លោក Terry Branstad ឯកអគ្គរដ្ឋទូតសហរដ្ឋអាមេរិកប្រចាំប្រទេសចិនបានប្រកាសកាលពីថ្ងៃទី១៤ ខែកញ្ញាថា លោកនឹងលាលែងចេញពីតំណែងនៅដើមខែតុលា ដោយបញ្ចប់បេសកកម្មបីឆ្នាំកន្លះរបស់លោកក្នុងក្រុងប៉េកាំង។
នៅក្នុងសារតាម Twitter មួយនៅថ្ងៃនោះ លោករដ្ឋមន្ត្រីការបរទេសស.រ.អ. Mike Pompeo បាននិយាយថា៖ «លោកឯកអគ្គរដ្ឋទូត Branstad បានធ្វើវិភាគទានដល់ការធ្វើឱ្យទំនាក់ទំនងរវាងស.រ.អ.និងប្រទេសចិនមានតុល្យភាពជាថ្មីវិញដែលនាំឱ្យមានលទ្ធផលល្អទៅវិញទៅមក និងប្រកបដោយយុត្តិធម៌ផងដែរ។»
ពួកអ្នកវិភាគនិយាយថា ការចាកចេញពីតំណែងនៃឯកអគ្គរដ្ឋទូតស.រ.អ.រូបនេះដែលជាអតីតអភិបាលរដ្ឋ Iowa កំណត់សញ្ញាមួយទៀតថាគោលនយោបាយខាងការទាក់ទងរបស់ស.រ.អ.ជាមួយប្រទេសចិនបានចប់ហើយ។
លោក Orville Schell ជានាយកនៃមជ្ឈមណ្ឌលទំនាក់ទំនងរវាងស.រ.អ.និងប្រទេសចិននៅសមាគមអាស៊ី (Asia Society) ក្នុងបូរីញូវយ៉ក។ លោកបាននិយាយប្រាប់វីអូអេថា៖ «លោក Terry Branstad បានទៅកាន់ការនៅក្នុងស្ថានទូតនោះក្នុងសេចក្តីសង្ឃឹមថាពួកគេអាចដោះស្រាយបញ្ហានានាជាមួយប្រទេសចិនបាន តែគ្មានបញ្ហាណាមួយបានត្រូវដោះស្រាយរួចទេ»។
លោកឯកអគ្គរដ្ឋទូតស.រ.អ.រូបនេះអាចទៅជួបជាពិសេសជាមួយប្រធានាធិបតីចិនបានដោយលោកមានមិត្តភាពពីពេលមុនជាមួយប្រធានាធិបតីចិនលោក Xi Jinping កាលពីឆ្នាំ១៩៨៥នៅពេលលោក Xi ជាមន្ត្រីស្រុកម្នាក់នៅក្នុងខេត្ត Hubei ក្នុងប៉ែកខាងជើងនៃប្រទេសចិនដែលជាខេត្តសម្ព័ន្ធមិត្តជាមួយរដ្ឋ Iowa។
នៅពេលលោកប្រធានាធិបតី Donald Trump តែងតាំងលោក Terry Branstad ឱ្យកាន់តំណែងជាឯកអគ្គរដ្ឋទូតប្រចាំប្រទេសចិនកាលពីឆ្នាំ២០១៧ មនុស្សច្រើននាក់សង្ឃឹមថា លោកនឹងអាចជួយសម្រាលការប្រេះឆានៅក្រោយលោក Trump បានរិះគន់ខ្លាំងដល់កិច្ចព្រមព្រៀងពាណិជ្ជកម្មរបស់ស.រ.អ.ជាមួយរដ្ឋាភិបាលប៉េកាំងនៅក្នុងអំឡុងការឃោសនាបោះឆ្នោតកាលពីឆ្នាំ២០១៦។
