ក្រសួងអប់រំ យុវជននិងកីឡា បានរឹតបន្តឹងការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៦នេះ ដោយបានដាក់ចេញវិធានការជាច្រើនដែលអាចឲ្យសិស្សខ្លះដែលរំលោភបទបញ្ញតិនេះនឹងធ្លាក់ជាស័្វយប្រវត្តិ។
បេក្ខជនចូលរួមក្នុងការប្រឡងសញ្ញាបត្រមធ្យមសិក្សាទុតិយភូមិចំនួន២ថ្ងៃ ចាប់ពីថ្ងៃច័ន្ទនេះគឺមានចំនួន៩៣.៧៥២នាក់ ក្នុងនោះសិស្សស្រីមានចំនួន៤៥.២៣៧នាក់។ ការប្រឡងនេះចែកជា១៥៧ មណ្ឌលសំណេរ ស្មើនឹង៣.៧៨១បន្ទប់ ទាំងថ្នាក់វិទ្យាសាស្រ្ត និងវិទ្យាសាស្រ្តសង្គម។ នេះបើយោងទៅតាមទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា។
លោកហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា បាននិយាយថា ការប្រឡងបាក់ឌុបនាឆ្នាំនេះ មានលក្ខណៈល្អប្រសើរជាងការប្រឡងបាក់ឌុបកាលពីពីរឆ្នាំមុន។ លោកបានបន្ថែមថា ដើម្បីទប់ស្កាត់ការប្រព្រឹត្តអំពើពុករលួយ និងការលួចចម្លងផ្សេងៗ ក្រសួងបានរក្សាសុវត្ថិភាពវិញ្ញាសារ ហើយក្រសួងមានចែងជាបទបញ្ញត្តិថា ប្រសិនបើមានបុគ្គលណាម្នាក់លួចចម្លង ឬឲ្យអ្នកដទៃប្រឡងជំនួស បុគ្គលនោះនឹងត្រូវធ្លាក់ដោយស្វ័យប្រវត្តិ ក៏ដូចជាអាចប្រឈមនឹងចំណាត់ការផ្លូវច្បាប់ផងដែរ។ លោកបានបន្តថា ទាក់ទិននឹងបញ្ហាពុករលួយ មន្រ្តីអប់រំនឹងត្រូវទទួលការពិន័យកម្រិតទីមួយ ហើយនឹងអាចប្រឈមមុខនឹងវិធានការផ្លូវច្បាប់។
កម្រងរូបភាព៖ «សិស្សវិទ្យាល័យទូទាំងកម្ពុជាចូលប្រឡងមធ្យមសិក្សាទុតិយភូមិ»
យោងតាមលោកហង់ ជួនណារ៉ុន គោលបំណងនៅក្នុងចំណាត់ការខាងលើដោយក្រសួងអប់រំ គឺដើម្បីលើកកម្ពស់សមត្ថភាពរបស់សិស្សដើម្បីអាចធ្វើការប្រកួតប្រជែងនៅក្នុងតំបន់ និងជួយក្នុងការស្វែងរកការងារ។
ទោះបីយ៉ាងណាក៏ដោយ លោកស្រីអ៊ុក ឆាយ៉ាវី ប្រធានស្តីទីនៃសមាគមគ្រូបង្រៀនឯករាជ្យ បានថ្លែងថា គ្រូបង្រៀនមួយចំនួន បានបង្ហាញការមិនពេញចិត្តចំពោះការឃ្លាំមើលខ្លាំងពីសំណាក់អង្គភាពប្រឆាំងអំពើពុករលួយ។ ការណ៍នេះត្រូវលោកស្រីអ៊ុក ឆាយ៉ាវី បកស្រាយថា វាហាក់ដូចជា គ្រូបង្រៀនជាពិរុទ្ធជន និងហាក់ដូចជាក្រសួងអប់រំផ្ទាល់មិនទុកចិត្តលើមន្រ្តីរបស់ខ្លួន។ លោកស្រីសំណូមពរឲ្យក្រសួងអប់រំធ្វើកំណែទម្រង់ឡើងវិញ តាមរយៈការស្នើដាក់នគរបាលមានសមត្ថកិច្ចរក្សាសន្តិសុខ ជំនួសឲ្យអង្គភាពប្រឆាំងអំពើពុករលួយ៕