ប្រធានគោលនយោបាយសហភាពអឺរ៉ុប លោក Josep Borrell និយាយថា លោកនឹងពិភាក្សាលើការគាំទ្រផ្នែកហិរញ្ញវត្ថុនិងយោធារបស់សហភាពអឺរ៉ុបដល់អ៊ុយក្រែន ក្នុងពេលដែលលោកកំពុងបំពេញទស្សនកិច្ចក្នុងរដ្ឋធានីកៀវ ប្រទេសអ៊ុយក្រែននៅថ្ងៃអង្គារនេះ។
ទស្សនកិច្ចនេះកើតមានឡើងប៉ុន្មានថ្ងៃ ក្រោយពីសហភាពអឺរ៉ុបបានអនុម័តកញ្ចប់ជំនួយដែលមានទឹកប្រាក់ចំនួន ៥៤ ពាន់លានដុល្លារអាមេរិក ដល់ប្រទេសអ៊ុយក្រែន។
លោក Borrell បាននិយាយថា លោកនឹងប្រើប្រាស់កិច្ចប្រជុំក្នុងរដ្ឋធានីកៀវដើម្បីពិភាក្សាលើកំណែទម្រង់ក្នុងប្រទេសអ៊ុយក្រែន ខណៈដែលប្រទេសនេះកំពុងត្រៀមខ្លួនដើម្បីក្លាយជាសមាជិករបស់សហភាពអឺរ៉ុប។
នៅថ្ងៃអង្គារនេះផងដែរ លោក Rafal Grossi ប្រធានទីភ្នាក់ងារថាមពលបរមាណូអន្តរជាតិក៏បានធ្វើទស្សនកិច្ចក្នុងប្រទេសអ៊ុយក្រែនផងដែរ ដោយលោកមានកំណត់ទៅមើលទីតាំងរោងចក្រនុយក្លេអ៊ែរ Zaporizhzhia។
លោក Grossi និយាយថា លោកនឹងជួបពិភាក្សាជាមួយមន្ត្រីនៅទីនោះ និងវាយតម្លៃពីសុវត្ថិភាពដែលនៅផុយស្រួយនៅឡើយនៅក្នុងរោងចក្រនុយក្លេអ៊ែរនេះ ក៏ដូចជាស្ថានភាពសន្តិសុខនៅជុំវិញរោងចក្រនេះផងដែរ ដែលជាតំបន់មួយរបស់អ៊ុយក្រែន ស្ថិតក្រោមការគ្រប់គ្រងរបស់រុស្ស៊ី។
ក្រៅពីការបារម្ភលើសុវត្ថិភាពប្រេងនុយក្លេអ៊ែរក្នុងរោងចក្រនោះ ទីភ្នាក់ងារថាមពលបរមាណូអន្តរជាតិក៏បង្ហាញពីការបារម្ភលើការកាត់បន្ថយបុគ្គលិកធ្វើការនៅទីនោះផងដែរ។
រោងចក្រ Zaporizhzhia ជារោងចក្រនុយក្លេអ៊ែរធំជាងគេបង្អស់ក្នុងទ្វីបអឺរ៉ុប។
ដោយឡែក ការវាយប្រហាររបស់រុស្ស៊ីលើអ៊ុយក្រែនវិញ មន្ត្រីអ៊ុយក្រែននិយាយថា រុស្ស៊ីបានបាញ់មីស៊ីលមួយគ្រាប់ទៅលើតំបន់ភាគឦសានប្រទេសអ៊ុយក្រែន ដោយសម្លាប់មនុស្សម្នាក់និងរបួស ៣នាក់ផ្សេងទៀត។
អភិបាលតំបន់ Kharkiv លោកOleg Sinegubov និយាយថា មីស៊ីលរុស្ស៊ីប្រភេទ S-300 ពីរគ្រាប់បានបំផ្លាញសណ្ឋាគារមួយដែលមានកម្ពស់៣ជាន់ក្នុងទីក្រុង Zolochiv។
ក្រសួងការពារជាតិរុស្ស៊ីនិយាយថា រុស្ស៊ីបានបំផ្លាញដ្រូនអ៊ុយក្រែន ៧ គ្រឿងដែលហោះលើតំបន់ Belgorod ដែលនៅជាប់ព្រំដែនជាមួយអ៊ុយក្រែន៕
ព័ត៌មានខ្លះសម្រាប់សេចក្តីរាយការណ៍នេះត្រូវបានដកស្រង់ពីទីភ្នាក់ងារសារព័ត៌មាន Agence France-Presse និង Reuters។