ប៉ុន្តែទំនាក់ទំនងរវាងស.រ.អ.និងប្រទេសចិនបានដាំក្បាលចុះយ៉ាងខ្លាំង ក្រោយមានការផ្ទុះរាតត្បាតនៃជំងឺកូវីដ១៩។ ស្ថានភាពនេះបានធ្វើឱ្យឯកអគ្គរដ្ឋទូតអាមេរិកាំង ដ៏រួសរាយទៀងត្រង់មកពីតំបន់កណ្តាលសហរដ្ឋអាមេរិករូបនេះ មានឱកាសតិចតួចដើម្បីអាចប្រើទំនាក់ទំនងផ្ទាល់ខ្លួនរបស់លោកជាមួយមេដឹកនាំចិនដើម្បីជាអត្ថប្រយោជន៍ដល់ការទាក់ទងទ្វេភាគីបាន។
លោក Orville Schell បាននិយាយបន្ថែមថា៖ «លោក Terry Branstad ទំនងមានអារម្មណ៍ថាលោកមិនបានធ្វើការឲ្យបានប្រយោជន៍អ្វីទេនៅទីនោះទេ។» កាលពីសប្តាហ៍ទីពីរនៃខែកញ្ញាលោក Branstad មានទាក់ទិននឹងរឿងចម្រូងចម្រាសមួយនៅពេលកាសែតប្រចាំថ្ងៃរបស់ប្រជាជនចិន (People’s Daily) បានច្រានចោលអត្ថបទបញ្ចេញមតិដែលលោកបានសរសេរ។
រដ្ឋមន្ត្រីការបរទេសអាមេរិកលោក Pompeo បានសរសេរ tweet កាលពីអាទិត្យទីពីរនៃខែកញ្ញាថា ការណ៍នេះបង្ហាញថា គ្មានភាពទៅវិញទៅមកក្នុងទំនាក់ទំនងទ្វេភាគីទេពីព្រោះឯកអគ្គរដ្ឋទូតចិនប្រចាំស.រ.អ. «មានសេរីភាពក្នុងការបោះពុម្ពផ្សាយអត្ថបទក្នុងបណ្តាញផ្សាយព័ត៌មានស.រ.អ.ណាមួយក៏បាន»។
អ្នកនាំពាក្យនៃក្រសួងការបរទេសចិនបាននិយាយថា អត្ថបទរបស់លោក Branstad «មានពេញដោយភាពច្រឡោះប្រហោង ហើយគ្មានការពិតជាក់ស្តែងទេ»។
លោក Orville Schell ដែលជាអ្នកវិភាគបញ្ហាប្រទេសចិនយូរយារមកហើយ បានថ្លែងថា លោកមានជំនឿថារដ្ឋាភិបាលប៉េកាំងត្រូវមានការទទួលខុសត្រូវភាគច្រើនដល់ភាពអាក្រក់ជាងមុននៃទំនាក់ទំនងទ្វេភាគីនេះ។
លោក Schell បាននិយាយថា៖ «ខ្ញុំយល់ថា គឺក្របខណ្ឌទាំងមូលនៃការទាក់ទងគ្នាដែលបានធ្វើឱ្យប្រទេសទាំងពីរនេះមានស្ថិរភាពក្នុងពេលជាង៤០ឆ្នាំមកហើយនេះ។ ក៏ប៉ុន្តែសកម្មភាពគឃ្លើនយ៉ាងខ្លាំងរបស់ចិននៅក្នុងសមុទ្រចិនខាងត្បូង ច្រកសមុទ្រតៃវ៉ាន់ ហុងកុងនិងក្នុងតំបន់ Xinjiang បានសម្លាប់ក្របខណ្ឌនេះតែម្តង។ ហើយការណ៍នេះមិនគួរកើតមានឡើយ»។
