ប្រធានគោលនយោបាយការបរទេសសហភាពអឺរ៉ុបលោកស្រី Federica Mogherini បាននិយាយនៅថ្ងៃច័ន្ទនេះថា សកម្មភាពយោធារបស់រុស្ស៊ីនៅក្នុងប្រទេសស៊ីរី គឺជា«ល្បែងផ្លាស់ប្តូរ»មួយ ដែលមាន«សមាសធាតុគួរឱ្យព្រួយបារម្ភខ្លាំងមួយចំនួន»។
លោកស្រីបានប្រាប់ក្រុមអ្នករាយការណ៍ព័ត៌មាននៅមុនពេលកិច្ចប្រជុំរដ្ឋមន្ត្រីការបរទេសសហគមន៍អឺរ៉ុបនៅប្រទេសលុចសំបួ (Luxembourg) ថា សកម្មភាពដែលធ្វើប្រឆាំងនឹងជនសកម្មប្រយុទ្ធរដ្ឋឥស្លាម ត្រូវតែធ្វើឡើងដោយច្បាស់លាស់ប្រឆាំងនឹងក្រុមនេះនិងក្រុមដទៃទៀត ដែលកំណត់ដោយអង្គការសហប្រជាជាតិ។
ប្រទេសរុស្ស៊ីកំពុងប្រឈមនឹងការរិះគន់ពីបស្ចិមប្រទេសថា យុទ្ធនាការតាមអាកាសនៅក្នុងប្រទេសស៊ីរី វាយប្រហារលើក្រុមប្រឆាំងនឹងប្រធានាធិបតីស៊ីរី Bashar al-Assad ដែលជាសម្ព័ន្ធមិត្តរបស់រុស្ស៊ីនោះ គឺមិនមែនក្រុមរដ្ឋឥស្លាមទេ។
លោកស្រី Mogherini បន្ថែមថា លោកស្រីជឿថាសហភាពអឺរ៉ុប ប្រទេសរុស្ស៊ី និងសហរដ្ឋអាមេរិកមានហេតុផលរួមគ្នានៅក្នុងប្រទេសស៊ីរី ដោយផ្អែកតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងក្របខណ្ឌអង្គការសហប្រជាជាតិ។ ប៉ុន្តែសកម្មភាពរបស់ពួកគេត្រូវតែមានការសម្របសម្រួលគ្នា។ បើមិនដូច្នេះទេនឹងមានគ្រោះថ្នាក់ដ៏ធ្ងន់ធ្ងរបំផុតជាពិសេសខាងផ្នែកយោធា។
លោកស្រី Mogherini សង្ឃឹមថាកិច្ចប្រជុំក្រុមរដ្ឋមន្ត្រីនេះ នឹងគ្របដណ្តប់លើអ្វីដែលសហគមន៍អឺរ៉ុបអាចរួមចំណែកជំរុញឱ្យមានដំណើរការមួយទៅមុខ ដើម្បីស្វែងរកដំណោះស្រាយនយោបាយមួយចំពោះវិបត្តិនៅក្នុងប្រទេសស៊ីរី ដែលបានសម្លាប់មនុស្សអស់២៤០.០០០នាក់ ចាប់តាំងពីខែមិនាឆ្នាំ២០១១៕