ប្រទេសអេត្យូពីបានប្រារព្វពិធីបុណ្យសពជនរងគ្រោះចំនួន១៧នាក់ដែលបានស្លាប់ក្នុងការធ្លាក់ យន្តហោះក្រុមហ៊ុនអាកាសចរណ៍អេត្យូពីកាលពីសប្តាហ៍មុន។
បើមើលទៅក្នុងក្តារមឈូសសពភាគច្រើន ដូចជាមិនមានឃើញអ្វីនៅក្នុងនោះសោះ ដោយសារតែមានបំណែកសេសសល់តែបន្តិចបន្តួចប៉ុណ្ណោះ ដែលត្រូវគេរកឃើញនៅឯកន្លែងធ្លាក់យន្តហោះ ហើយគេអាចនឹងត្រូវការពេលដល់ទៅ៦ខែ ដើម្បីកំណត់អត្តសញ្ញាណសាកសពទាំងអស់នោះ។ នេះបើយោងតាមការអះអាងរបស់រដ្ឋាភិបាលអេត្យូពី។
ក្រុមគ្រួសារជនរងគ្រោះត្រូវគេផ្តល់ជូនកម្ទេចដីខ្លោចៗ ពីតំបន់ធ្លាក់យន្តហោះដើម្បីដាក់ក្នុងក្តារមឈូសដើម្បីធ្វើការបញ្ចុះសព។ ភួងផ្កាកុលាបសត្រូវគេដាក់នៅជុំវិញបុគ្គលិកយន្តហោះនៅឯព្រលានយន្តហោះ Bole International Airport កាលពីថ្ងៃអាទិត្យ ខណៈដែលក្រុមបុគ្គលិកទាំងនោះធ្វើបុណ្យកាន់មរណទុក្ខ ចំពោះសពអ្នកបើកយន្តហោះពីរនាក់ ហើយនឹងសហសេវិកអាកាសយាននិក៦នាក់ ដែលបម្រើការលើយន្តហោះនៃអាកាសចរណ៍អេត្យូពីជើងហោះហើរលេខ៣០២។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ជនរងគ្រោះចំនួន១៧នាក់ស្ថិតក្នុងចំណោមជនរងគ្រោះសរុប១៥៧នាក់ដែលបានស្លាប់ក្នុងការធ្លាក់យន្តហោះ Boeing 737 MAX 8 ដែលបានកើតឡើងកាលពីសប្តាហ៍មុន។
ជើងហោះហើរនោះក៏បានដឹកបុគ្គលិកអង្គការសហប្រជាជាតិចំនួន២១នាក់ផងដែរ។ ពួកគេធ្វើដំណើរទៅចូលរួមក្នុងសន្និសីទបរិស្ថានអង្គការសហប្រជាជាតិដ៏ធំក្នុងទីក្រុងណៃរ៉ូប៊ី៕