មន្ត្រីជាន់ខ្ពស់ម្នាក់នៃក្រសួងការបរទេសស.រ.អ.បាននិយាយប្រាប់វីអូអេថា នៅក្នុងពេលលោក Branstad កាន់តំណែងជាឯកអគ្គរដ្ឋទូតក្នុងប្រទេសចិន ប្រទេសនេះបានប្រកាន់គោលនយោបាយនៃ«ការស្វែងរកចំណុចយល់ឃើញដូចគ្នា ដោយទុកដោយឡែកចំណុចខ្វែងគំនិតគ្នា»។ មន្ត្រីរូបនេះដែលបានសុំឱ្យបញ្ចេញឈ្មោះលោកនៅពេលពិភាក្សាអំពីស្ថានភាពបច្ចុប្បន្នបាននិយាយថា ការណ៍ដែលរដ្ឋាភិបាលក្រុងប៉េកាំងមិនអើពើដល់ការខ្វែងគំនិតគ្នាខាងគោលនយោបាយបានធ្វើឱ្យផលប្រយោជន៍ស.រ.អ.មានការខូចខាតច្រើន»។
មន្ត្រីអាមេរិកាំងរូបនេះបាននិយាយថា៖ «ការយល់ឃើញដូចគ្នាគឺអត្ថប្រយោជន៍សេដ្ឋកិច្ច។ ចំណែកឯការខុសគ្នាវិញគឺការខ្វែងគំនិតគ្នាអំពីវិស័យនយោបាយនិងគុណតម្លៃសាកល»។ លោកបាននិយាយបន្ថែមថា សកម្មភាពនានាដូចជាការបង្ខំឱ្យក្រុមហ៊ុនអាមេរិកាំងផ្ទេរបច្ចេកវិទ្យាដោយបង្ខំ «ធ្វើឱ្យមានឧបសគ្គធ្ងន់ធ្ងរដល់អត្ថប្រយោជន៍ជាមូលដ្ឋានរបស់ប្រទេសអាមេរិក»។
មន្ត្រីអាមេរិកាំងរូបនេះបានថ្លែងថា៖ «ការចាកចេញពីតំណែងនៃឯកអគ្គរដ្ឋទូតម្នាក់មិនផ្លាស់ប្តូរ[លក្ខណៈនៃទំនាក់ទំនង]នេះទេ»។
លោក David Miller ជាអតីតនាយកខាងការស្រាវជ្រាវនិងសេវាខាងរបស់ប្រើប្រាស់នៃការិយាល័យកសិដ្ឋានរដ្ឋ Iowa។ លោកបាននិយាយថា លោក Branstad ក៏អាចប្រើការវិលត្រឡប់មកស.រ.អ.វិញរបស់លោកដើម្បីជួយលោកប្រធានាធិបតី Trump ឱ្យឈ្នះឆ្នោតនៅឆ្នាំ២០២០នេះ នៅក្នុងការប្រកួតប្រជែងយ៉ាងប្រកិតជាមួយលោកអតីតអនុប្រធានាធិបតី Joe Biden ខាងគណបក្សប្រជាធិបតេយ្យ។
លោក Miller បានពោលថា៖ «លោកអភិបាលរដ្ឋ Branstad មានគេគោរពច្រើនជាពិសេសក្នុងរដ្ឋ Iowa។ ហើយរដ្ឋ Iowa ជារដ្ឋមានការប្រទាញប្រទង់»។
បណ្តាញទូរទស្សន៍ CNN បានរាយការណ៍ថា លោក Branstad ចាកចេញពីតំណែងលោកមុនពេលកំណត់ មួយផ្នែក ពីព្រោះលោក Trump បាន«សុំ»ឱ្យអតីតអភិបាលរដ្ឋIowa រូបនេះវិលមកវិញដើម្បីជួយឃោសនាឱ្យលោក។ លោក Eric Branstad ដែលជាកូនប្រុសឯកអគ្គរដ្ឋទូតរូបនេះ បានធ្វើការរួចស្រេចហើយជាមួយក្រុមអ្នកឃោសនាបោះឆ្នោតឱ្យលោក Trump៕
ប្រែសម្រួលដោយលោក ឈឹម សុមេធ