ការរាតត្បាតជំងឺជាសាកលប្រហែលរារាំងការប្រមូលផ្តុំក្នុងទ្រង់ទ្រាយធំផ្សេងៗនៅជុំវិញពិភពលោក ប៉ុន្តែនៅក្រុងព្យុងយ៉ាង កាលពីថ្ងៃអង្គារ ទី០៥ ខែមករា ជារឿងផ្សេងមួយ។
មេដឹកនាំកូរ៉េខាងជើងលោក Kim Jong Un បានថ្លែងទៅកាន់ពលរដ្ឋរាប់ពាន់នាក់ កាលពីថ្ងៃទី០៥ ខែមករា ដែលបានប្រមូលផ្តុំជិតគ្នានៅក្នុងសាលមួយ ដោយមិនមានពាក់ម៉ាស់ និងរក្សាគម្លាតពីគ្នា។ហើយសាររបស់លោក Kim មិនមានរឿងគួរឲ្យសាទរនោះទេ។
លោក Kim បានសារភាពថាកូរ៉េខាងជើង «ខកខានសម្រេចគោលដៅដោយមានចន្លោះខ្វះខាតយ៉ាងធំ» សឹងគ្រប់វិស័យនៅក្នុងផែនការសេដ្ឋកិច្ចរយៈពេលប្រាំឆ្នាំរបស់ខ្លួន នាពេលថ្មីៗនេះ។
សេដ្ឋកិច្ចកូរ៉េខាងជើងបានធ្លាក់ចុះយ៉ាងហោចណាស់ចំនួនប្រាំបីភាគរយនៅឆ្នាំ ២០២០។ នេះបើយោងទៅតាមការប៉ាន់ប្រមាណមួយចំនួន។ ពាណិជ្ជកម្មជាមួយចិន ដែលជាសសរទ្រូងសេដ្ឋកិច្ចធំមួយសម្រាប់ប្រទេសនេះ បានធ្លាក់ចុះជិត ៨០ភាគរយ។
គួបផ្សំជាមួយនឹងការបន្តដាក់ទណ្ឌកម្មពីសហគមន៍អន្តរជាតិនិងគ្រោះទឹកជំនន់ដ៏ធំ ឆ្នាំ ២០២០ គឺជាឆ្នាំដ៏លំបាកបំផុតមួយសម្រាប់របបដឹកនាំរបស់លោក Kim។
រូបឯកសារ៖ ពលរដ្ឋកូរ៉េខាងជើងពាក់ម៉ាស់ការពារជំងឺកូវីដ១៩ ខណៈធ្វើដំណើរក្នុងក្រុងព្យុងយ៉ា កូរ៉េខាងជើង កាលពីថ្ងៃទី៣០ ខែមីនា ឆ្នាំ២០២០។
កាលពីពាក់កណ្តាលខែមករា កូរ៉េខាងជើងត្រូវបានគេរំពឹងថា នឹងកំណត់ផែនការសេដ្ឋកិច្ចថ្មី។ ប៉ុន្តែអ្នកវិភាគលោក Bong Young-shik និយាយថា នាពេលនេះ កូរ៉េខាងជើងប្រហែលមិនអាចធ្វើបានច្រើននោះទេដើម្បីកែប្រែស្ថានភាពឲ្យប្រសើរឡើង។
លោកបានថ្លែងថា៖ «ខ្ញុំមិនអាចស្មានដឹងនោះទេ បើនិយាយពីការដែលកូរ៉េខាងជើងព្យាយាមជម្នះវិបត្តិការរាតត្បាតជំងឺកូវីដ១៩ ជាពិសេសនៅពេលអ្នកពិចារណាពីសមត្ថភាពផ្នែកប្រព័ន្ធសុខាភិបាលនិងវ៉ាក់សាំង។ កូរ៉េខាងជើងពិតជានៅក្រោយប្រទេសដទៃទៀត ឆ្ងាយណាស់ចំពោះការចាកចេញពីវិបត្តិការរាតត្បាតជំងឺដ៏មហន្តរាយនេះ»។
