំពុងប្រឈមមុខនឹងគ្រោះទុរភិក្សនៅតំបន់ភាគឦសាននៃប្រទេសនីហ្សេរីយ៉ា។
អគ្គនាយកអង្គការFAO លោកJose Graziano da Silva និយាយថា ជម្លោះ និងអំពើហិង្សាបង្កឡើងពីការលុកលុយរបស់ក្រុម Boko Haram គឺជាមូលហេតុចម្បង។ ប៉ុន្តែលោកនិយាយថា ដូចគ្នានេះដែរ «ការធ្លាក់ចុះគុណភាពបរិស្ថាន និងផលប៉ះពាល់នៃបម្រែបម្រួលអាកាសធាតុ ដូចជាគ្រោះរាំងស្ងួត ក៏ជាមូលហេតុចម្បងផងដែរ»។ បឹង Chad កំពុងតែរលាយបាត់បន្តិចម្តងៗហើយ។
«គេអាចនិយាយបានថា បឹង Chad គឺជាប្រភពទឹកចម្បងសម្រាប់តំបន់នេះ។ ដូច្នេះយើងពិតជាព្រួយបារម្ភណាស់។ ចាប់ផ្តើមពីឆ្នាំ១៩៦៣ បឹងនេះមានទំហំប្រមាណ២២.០០០គីឡូម៉ែត្រការេ។ ហើយនៅឆ្នាំ២០០៧ វាមានទំហំតែ៣០០គីឡូម៉ែត្រការេតែប៉ុណ្ណោះ។ ពី២២.០០០គីឡូម៉ែត្រការេសល់ត្រឹមតែ៣០០គីឡូម៉ែត្រការេប៉ុណ្ណោះ»។
លោកនិយាយថា នេះជា«ការបាត់បង់៩០ភាគរយនៃម៉ាសទឹក» ហើយលោកបានព្រមានថា វានឹងនៅសល់តិចជាងនេះក្នុងរយៈពេល១០ឆ្នាំខាងមុខ។
«ប្រាកដណាស់ ចំនួនប្រជាជនដែលរស់នៅជុំវិញបឹងនេះ បានកើនឡើងយ៉ាងច្រើន គឺដោយសារជម្លោះក្នុងតំបន់នានា ដូចជាតំបន់ Sahel ប៉ុន្តែក៏ដោយសារតែបឹងនេះជាប្រភពទឹកតែមួយគត់សម្រាប់នេសាទនិងប្រព័ន្ធធារាសាស្រ្ត ដែលពួកយើងមាននៅក្នុងតំបន់ទាំងអស់នេះដែរ។ ហើយការប្រើប្រាស់ទឹកសម្រាប់ប្រព័ន្ធធារាសាស្រ្តបានកើនឡើងកាលពីឆ្នាំមុន ដែលនេះបានដាក់សម្ពាធកាន់តែខ្លាំង»។
អង្គការ FAO ទីភ្នាក់ងារអង្គការសហប្រជាជាតិ និងស្ថាប័នមនុស្សធម៌ផ្សេងៗទៀត កំពុងអំពាវនាវសុំការគាំទ្រពីសំណាក់អន្តរជាតិជាបន្ទាន់។ ការគាំទ្រទាំងនោះ រួមមានជំនួយស្បៀងអាហារជាបន្ទាន់ និងជំនួយក្នុងការផលិតអាហារ។
«នេះមិនមែនគ្រាន់តែជាវិបត្តិមនុស្សធម៌ប៉ុណ្ណោះទេ វាក៏ជាវិបត្តិប្រព័ន្ធអេកូឡូស៊ីដែលអាចប៉ះពាល់ដល់ការរស់នៅរបស់ប្រជាជនទាំងនោះនៅថ្ងៃអនាគតដែរ។ យើងត្រូវតែចាត់វិធានការជាបន្ទាន់»។
លោក Graziano da Silva និយាយថា ប្រសិនបើកសិករនៅក្នុងតំបន់នេះមានការខកខាននៅរដូវដាំដុះនៅខែឧសភាឬមិថុនា នោះនឹងមិនមានទិន្នផលជាដុំកំភួនសម្រាប់ពួកគេរហូតដល់ឆ្នាំបន្ទាប់។
លោកនិយាយថា អ្វីដែលតំបន់បឹង Chad Basin ខ្វះខាតគឺការអភិវឌ្ឍជនបទ ហើយវាជាហេតុបង្កឲ្យមានភាពក្រីក្រ។ លោកបានបន្តថា នេះជាស្ថានភាពមួយ ដែលគេអាចឃើញនៅកន្លែងផ្សេងទៀតនៅក្នុងទ្វីបនេះ។
«អ្នកអាចស្រមើលស្រមៃពីតំបន់មួយ ដែលត្រូវបានបោះបង់ចោលទាំងស្រុង។ គ្មានការវិនិយោគទុនអ្វីទាល់តែសោះ។ ហើយគ្មានវត្តមានពីរដ្ឋាភិបាលកណ្តាល។ ដូច្នេះ វាជាមូលហេតុដែលធ្វើឲ្យជម្លោះនៅតែបន្ត។ វាជាជម្លោះមួយ ជាសង្រ្គាមមួយ ដូចខ្ញុំបាននិយាយអញ្ចឹងថា ជាសង្គ្រាមប្រឆាំងនឹងការអត់ឃ្លាន និងភាពក្រីក្រក្នុងតំបន់ជនបទនៃទ្វីបអាហ្វ្រិក»។
អង្គការស្បៀងអាហារនិងកសិកម្ម និងអង្គការផ្សេងៗទៀតកំពុងធ្វើការជាមួយកសិករនិងជនផ្លាស់ប្ដូរទីលំនៅ ដើម្បីផលិតអាហារនិងយកទិន្នផលដែលលើសទៅលក់នៅទីផ្សារ។ ពួកគេក៏កំពុងពិចារណាពីបច្ចេកទេសធារាសាស្ត្រដើម្បីសន្សំសំចៃទឹកផងដែរ។
លោក Graziano da Silva និយាយថា ជម្លោះនេះ «មិនអាចដោះស្រាយដោយប្រើអាវុធតែមួយមុខនោះទេ» ហើយលោកបានបន្ថែមថា«សន្តិភាពជាលក្ខខណ្ឌចាំបាច់មុននឹងអាចដោះស្រាយវិបត្តិនេះបាន»៕
ប្រែសម្រួលដោយ វិញ សុជាតា