កូរ៉េខាងជើងទទូចថា មិនមានពលរដ្ឋណាម្នាក់នៅក្នុងប្រទេសធ្វើតេស្តវិជ្ជមានពីវីរុសកូរ៉ូណានោះទេប៉ុន្តែការលើកឡើងនេះត្រូវបានបដិសេធដោយក្រុមអ្នកជំនាញ។
យោងទៅតាមរបាយការណ៍មួយក្នុងសារព័ត៌មានប្រចាំថ្ងៃ The Wall Street Journal មានមូលដ្ឋាននៅក្រុងញូវយ៉កនាពេលថ្មីៗនេះ កូរ៉េខាងជើងបានដាក់ចេញនូវសំណើរមួយ ដើម្បីទទួលបានវ៉ាក់សាំងការពារជំងឺកូវីដ១៩។
ទណ្ឌកម្មពីសំណាក់សហគមន៍អន្តរជាតិក៏ជាការបញ្ហោចោទចម្បងមួយផងដែរសម្រាប់សេដ្ឋកិច្ចកូរ៉េខាងជើង។ យ៉ាងណាក្តី កូរ៉េខាងបានធ្វើពហិការមិនពិភាក្សាអំពីអាវុធនុយក្លេអ៊ែរជាមួយនឹងសហរដ្ឋអាមេរិកអស់រយៈពេលច្រើនខែមកហើយ។
ផ្ទុយទៅវិញ អ្នកវិភាគមួយចំនួនរំពឹងថា លោក Kim នឹងធ្វើតេស្តគ្រាប់មីស៊ីល ឬសព្វាវុធដទៃទៀតនៅពេលរដ្ឋបាលប្រធានាធិបតីជាប់ឆ្នោតលោក Joe Biden ចូលកាន់តំណែង។
នេះជាផ្នែកមួយនៃសារស្តីពី «ការពឹងអាស្រ័យលើខ្លួនឯង» របស់គ្រួសារដឹកនាំត្រកូលKim ហើយនេះក៏ជាប្រធានបទសារជាថ្មីនៅអំឡុងពេលវេទិកាប្រមូលផ្តុំក្នុងក្រុងព្យុងយ៉ាង។
អ្នកវិភាគលោក Bong និយាយថា វេទិកាប្រមូលផ្តុំនោះគឺជា ការព្យាយាមរបស់លោក Kim ដើម្បីបង្ហាញថា លោកនៅតែទទួលបានការគាំទ្រពីសាធារណជន ទោះបីជានៅអំឡុងពេលមានការលំបាកក៏ដោយ។
លោកបានថ្លែងថា៖ «លោក Kim Jong Un មិនអាចរង់ចាំបានយូរតទៅទៀតនោះទេ។ លោកត្រូវបង្ហាញពីសាមគ្គីភាព និងភាពស្មោះស្ម័គ្ររបស់ពលរដ្ឋទូទៅតាមរយៈសមាជបក្សលើកទីប្រាំបី និងសមាជប្រជាជាតិថ្នាក់កំពូលដែលនឹងត្រូវធ្វើឡើងដោយមិនបង្អង់យូរ។ បើមិនដូច្នេះទេ ភាពស្របច្បាប់ និងការគ្រប់គ្រងរបស់ថ្នាក់ដឹកនាំកំពូលមកលើពលរដ្ឋទូទៅនឹងធ្លាក់ចូលក្នុងស្ថានភាពអាសន្ន»។
នៅអំឡុងពេលសុន្ទរកថាបើកវេទិកាកាលពីថ្ងៃទី០៥ ខែមករា លោក Kim មិនបានលើកឡើងពីសហរដ្ឋអាមេរិក កូរ៉េខាងត្បូង ឬបញ្ហានុយក្លេអ៊ែរនោះទេ។ ហើយវេទិកានេះបានអូសបន្លាយអស់រយៈពេលជាច្រើនថ្ងៃ៕
ប្រែសម្រួលដោយលោក ណឹម សុភ័ក្រ្តបញ្ញា